ప్రపంచంలో గూడు కట్టే ఏకైక పాము.. కట్లపాము, నాగుపాములను కూడా తినేస్తుంది..

కింగ్ కోబ్రాలను చూస్తే చాలా మందికి భయం వేయడం సహజం. దాని పొడవు, పడగ విప్పే తీరు, బుసకొట్టడం చూసి ప్రజలు వణుకుతారు. అయితే, ఆంధ్రప్రదేశ్‌లోని అనకాపల్లి జిల్లాలో కార్యకలాపాలు సాగిస్తున్న ఈస్టర్న్ ఘాట్స్ వైల్డ్‌లైఫ్ సొసైటీ (EGWLS) ప్రతినిధులు ఈ భయాన్ని వీడి, కింగ్ కోబ్రాలను సంరక్షించాలని పిలుపునిస్తున్నారు. ఈ సర్పాలు ప్రమాదకరమైనవిగా కనిపించినా, జీవ సమతుల్యతకు కీలకమని, పరోక్షంగా మానవ ప్రాణాలను కాపాడుతున్నాయని వారు స్పష్టం చేస్తున్నారు. కింగ్ కోబ్రాలు విషపూరితమైన పాములలో కెల్లా అతి పొడవైన సర్పాలు. అయినప్పటికీ, అవి సహజంగానే మనుషులంటే భయపడతాయి, తప్పించుకోవడానికే ప్రయత్నిస్తాయి. మనుషులను చూసినప్పుడు భయం వేసినప్పుడు, అవి ఆత్మరక్షణ కోసం పడగ విప్పి పైకి లేస్తాయి, కానీ ఇది కేవలం తమను తాము కాపాడుకోవడానికే. మనుషులు ఈ పాములను చంపడానికి ప్రయత్నించడం వల్లనే తరచుగా ఘర్షణలు చోటు చేసుకుంటాయి.

కింగ్ కోబ్రాలు బాంబూ పొదలు, దట్టమైన అటవీ ప్రాంతాలు, నీటి వనరులు పుష్కలంగా ఉన్న చోట్లను నివాసంగా ఎంచుకుంటాయి. ఇవి వాటికి ఆవాసంగానే కాకుండా, సంతానోత్పత్తికి కూడా అనుకూలమైన ప్రాంతాలు. 2016లో ప్రారంభమైన EGWLS, తూర్పు కనుమల్లోని గిరిజన, గ్రామీణ ప్రాంతాల ప్రజలకు కింగ్ కోబ్రాల ప్రాముఖ్యతను వివరించి, వాటిని చంపవద్దని అవగాహన కల్పిస్తోంది. ఈ సంస్థ వీడియోలు, వీధి నాటకాలు, బ్రోచర్లు, ఇన్ఫర్మేషన్ బుక్‌లెట్ల ద్వారా ప్రజల్లో అవగాహనను పెంచుతోంది. ఒక ముఖ్యమైన విషయం ఏమిటంటే, నాగుపాము, కట్లపాము, పొడపాము వంటి సాధారణ విష సర్పాలు కాటు వేయడం వల్ల వేలల్లో ప్రజలు ప్రాణాలు కోల్పోతుండగా, కింగ్ కోబ్రా కాటుతో మరణించిన కేసులు చాలా అరుదు. దీనికి కారణం కింగ్ కోబ్రాలు ఇతర విష సర్పాలైన నాగుపాములు, కట్లపాములు వంటి వాటిని ఆహారంగా తీసుకోవడమే. తద్వారా అవి ఈ ప్రమాదకరమైన పాముల సంఖ్యను నియంత్రించి, పరోక్షంగా మానవులను వాటి కాటు నుంచి కాపాడుతున్నాయి. ఈ విధంగా కింగ్ కోబ్రాలు పర్యావరణ వ్యవస్థలో సహజమైన నియంత్రణ సాధనంగా పనిచేస్తాయి.

EGWLS కేవలం కింగ్ కోబ్రాలను రెస్క్యూ చేయడమే కాకుండా, అవి గుడ్లు పెట్టినప్పుడు వాటిని సంరక్షించే బాధ్యతను కూడా తీసుకుంటుంది. మార్చి, ఏప్రిల్ నెలల్లో కింగ్ కోబ్రాలు జత కడతాయి. మే చివరిలో, జూన్ నెలలో ఆడ కింగ్ కోబ్రా వెదురు ఆకులు, పుల్లలతో ఒక గూడును కట్టి అందులో 30 నుండి 40 గుడ్లను పెడుతుంది. ప్రపంచంలో ఏ ఇతర సర్పం గూడు కట్టదు, ఇది కింగ్ కోబ్రాకు మాత్రమే ఉన్న ప్రత్యేకత. గుడ్లు పెట్టిన తర్వాత, ఆడ కింగ్ కోబ్రా ఒకటిన్నర నెలల పాటు ఆహారం తీసుకోకుండా వాటిని కాపాడుతుంది. గుడ్లు పొదిగిన తర్వాత, అది ఆహారం కోసం వెళ్లినప్పుడు, సివెట్స్, మంగూస్‌లు, మానిటర్ లిజర్డ్‌ల వంటి జంతువుల నుంచి గుడ్లను రక్షించడానికి EGWLS సిబ్బంది చర్యలు తీసుకుంటారు. ఆగస్టు మొదటి లేదా రెండవ వారంలో సుమారు 80-90% గుడ్ల నుండి పిల్లలు బయటకు వస్తాయి. కింగ్ కోబ్రాలు వన్యప్రాణి చట్టం 1972 ప్రకారం షెడ్యూల్ 2 యానిమల్స్‌గా వర్గీకరించారు. వీటిని హింసించినా, చంపినా తీవ్రమైన శిక్ష పడుతుందని అటవీ శాఖ అధికారులు చెబుతున్నారు. రాజనాగులు అంతరించిపోతున్న జాతికి చెందినవి. తూర్పు కనుమలలోని ఎవర్ గ్రీన్ అడవులలో, చల్లని వాతావరణంలో మాత్రమే ఇవి కనిపిస్తాయి. వీటి సంఖ్య క్రమంగా తగ్గిపోతోంది, వాటి దర్శనం కూడా అరుదుగా మారింది. అంతరించిపోతున్న ఈ అరుదైన జాతిని కాపాడుకునే బాధ్యత మనందరిపైనా ఉంది.

రైతుకు పొలంలోని గడ్డిలో కనిపించిన గూడు.. ఏమున్నాయా అని చూడగా..