లో కాస్ట్‌ EMI అని ఎడాపెడా కొనేస్తున్నారా? అవి ఎలా నష్టం చేస్తాయో తెలుసుకోండి!

Emi 8

నెలకు కేవలం రూ.2,999 EMI అనే ప్రకటనలు ఇప్పుడు ప్రతి ఈ-కామర్స్ వెబ్‌సైట్‌, మొబైల్ షోరూమ్‌, ఎలక్ట్రానిక్స్ స్టోర్‌లో కనిపిస్తున్నాయి. పైకి చూస్తే ఇవి చాలా సులభమైన చెల్లింపు విధానంలా అనిపిస్తాయి. కానీ ఆర్థిక నిపుణుల అభిప్రాయం ప్రకారం.. లో కాస్ట్‌ EMIలు ఎప్పుడూ తక్కువ ఖర్చే అని అనుకోవడం పొరపాటే. చాలా జీరో ఇంటరెస్ట్ EMI పథకాలలో వడ్డీ ప్రత్యక్షంగా కనిపించకపోయినా, ఆ ఖర్చు ఉత్పత్తి ధరలోనే కలిపి ఉంటుంది. కొన్ని సందర్భాల్లో నగదు చెల్లిస్తే లభించే డిస్కౌంట్ లేదా క్యాష్‌బ్యాక్ ప్రయోజనాలు EMI ఎంపికతో కోల్పోతారు. ఉదాహరణకు రూ.50 వేల ఫోన్‌ను ఒకేసారి చెల్లిస్తే రూ.45 వేలకు దొరికే అవకాశం ఉన్నా, EMI తీసుకుంటే పూర్తి ధర చెల్లించాల్సి రావచ్చు.

ఇక ప్రాసెసింగ్ ఫీజులు, GST, డాక్యుమెంటేషన్ ఛార్జీలు వంటి అదనపు ఖర్చులు కూడా వినియోగదారులపై పడతాయి. ఒక్కోసారి ఇవి చిన్న మొత్తాలుగా కనిపించినప్పటికీ, తరచుగా EMIలు వాడేవారికి పెద్ద భారం అవుతాయి. ఆర్థిక నిపుణులు చెబుతున్న మరో కీలక అంశం మానసిక ఖర్చు భ్రమ. నెలకు కొన్ని వేల రూపాయలు మాత్రమే చెల్లించాల్సి రావడంతో, అసలు ఉత్పత్తి ధర పెద్దదైనా కొనుగోలు చేయడం సులభంగా అనిపిస్తుంది. దీంతో అవసరం లేని ఖరీదైన వస్తువులను కూడా ప్రజలు కొనుగోలు చేసే ప్రమాదం పెరుగుతోంది.

అదే సమయంలో ఒకటి కంటే ఎక్కువ EMIలు తీసుకోవడం వల్ల నెలవారీ ఆర్థిక ఒత్తిడి పెరుగుతుంది. మొబైల్‌, ల్యాప్‌టాప్‌, టీవీ, గృహోపకరణాలు అన్నీ EMIలపై ఉంటే ఆదాయంలో పెద్ద భాగం ముందుగానే బంధించబడుతుంది. అత్యవసర పరిస్థితుల్లో ఇది సమస్యగా మారొచ్చు. ఇంకా అధిక EMIలు వ్యక్తి క్రెడిట్ ప్రొఫైల్‌పై కూడా ప్రభావం చూపుతాయి. భవిష్యత్తులో గృహ రుణాలు లేదా పెద్ద లోన్లు తీసుకునే సమయంలో బ్యాంకులు దీనిని రిస్క్‌గా పరిగణించే అవకాశం ఉంటుంది.

అయితే అవసరమైన కొనుగోళ్ల కోసం EMIలు ఉపయోగపడతాయని నిపుణులు చెబుతున్నారు. ముఖ్యంగా నగదు ప్రవాహాన్ని కాపాడుకోవాలనుకునే వారికి ఇది ఉపయుక్తం. కానీ “EMI వల్ల వస్తువు చవక అవుతుందా? లేక కేవలం చెల్లింపును వాయిదా వేస్తుందా?” అనే ప్రశ్నను ముందుగా ఆలోచించాలని సూచిస్తున్నారు.

మరిన్ని బిజినెస్‌ వార్తల కోసం ఇక్కడ క్లిక్‌ చేయండి