Young Investor : వామ్మో.. 10 ఏళ్లకే గోల్డ్ ఇన్వెస్టరా? ఈ చిన్నారి తెలివితేటలు చూస్తే షాక్ అవ్వాల్సిందే!

చైనాలోని లాంగ్‌ఫాంగ్‌లో నివసించే ఈ చిన్నారి, గత మూడేళ్లుగా తనకు చైనీస్ న్యూ ఇయర్ సందర్భంగా లభించే ‘గిఫ్ట్ మనీ’ని (యువాన్లు) బంగారంగా మారుస్తోంది. కేవలం డబ్బును దాచుకోవడమే కాకుండా, మార్కెట్ పెరిగే కొద్దీ తన పెట్టుబడి విలువ ఎలా పెరుగుతుందో కూడా ఈ బాలిక గమనిస్తోంది. గ్రాముకు 460 యువాన్లు ఉన్నప్పుడు కొనుగోలు మొదలుపెట్టిన ఈ చిన్నారి వద్ద, ఇప్పుడు అది గ్రాముకు 1,100 యువాన్లకు చేరడం విశేషం. ఈ బాలిక తెలివితేటలపై నెటిజన్లు ప్రశంసల వర్షం కురిపిస్తున్నారు.

అమ్మనాన్నలపై నమ్మకం లేక కాదు.. భయంతో!

సాధారణంగా తల్లిదండ్రులు పిల్లల డబ్బును అవసరాలకు వాడుకుంటారనే భయంతో ఈ బాలిక తన పొదుపు మార్గాన్ని మార్చుకుంది. ప్రతి సంవత్సరం చైనీస్ న్యూ ఇయర్ సందర్భంగా ఈమెకు సుమారు 4,000 యువాన్లు (సుమారు 731 సింగపూర్ డాలర్లు) గిఫ్ట్‌గా అందుతాయి. ఆ డబ్బును అలాగే ఉంచితే ఖర్చయిపోతుందని భావించి, తన తల్లి సహాయంతో బంగారం కొనడం ప్రారంభించింది. ప్రస్తుతం ఈమె వద్ద దాదాపు 30 గ్రాముల బంగారం ఉందని ఆమె తల్లి బాయి గర్వంగా చెబుతున్నారు.

మూడేళ్లలో రెట్టింపు లాభం!

ఈ చిన్నారి పెట్టుబడి పెట్టిన సమయం కూడా చాలా కలిసి వచ్చింది. ఆమె బంగారం కొనడం మొదలుపెట్టినప్పుడు ఒక గ్రాము ధర 460 యువాన్లు మాత్రమే ఉండేది. కానీ ఇప్పుడు అంతర్జాతీయ మార్కెట్‌లో బంగారం ధరలు విపరీతంగా పెరగడంతో, ప్రస్తుతం ఒక గ్రాము ధర 1,100 యువాన్ల మార్కును దాటేసింది. అంటే ఆమె పెట్టిన పెట్టుబడి విలువ ఇప్పుడు రెట్టింపు కంటే ఎక్కువే అయ్యింది. 10 ఏళ్ల వయసులోనే మార్కెట్ ఒడిదుడుకులను తట్టుకుని లాభాలను పొందుతుండటం విశేషం.

ఫ్యూచర్ బిజినెస్ టైకూన్?

సౌత్ చైనా మార్నింగ్ పోస్ట్ ఈ వార్తను ప్రచురించినప్పటి నుండి నెటిజన్లు ఆ బాలికను “ఫ్యూచర్ బిజినెస్ టైకూన్” అని పిలుస్తున్నారు. ఇప్పటి వరకు తాను కొన్న బంగారాన్ని అమ్మలేదని, భవిష్యత్తులో మరిన్ని గ్రాములు సేకరించాలని ఆమె భావిస్తోంది. కొంతమంది నెటిజన్లు జోక్ చేస్తూ.. “మాకంటే ఆ పాపకే ఎక్కువ ఫైనాన్షియల్ నాలెడ్జ్ ఉంది” అని కామెంట్స్ చేస్తున్నారు. చిన్న వయసులోనే పొదుపు పట్ల ఆమె చూపిస్తున్న ఆసక్తి అందరికీ ఆదర్శంగా నిలుస్తోంది.