రష్యాకు ఊహించని షాకిచ్చిన చైనా..! తమ్ముడు తమ్ముడే.. వ్యాపారం వ్యాపారమే అంటున్న డ్రాగన్ కంట్రీ!
ప్రపంచ దౌత్యంలో రష్యా, చైనా స్నేహం బలమైనదిగా కనిపించినా, వాణిజ్యం విషయానికి వచ్చేసరికి ఆర్థిక లాభాలే ముఖ్యం. రష్యా నుంచి విద్యుత్ కొనుగోళ్లను చైనా పూర్తిగా నిలిపివేసింది. రష్యా ఎగుమతి ధరలు పెరిగి, చైనా దేశీయ విద్యుత్ కంటే ఖరీదైనవిగా మారడమే దీనికి కారణం.
ప్రపంచ దౌత్యంలో రష్యా, చైనా మధ్య స్నేహాన్ని ఉదాహరణగా పేర్కొంటారు. కానీ వాణిజ్యం, లాభాల విషయానికి వస్తే ఆ స్నేహం కూడా పనిచేయడం లేదు. తమ్ముడు తమ్ముడే పేకాట పేకాటే అన్నట్లు.. అమెరికాకి వ్యతిరేకంగా రెండు దేశాలు ఒక్కటే అయినా వ్యాపారం విషయంలో మాత్రం చైనా తన ప్రయోజనాలు తాను చూసుకుంటోంది. ఈ క్రమంలోనే రష్యా నుంచి విద్యుత్ కొనుగోళ్లను పూర్తిగా నిలిపివేసి పుతిన్ ప్రభుత్వానికి ఊహించని షాక్ ఇచ్చింది డ్రాగన్ కంట్రీ. పాశ్చాత్య ఆంక్షల మధ్య రష్యా తన ఆర్థిక వ్యవస్థకు మద్దతు ఇవ్వడానికి ఆసియా మార్కెట్లపై ఎక్కువగా ఆధారపడుతున్న సమయంలో చైనా తీసుకున్న నిర్ణయం రష్యాకు ఇబ్బందికరంగా మారింది.
చైనా తీసుకున్న ఈ కఠిన నిర్ణయానికి ప్రధాన కారణం ధర. రష్యన్ ఇంధన మంత్రిత్వ శాఖ, రాయిటర్స్ నివేదిక ప్రకారం.. జనవరి 1 నుండి చైనా రష్యా నుండి విద్యుత్ దిగుమతులను పూర్తిగా నిలిపివేసింది. నిజానికి వ్యాపార సాధారణ నియమం లాభం. ఇప్పటి వరకు రష్యా నుండి విద్యుత్ కొనుగోలు చేయడం చైనాకు చౌకగా ఉండేది, కానీ ఇటీవల పరిస్థితి మారిపోయింది. రష్యా విద్యుత్ ఎగుమతి ధరలు చాలా పెరిగాయని, అవి ఇప్పుడు చైనా దేశీయ విద్యుత్ ధరల కంటే ఎక్కువగా ఉన్నాయని నివేదికలు సూచిస్తున్నాయి. దీని అర్థం చైనా దేశీయంగా విద్యుత్తును ఉత్పత్తి చేయడం చౌకైనది, రష్యా నుండి కొనుగోలు చేయడం ఖరీదైనది. అందుకే బీజింగ్ వెనక్కి తగ్గింది. 2026 నాటికి ఈ ధరలు తగ్గే అవకాశం లేదా చైనా దేశీయ ధరలతో పోల్చదగినవిగా మారే అవకాశం లేదని నిపుణులు భావిస్తున్నారు. అందువల్ల ఈ సంవత్సరం చైనాకు రష్యన్ విద్యుత్ సరఫరా తిరిగి ప్రారంభమయ్యే అవకాశం లేదని భావిస్తున్నారు.
ఈ అంతరాయం తాత్కాలికమే కావచ్చు
ఈ అంతరాయం తాత్కాలికమే కావచ్చు, కానీ ప్రస్తుత పరిస్థితి తీవ్రంగా ఉందని రష్యన్ మీడియా సంస్థ కొమ్మెర్సంట్ నివేదించింది. రష్యా, చైనా మధ్య ఈ విద్యుత్ సరఫరా ఒప్పందం 2037 వరకు చెల్లుబాటులో ఉంటుంది. ఇంత దీర్ఘకాలిక ఒప్పందం ఉన్నప్పటికీ, సరఫరాలకు అంతరాయం ధరల హెచ్చుతగ్గులకు చైనా సున్నితత్వాన్ని ప్రదర్శిస్తుంది.
మరిన్ని బిజినెస్ వార్తల కోసం ఇక్కడ క్లిక్ చేయండి