Undavalli Caves: బయటపడిన ఉండవల్లి గుహల రహస్యాలు ఇవే

గుంటూరు జిల్లాలో వెలసిన ఉండవల్లి గుహలు భారతదేశ ప్రాచీన శిల్పకళా సంపదకు అద్భుత ఉదాహరణగా నిలుస్తున్నాయి. కృష్ణానది తీర ప్రాంతంలో ప్రశాంత వాతావరణంలో ఉన్న ఈ గుహలు చారిత్రక వైభవాన్ని మాత్రమే కాదు.. ఆధ్యాత్మికతను కూడా ప్రతిబింబిస్తాయి.. ఇంద్రకీలాద్రిపై అమ్మవారి దర్శనం అనంతరం సందర్శకులు తప్పక వెళ్లే ప్రదేశంగా ఇవి ప్రత్యేక గుర్తింపు పొందాయి. ఈ గుహలు క్రీ.శ. 5 నుండి 7 శతాబ్దాల మధ్య కాలంలో ఆంధ్రదేశాన్ని పాలించిన విష్ణుకుండినుల కాలానికి చెందినవిగా చరిత్రకారులు భావిస్తున్నారు. ఒకప్పుడు బౌద్ధ భిక్షువుల సాధనా కేంద్రాలుగా విలసిల్లిన ఈ గుహలు, కాలక్రమేణా హిందూ సంప్రదాయాలకు నెలవుగా మారాయి. ఇక్కడి గోడలపై చెక్కిన శిల్పాలు మత సామరస్యానికి, ఆనాటి సాంస్కృతిక వైభవానికి సజీవ సాక్ష్యాలు. ఒకే ఒక పర్వతాన్ని పై నుండి కిందకు తొలిచి, నాలుగు అంతస్తుల భవనంగా మలచడం ఆ కాలపు శిల్పుల మేధస్సుకు నిదర్శనం. ప్రతి అంతస్తులో విశాలమైన మందిరాలు, అలంకృత స్తంభాలు విభిన్న దేవతామూర్తుల శిల్పాలు బౌద్ధ, జైన, హిందూ సంప్రదాయాల మేళవింపు, అన్నీ కలిపి ఈ గుహలను కళాభాండాగారంగా నిలబెట్టాయి. ఈ గుహలకే మకుటాయమానం శ్రీ అనంత పద్మనాభ స్వామి విగ్రహం. సుమారు 20 అడుగుల పొడవు కలిగిన ఈ భారీ విగ్రహాన్ని ఒకే శిలపై చెక్కడం అత్యంత విశేషం. శేషతల్పంపై పవళించిన స్వామివారి రూపాన్ని దర్శించుకుంటే కలిగే ఆధ్యాత్మిక అనుభూతి వర్ణణాతీతం. భక్తులు ఈ విగ్రహాన్ని చూసి పరవశించిపోతారు. కృష్ణా నది సమీపంలో ఉండటం వల్ల ఇక్కడి వాతావరణం ఎప్పుడూ ఆహ్లాదకరంగా ఉంటుంది. విజయవాడ ప్రకాశం బ్యారేజీ దాటిన తర్వాత మంగళగిరి వైపు వెళ్లే అమరావతి రోడ్డులో కేవలం 5 కిలోమీటర్ల దూరంలోనే ఈ గుహలు ఉన్నాయి. ఫోటోగ్రఫీ ప్రేమికులకు, ప్రశాంతత కోరుకునే వారికి ఇది ఒక స్వర్గధామమని చెప్పవచ్చు. మన పూర్వీకులు అందించిన ఈ అమూల్య వారసత్వాన్ని కాపాడుకోవాల్సిన బాధ్యత మనందరిపై ఉంది. మెరుగైన లైటింగ్, గైడ్ సదుపాయాలు కల్పిస్తే ఉండవల్లి గుహలు అంతర్జాతీయ పర్యాటక చిత్రపటంలో సగర్వంగా నిలుస్తాయి. శతాబ్దాల చరిత్రను తన గర్భంలో దాచుకున్న ఈ శిలలు.. శిల్పి ఉలి దెబ్బకు దేవతామూర్తులుగా మారిన వైనాన్ని ప్రతి ఒక్కరూ చూసి తీరాల్సిందే!

మరిన్ని వీడియోల కోసం ఇక్కడ క్లిక్ చేయండి

Also Watch:

Gas Cylinder Blast: టపాసుల్లా పేలిన గ్యాస్‌ సిలిండర్లు.. ఇళ్లు బుగ్గిపాలు

Iran Oil Tankers: భారత్‌కు చేరిన ఇరాన్‌ ఆయిల్ ట్యాంకర్‌లు

రైలులో 163 మంది చిన్నారుల అక్రమ రవాణా

బుక్ చేసి వారమైనా గ్యాస్‌ సిలిండర్‌ రాలేదా? ఘోస్ట్ డెలివరీయే కారణమా?

Vande Bharat Sleeper: దక్షిణాదికి తొలి వందే భారత్ స్లీపర్.. ఆ మార్గంలోనే ప్రయాణం