Viral: అరే ఏంట్రా ఇది.. ఎగ్జామ్ పెట్టింది 800 మార్కులకు.. వచ్చింది అంతకుమించి.. స్కోర్ చూస్తే..

సాధారణంగా ఏ పరీక్ష పెట్టినా.. విద్యార్ధులకు నిర్దేశించిన మార్కులకు ఒకటో.. అరో తక్కువ వస్తుంటాయి. ఎవ్వరికీ కూడా ఆ మార్కుల కంటే ఎక్కువ రావు. కానీ ఇక్కడ విచిత్రమేంటంటే.. విద్యార్ధులకు పరీక్షల్లో నిర్దేశించిన మార్కుల కంటే ఎక్కువ వచ్చాయి. ఉదాహరణకు 100కు పరీక్ష నిర్వహిస్తే.. ఆ స్కోర్‌కు అంతకుమించి మార్కులు స్టూడెంట్స్‌కు వచ్చాయి. దీనితో విద్యార్ధులకు ఆ మార్కులు చూసి దెబ్బకు ఫ్యూజులు ఎగిరిపోయాయి. ఈ ఘటన ఆంధ్రపదేశ్‌లో చోటు చేసుకుంది. ఆ వివరాలు ఇలా ఉన్నాయి.

నెల్లూరులోని విక్రమ సింహపురి యూనివర్సిటీలో వింత ఘటన చోటుచేసుకుంది. ఇటీవల నిర్వహించిన పరీక్షల్లో విద్యార్థులకు 800 మార్కులకు గానూ 2 వేలకు పైనే మార్కులు వచ్చాయి. ఓ విద్యార్థికైతే ఏకంగా 5,360 మార్కులు వచ్చాయి. ఆ మార్కులు చూసిన విద్యార్థులు అయోమయానికి గురయ్యారు. తాము ఏ గ్రేడ్‌లో పాసయ్యామో తెలియక డిగ్రీ విద్యార్థులు తలలు పట్టుకుంటున్నారు. యూనివర్సిటీలో 8 నెలల క్రితం డిగ్రీ నాలుగో సెమిస్టర్ పరీక్షలు నిర్వహించారు. తాజాగా, వాటి ఫలితాలను వెల్లడించారు. 8 నెలల తర్వాత ఫలితాలు వెల్లడించినప్పటికీ మార్కులు తప్పులు తడకగా ఉండడంపై విద్యార్థులు మండిపడుతున్నారు. విద్యార్థులందరికీ ఇలా 2 వేలకు పైగానే మార్కులు రావడంతో యూనివర్సిటీ అధికారుల నిర్లక్ష్యంపై విమర్శలు వెల్లువెత్తాయి. ఈ ఘటనపై స్పందించిన యూనివర్సిటీ రిజిస్ట్రార్ రామచంద్రారెడ్డి .. మార్కుల జాబితాలో తప్పులుంటే సవరించేందుకు చర్యలు తీసుకుంటామని పేర్కొన్నారు.