Kankipadu: అమ్మ ప్రేమను గుర్తుకుచేసే రెస్టారెంట్.. అలనాటి మధుర జ్ఞాపకాలు ఎన్నో

ఒకప్పుడు.. పోస్టుమ్యాన్ సైకిల్ బెల్ శబ్దం వినిపిస్తే ఇంట్లోని వారంతా గుమిగూడేవారు. దూరంగా ఉన్న తమవారి నుంచి వచ్చిన ఒక్క ఉత్తరం కోసం రోజుల తరబడి ఎదురుచూసేవారు. ఆ కాగితంపై అక్షరాలు మాత్రమే కాదు.. ప్రేమ, ఆప్యాయత, అనుబంధాలు కూడా ప్రయాణించేవి. కానీ సాంకేతికత పెరిగిన కొద్దీ ఉత్తరాల స్థానంలో సెల్‌ఫోన్లు వచ్చాయి. చేతిరాత సందేశాలు జ్ఞాపకాలకే పరిమితమయ్యాయి. అలాంటి మరుగున పడిన జ్ఞాపకాలను మళ్లీ సజీవం చేయాలనే ఆలోచనే స్వగ్రామం రెస్టారెంట్‌కు ప్రత్యేక గుర్తింపు తీసుకొచ్చింది.

రెస్టారెంట్‌లో అడుగుపెట్టగానే కృష్ణా జిల్లా కంకిపాడు మండలం కోలవెన్ను గ్రామ వాతావరణం సందర్శకులను పలకరిస్తుంది. పల్లె అందాలు, పాతకాలపు వస్తువులతో పాటు గోడలపై కనిపించే చేతిరాత ఉత్తరాలు మాత్రం అందరి దృష్టిని ఆకర్షిస్తాయి. అవి కేవలం అలంకరణ కోసం పెట్టినవి కావు… రెస్టారెంట్ యజమాని రమణ విద్యార్థిగా ఉన్న రోజుల్లో ఆయన తల్లి ప్రేమతో రాసిన నిజమైన ఉత్తరాలు.

దూరంగా ఉన్న కొడుకు ఆరోగ్యం ఎలా ఉందోనన్న ఆందోళన… సమయానికి భోజనం చేయాలని చెప్పిన తల్లిప్రేమ… త్వరగా ఇంటికి రావాలని చేసిన విజ్ఞప్తి… ప్రతి అక్షరంలోనూ అమ్మ మమకారం ప్రతిబింబిస్తుంది. ఆ అనుబంధాన్ని నేటి తరానికి పరిచయం చేయాలనే ఉద్దేశంతో ఆ ఉత్తరాలను అందరికీ కనిపించేలా గోడలపై ప్రదర్శించారు.

ఈ రెస్టారెంట్‌లో కనిపించేది కేవలం ఒక గ్రామం కాదు… కుటుంబ బంధాలు, పల్లె ఆత్మీయత, బాల్య జ్ఞాపకాలు, మరచిపోతున్న సంప్రదాయాల సమ్మేళనం. ఇక్కడ భోజనం కడుపు నింపడమే కాదు… గోడలపై కనిపించే ఆ ఉత్తరాలు మనసును కూడా తడిమేస్తాయి.

ఎన్నో రెస్టారెంట్లు రుచికరమైన వంటకాలు అందిస్తాయి. కానీ తల్లి ప్రేమను, పల్లె అనుబంధాలను, చేతిరాత ఉత్తరాల విలువను మళ్లీ గుర్తు చేస్తూ… ప్రతి సందర్శకుడిని కాసేపు గతంలోకి తీసుకెళ్లే ప్రయత్నం చేస్తోంది ఈ స్వగ్రామం రెస్టారెంట్.

వీడియో దిగువన చూడండి…