FDల్లో పెట్టుబడికి ఇదే సరైన సమయమా? RBI నిర్ణయంపై పెట్టుబడిదారుల్లో ఉత్కంఠ!

ముడి చమురు ధరలు పెరుగుతుండటంతో ద్రవ్యోల్బణ ఒత్తిళ్లు మళ్లీ పెరిగే అవకాశంపై ఆందోళనలు వ్యక్తమవుతున్నాయి. ఈ పరిస్థితుల్లో ఫిక్స్‌డ్ డిపాజిట్‌ (FD) పెట్టుబడిదారులు ప్రస్తుత వడ్డీ రేట్లను ఇప్పుడే లాక్ చేసుకోవాలా, లేక RBI తదుపరి ద్రవ్య విధాన సమీక్ష వరకు వేచి చూడాలా అనే సందిగ్ధంలో ఉన్నారు. అయితే ఆర్థిక నిపుణుల అభిప్రాయం ప్రకారం ప్రస్తుతం అందుబాటులో ఉన్న FD రేట్లు ఇంకా ఆకర్షణీయంగానే ఉన్నందున పెట్టుబడులను ఆలస్యం చేయకపోవడం మంచిదని సూచిస్తున్నారు. భౌగోళిక రాజకీయ ఉద్రిక్తతలు, ముఖ్యంగా పశ్చిమ ఆసియా పరిణామాలు, ముడి చమురు ధరలను ప్రభావితం చేస్తున్నాయి. దీని ఫలితంగా ద్రవ్యోల్బణం మళ్లీ పెరిగే ప్రమాదం ఉందని నిపుణులు హెచ్చరిస్తున్నారు. ఈ నేపథ్యంలో RBI రాబోయే ద్రవ్య విధాన సమావేశంలో రెపో రేటును యథాతథంగా ఉంచే అవకాశమే ఎక్కువగా ఉందని భావిస్తున్నారు.

CRISIL ప్రధాన ఆర్థికవేత్త ధర్మకీర్తి జోషి ప్రకారం, ప్రస్తుతం వినియోగదారుల ధరల సూచీ (CPI) కోర్ ఇన్‌ఫ్లేషన్ నియంత్రణలో ఉన్నప్పటికీ, అంతర్జాతీయ పరిస్థితులను దృష్టిలో ఉంచుకుని RBI అప్రమత్తంగా వ్యవహరించే అవకాశం ఉంది. ఇదే అభిప్రాయాన్ని Stable Money సహ వ్యవస్థాపకుడు సౌరభ్ జైన్ కూడా వ్యక్తం చేశారు. ద్రవ్యోల్బణ ధోరణులు, లిక్విడిటీ పరిస్థితులు, ఆర్థిక సూచీలను సమీక్షిస్తూ RBI జాగ్రత్తతో కూడిన వైఖరినే కొనసాగిస్తుందని ఆయన అన్నారు.

నిపుణుల అభిప్రాయం ప్రకారం ప్రస్తుతం FDలపై లభిస్తున్న వడ్డీ రేట్లు మంచి స్థాయిలోనే ఉన్నాయి. భవిష్యత్తులో రేట్లు తగ్గే అవకాశం ఉన్నందున, ఇప్పుడే పెట్టుబడులను లాక్ చేసుకోవడం అనేక మందికి ప్రయోజనకరంగా ఉండొచ్చని చెబుతున్నారు. ముఖ్యంగా, ఒకేసారి పెద్ద మొత్తాన్ని ఒకే కాలపరిమితితో పెట్టుబడి పెట్టడం కంటే “డిపాజిట్ లాడరింగ్” విధానాన్ని అనుసరించడం మంచిదని సూచిస్తున్నారు. డిపాజిట్ లాడరింగ్ అంటే వివిధ కాలపరిమితులతో అనేక FDలు చేయడం. దీనివల్ల కొన్ని డిపాజిట్లు క్రమంగా మెచ్యూర్ అవుతూ ఉంటాయి. తద్వారా అవసరమైనప్పుడు డబ్బును వినియోగించుకోవచ్చు లేదా అప్పటి మార్కెట్ పరిస్థితులకు అనుగుణంగా మళ్లీ పెట్టుబడి పెట్టే అవకాశం లభిస్తుంది. నిపుణుల మాటల్లో చెప్పాలంటే ప్రస్తుతం ఉన్న స్థిరమైన రాబడులను వదిలేసి కేవలం భవిష్యత్తు రేట్ల కోసం వేచి ఉండటం కన్నా, ప్రస్తుత అవకాశాలను వినియోగించుకోవడం తెలివైన నిర్ణయం కావచ్చు.

మరిన్ని బిజినెస్‌ వార్తల కోసం ఇక్కడ క్లిక్‌ చేయండి