Dream Bazaar Mall: మరీ ఇంత కరువులో ఉన్నారేంట్రా.. మాల్ ఓపెనింగ్ రోజే లూటీ చేసిన జనం..

షాపింగ్ మాల్ ఓపెనింగ్ అంటేనే హడావుడి ఫుల్‌ హంగామా ఉంటుంది. మాల్స్‌ ఓపెనింగ్‌ కోసం సెలబ్రిటీలు వచ్చి ప్రారంభోత్సవం చేస్తారు. ఇక ఓపెనింగ్ ఆఫర్ కింద.. షాపింగ్ మాల్ నిర్వాహకులు భారీ ఆఫర్లు ప్రకటిస్తారు. ఈ ఆఫర్లే ఆ షాపింగ్ మాల్ కొంప ముంచాయి. ఓపెనింగ్ చేసిన అరగంటలోనే ఆ షాపింగ్ మాల్ మూసివేయాల్సిన పరిస్థితి నెలకొంది. షాపింగ్ మాల్ ఓపెనింగ్ రోజే లూటీ చేసిన ఘటన పాకిస్థాన్‌లోని కరాచీలో చోటుచేసుకుంది. గులిస్తాన్‌-ఎ-జోహార్‌ ప్రాంతంలో డ్రీమ్‌ బజార్ పేరుతో ఓ పెద్ద షాపింగ్‌ మాల్‌ను ఈనెల 1న గ్రాండ్‌గా ప్రారంభించారు. ఓపెనింగ్‌ సందర్భంగా భారీ డిస్కౌంట్లు ప్రకటించటంతో వేలాదిగా జనం మాల్‌లోకి దూసుకొచ్చారు. రద్దీని కట్టడి చేయటంలో యాజమాన్యం విఫలమవ్వటంతో జనం చేతికందిన కాడికి దోచుకెళ్లారు. ప్రస్తుతం ఈ వీడియోలు నెట్టింట వైరల్‌ అవుతున్నాయి.