మండిపోతున్న పశ్చిమాసియా.. 2 గంటల్లోనే అమెరికాపై ఇరాన్ ప్రతీకార దాడి..!

మధ్యప్రాచ్యంలో ఉద్రిక్తతలు మరోసారి యుద్ధ వాతావరణాన్ని తలపిస్తున్నాయి. అమెరికా, ఇరాన్ మరియు ఇజ్రాయెల్ దేశాల మధ్య చోటుచేసుకున్న వరుస దాడులు ఈ ప్రాంతంలో అస్థిరతను పెంచాయి. తాజా పరిణామాల ప్రకారం, కువైట్‌లోని అమెరికా సైనిక స్థావరాలపై ఇరాన్ క్షిపణి దాడులకు దిగింది.

ఈ ఉద్రిక్తతలకు ప్రధాన కారణం బందర్ అబ్బాస్ సమీపంలో అమెరికా జరిపిన దాడి. గురువారం (మే 28) తెల్లవారుజామున ఇరాన్ కాలమానం ప్రకారం 4:50 గంటలకు, అమెరికా దళాలు ఇరాన్‌కు చెందిన డ్రోన్ లాంచర్ స్థావరంపై దాడి చేశాయి. అంతకుముందు, బందర్ అబ్బాస్ మీదుగా వెళ్తున్న ఒక అమెరికన్ వాణిజ్య నౌకను లక్ష్యంగా చేసుకుని ఇరాన్ నాలుగు డ్రోన్‌లను ప్రయోగించింది. వీటిని కూల్చివేసిన అమెరికా, ఆత్మరక్షణలో భాగంగానే తాము ఎదురుదాడి చేశామని స్పష్టం చేసింది.

అమెరికా చర్యను కాల్పుల విరమణ ఒప్పంద ఉల్లంఘనగా ఇరాన్ అభివర్ణించింది. ప్రతీకారంగా, కువైట్‌లోని అమెరికా సైనిక స్థావరమైన అల్ సలేం వైమానిక స్థావరంపై ఇస్లామిక్ రివల్యూషనరీ గార్డ్స్ దాడులు చేశారు. ఈ నేపథ్యంలో కువైట్ సైన్యం తమ వాయు రక్షణ వ్యవస్థలను అప్రమత్తం చేసింది. పౌరులందరూ భద్రతా నిబంధనలు పాటించాలని కువైట్ ప్రభుత్వం హెచ్చరించింది.

ఏప్రిల్‌లో ఇరు దేశాల మధ్య కుదిరిన కాల్పుల విరమణ ఒప్పందం ఈ దాడులతో ప్రమాదంలో పడింది. విశేషమేమిటంటే, ఈ ఒప్పందాన్ని ఖరారు చేసేందుకు ఇరాన్ ప్రతినిధులు కువైట్ వెళ్లిన సమయంలోనే ఈ ఘర్షణ చోటుచేసుకుంది. మరోవైపు, అమెరికా అధ్యక్షుడు డొనాల్డ్ ట్రంప్ తనకు సుసంపన్నమైన యురేనియం కావాలని పట్టుబట్టడం, ఇరాన్ అందుకు నిరాకరించడం కూడా ఈ ఘర్షణలకు తెరవెనుక కారణంగా కనిపిస్తోంది.

అమెరికా-ఇరాన్ మధ్య ఉద్రిక్తతలు మొదలైన వెంటనే, ఇజ్రాయెల్ ప్రధాని బెంజమిన్ నెతన్యాహు లెబనాన్‌లోని హిజ్బుల్లా స్థావరాలపై భారీ దాడులకు ఆదేశించారు. హిజ్బుల్లా ఇరాన్ మద్దతు ఉన్న సంస్థ కావడంతో, ఇజ్రాయెల్ ఈ సమయాన్ని తమ ప్రయోజనాల కోసం వాడుకుంటోంది. దీంతో ప్రస్తుతం మధ్యప్రాచ్యం ఒక అగ్నిగుండంలా మారింది. ఇటు ఇరాన్ ప్రతీకార దాడులు, అటు ఇజ్రాయెల్ దూకుడు ప్రపంచ దేశాలను ఆందోళనకు గురిచేస్తున్నాయి. దీనిపై అంతర్జాతీయ సమాజం ఎలా స్పందిస్తుందో వేచి చూడాలి.

మరిన్ని అంతర్జాతీయ వార్తల కోసం ఇక్కడ క్లిక్ చేయండి..