Andhra: ఏపీలో సమంతకు గుడి ఉందని తెల్సా.. ఈసారి మరో విగ్రహం.. ఎక్కడంటే.?
ఏపీలో హీరోయిన్ సమంతకు గుడి కట్టేశాడు ఓ అభిమాని.. గతంలో ఆమె విగ్రహాన్ని తయారు చేసి విగ్రహావిష్కరణ చేసిన అతడు.. ఈసారి కూడా మరో విగ్రహాన్ని తయారు చేయించి.. చిన్న పిల్లలకు సేవా కార్యక్రమాలు చేస్తున్నాడు. మరి ఆ గుడి ఎక్కడుందంటే.?
అది కరోనా సమయం.. సినీ హీరో, హీరోయిన్ అభిమానులు అందరూ సేవా కార్యక్రమాలు నిర్వహిస్తున్నారు. అదే సమయంలో గుంటూరు జిల్లా చుండూరు మండలం ఆలపాడుకు చెందిన తెనాలి సందీప్ కు హీరోయిన్ సమంత అంటే చచ్చేంత ఇష్టం. ఆమె నటన మాత్రమే కాదు ఆమె చేసే సేవా కార్యక్రమాలు అంటే కూడా అభిమానం. ఈ క్రమంలోనే ఆమె పుట్టిన రోజు నాడు వినూత్నంగా ఆమెకు శుభాకాంక్షలు చెప్పాలని నిర్ణయించుకున్నాడు. తన స్వంత ఇంటిలోనే ఆమెకు గుడి కట్టాలని నిర్ణయించుకున్నాడు. ఇంకేముంది 2023లో ఆమె పుట్టిన రోజు సందర్భంగా తెనాలిలో ఆమె విగ్రహాన్ని తయారు చేయించి విగ్రహావిష్కరణ చేయించారు. అప్పటి నుంచి ఆమె గుడిలో ప్రతి ఏటా ఆమె పుట్టిన రోజు నాడు అన్నదానం కూడా నిర్వహిస్తున్నారు. అనాధ బాలబాలికలు, వృద్దులను తెనాలి నుంచి తీసుకొచ్చి వారికి అన్నం పెట్టి పంపించారు.
సమంత చిన్న పిల్లలకు చేస్తున్న కార్రక్రమాలతో స్పూర్తి పొందిన సందీప్ ప్రతి ఏటా అదే విధంగా అనాధ బాలబాలికలు అన్నదానం చేస్తున్నారు. సందీప్ పెద్ద పెద్ద ఉద్యోగాలు ఏమీ చేయడం లేదు. ఆటో నడుపుకుంటూ జీవించే సందీప్ కేవలం సమంత చేస్తున్న సేవా కార్యక్రమాల కారణంగానే గుడి కట్టించి అన్నదానం చేస్తున్నట్లు చెప్పాడు. ఆమె నిండు నూరేళ్ళు సుఖశాంతులతో విలసిల్లాలని కోరుకున్నాడు. సమంత తర్వాత టాలీవుడ్ లో మహేష్ బాబును అభిమానిస్తానని సందీప్ చెప్పాడు. చిన్న పిల్లలకు గుండె ఆపరేషన్లు చేయిస్తున్నందుకే మహేష్ అభిమానిగా మారానని తెలిపాడు. సమాజం కోసం మంచి పనులు చేస్తున్న వారిని గుర్తుపెట్టుకోవాలన్న ఉద్దేశంతోనే తాను గుడి కట్టించినట్లు చెప్పుకొచ్చాడు.