ఎండాకాలంలో రోజుకు 15 గంటలు కూలర్ వాడితే కరెంట్ బిల్ ఎంత వస్తుందో తెలుసా..?
ఎండాకాలం వచ్చిందంటే సామాన్యుడికి ఎయిర్ కూలర్లే దిక్కవుతాయి. పగలు, రాత్రి తేడా లేకుండా గంటల తరబడి కూలర్లు తిరుగుతూనే ఉన్నాయి. అయితే, చల్లదనం ఏమో కానీ.. నెల తిరిగేసరికి వచ్చే కరెంట్ బిల్లు చూసి సామాన్యుడి గుండె గుభేల్ మంటోంది. అసలు రోజుకు 15 గంటలు కూలర్ వాడితే బిల్లు ఎంత వస్తుందో తెలుసా?
Updated on: Apr 04, 2026 | 6:08 PM
ఎండలు మండిపోతున్నాయి. ఉష్ణోగ్రతలు 40 డిగ్రీలు దాటడంతో పగలు, రాత్రి తేడా లేకుండా ఎయిర్ కూలర్లు తిరుగుతూనే ఉన్నాయి. సామాన్యులకు ఏసీలు కొనే శక్తి లేకపోవడంతో అందుబాటు ధరలో ఉండే కూలర్లనే ఆశ్రయిస్తున్నారు. అయితే మధ్యాహ్నం వేడికి తోడు రాత్రిపూట ఉక్కపోత వల్ల చాలా ఇళ్లలో కూలర్లు రోజుకు 14 నుండి 15 గంటల పాటు నిరంతరాయంగా నడుస్తున్నాయి. ఈ నేపథ్యంలో అసలు కూలర్ వాడకం వల్ల నెలవారీ విద్యుత్ బిల్లుపై ఎంత భారం పడుతుందో ఇప్పుడు లెక్కలతో సహా చూద్దాం.
ఒక కూలర్ ఎంత విద్యుత్తును కాలుస్తుంది?
సాధారణంగా మనం వాడే డెసర్ట్ కూలర్లు 180 వాట్ల నుండి 250 వాట్ల సామర్థ్యాన్ని కలిగి ఉంటాయి. ఒక సగటు కూలర్ సామర్థ్యం 220 వాట్లు అని అనుకుంటే..ఒక గంటకు 0.22 యూనిట్లు ఖర్చవుతుంది. రోజుకు 14 గంటలు వాడితే 3.08 యూనిట్లు, రోజుకు 15 గంటలు వాడితే 3.30 యూనిట్లు ఖర్చు అవుతుంది.
నెలవారీ బిల్లు లెక్కలివే:
ప్రస్తుతం 2026లో గృహ విద్యుత్ ధరలు యూనిట్కు రూ. 5 నుండి రూ.10 మధ్య ఉన్నాయి. ఒకవేళ మీ ప్రాంతంలో యూనిట్ ధర రూ.6.50 అనుకుంటే..రోజుకు 14 గంటలు వాడితే నెలకు సుమారు 92.4 యూనిట్లు కాలుతాయి. అంటే మీ బిల్లులో కేవలం కూలర్ వల్లే రూ.600 అదనంగా పెరుగుతుంది. రోజుకు 15 గంటలు వాడితే నెలకు సుమారు 99 యూనిట్లు కాలుతాయి. దీనివల్ల మీ బిల్లు దాదాపు రూ.640 నుండి రూ. 650 వరకు పెరిగే అవకాశం ఉంది.
విద్యుత్ బిల్లును తగ్గించుకోవడానికి స్మార్ట్ టిప్స్
కూలర్ వాడుతూనే బిల్లు తగ్గించుకోవాలంటే ఈ జాగ్రత్తలు తప్పనిసరి
సర్వీసింగ్ ముఖ్యం: పాతబడిపోయిన ఫిల్టర్లు, దుమ్ము పేరుకుపోయిన ప్యాడ్లు ఉంటే మోటార్పై భారం పడి ఎక్కువ విద్యుత్ ఖర్చవుతుంది. సీజన్ ప్రారంభంలోనే సర్వీసింగ్ చేయించండి.
మీడియం స్పీడ్: కూలర్ను ఎప్పుడూ హై స్పీడ్లో కాకుండా మీడియం లేదా లో స్పీడ్లో ఉంచండి. గాలిలో పెద్ద తేడా ఉండదు కానీ విద్యుత్ ఆదా అవుతుంది.
నీటి పరిమాణం: కూలర్ ట్యాంక్లో నీటిని మరీ ఎక్కువగా నింపకండి. ఇది మోటార్పై ఒత్తిడి పెంచుతుంది.
స్టెబిలైజర్ వాడకం: వోల్టేజ్ హెచ్చుతగ్గుల వల్ల మోటార్ వేడెక్కి విద్యుత్ వినియోగం పెరుగుతుంది. స్టెబిలైజర్ వాడటం వల్ల కూలర్ లైఫ్ పెరుగుతుంది, బిల్లు తగ్గుతుంది.
టైమర్ సెట్ చేయండి: రాత్రిపూట వాతావరణం చల్లబడిన తర్వాత కూలర్ ఆగిపోయేలా టైమర్ సెట్ చేసుకోవడం ఉత్తమం.
కొత్తగా కొనేవారికి సలహా
మీరు కొత్త కూలర్ కొనాలనుకుంటే 5 స్టార్ రేటింగ్ ఉన్న మోడల్స్ లేదా BLDC మోటార్ ఉన్న కూలర్లను ఎంచుకోండి. ఇవి సాధారణ కూలర్ల కంటే 50శాతం తక్కువ విద్యుత్తును వినియోగిస్తాయి.
