3 రాజధానులు ఉన్న ఏకైక దేశం ఇదే.. దీని వెనుక ఉన్న 115 ఏళ్ల మిస్టరీ ఏంటో తెలుసుకోండి..

సాధారణంగా ఏ దేశానికైనా ఒకే రాజధాని ఉండటం కామన్. దేశ పరిపాలన, చట్టాల రూపకల్పన, అత్యున్నత న్యాయస్థానం వంటి కీలక విభాగాలు ఆ ఒక్క నగరంలోనే కేంద్రీకృతమై ఉంటాయి. అయితే అధికారం మొత్తం ఒకే ప్రాంతంలో కేంద్రీకృతం కాకుండా.. కార్యనిర్వాహక, శాసన, న్యాయ శాఖలను మూడు వేర్వేరు నగరాల్లో ఏర్పాటు చేసి ప్రపంచంలోనే సరికొత్త పాలనా విధానాన్ని అమలు చేస్తున్న దేశం ఒకటి ఉంది. అదే ఆఫ్రికా ఖండంలోని దక్షిణాఫ్రికా. దక్షిణాఫ్రికా శాసన రాజధానిగా ప్రసిద్ధ తీర ప్రాంత నగరం కేప్ టౌన్ ఉంది. దేశ భవిష్యత్తును తీర్చిదిద్దే చట్టసభలు, జాతీయ పార్లమెంటు ఈ నగరంలోనే కొలువై ఉన్నాయి. పార్లమెంటు సమావేశాలు, కొత్త బిల్లుల రూపకల్పన, ప్రజా ప్రతినిధుల చర్చలన్నీ కేప్ టౌన్ వేదికగానే సాగుతాయి.

పరిపాలనా రాజధానిగా ప్రిటోరియా

దేశ పరిపాలనా వ్యవహారాలన్నీ ప్రిటోరియా కేంద్రంగా నడుస్తాయి. దక్షిణాఫ్రికా అధ్యక్షుడు, కేంద్ర మంత్రివర్గ కార్యాలయాలు, ప్రధాన ప్రభుత్వ శాఖల హెడ్‌క్వార్టర్స్ ఈ నగరంలోనే ఉన్నాయి. విదేశీ రాయబార కార్యాలయాలు కూడా ప్రిటోరియాలోనే నెలకొని ఉండటంతో.. దేశ విదేశాంగ విధానాలు, కీలక కార్యనిర్వాహక నిర్ణయాలన్నీ ఇక్కడి నుంచే అమలులోకి వస్తాయి.

న్యాయ రాజధానిగా బ్లూమ్‌ఫోంటైన్

దక్షిణాఫ్రికా న్యాయ రాజధానిగా బ్లూమ్‌ఫోంటైన్ నగరం ఉంది. దేశ అత్యున్నత న్యాయస్థానమైన సుప్రీం కోర్ట్ ఆఫ్ అప్పీల్ ఇక్కడే ఉంది. దేశవ్యాప్తంగా వివిధ న్యాయస్థానాల నుంచి వచ్చే కీలక వివాదాలు, సవాళ్లపై తుది తీర్పులు ఈ నగరంలోనే వెలువడతాయి. అత్యంత ప్రశాంతమైన ఆహ్లాదకర వాతావరణం ఉండే ఈ ప్రాంతాన్ని సిటీ ఆఫ్ రోజెస్ అని కూడా పిలుస్తారు.

మూడు రాజధానుల వెనుక అసలు చరిత్ర

ఈ వినూత్న వ్యవస్థ వెనుక శతాబ్దాల చారిత్రక రాజీ దాగి ఉంది. 1910లో బ్రిటిష్ పాలనలోని విభిన్న ప్రాంతాలు కలిసి యూనియన్ ఆఫ్ సౌత్ ఆఫ్రికాగా ఏర్పడినప్పుడు, రాజధాని హోదా కోసం ఆయా ప్రాంతాల మధ్య తీవ్ర వివాదాలు చెలరేగాయి. ఏదైనా ఒక్క నగరానికే పూర్తి అధికారం ఇస్తే ఇతర ప్రాంతాలు తిరుగుబాటు చేసే ప్రమాదం ఉండటంతో.. అధికారాలను సమానంగా విభజిస్తూ మూడు నగరాలకు మూడు శాఖల రాజధాని హోదాలను కేటాయించి వివాదానికి తెరదించారు.

ఆర్థిక రాజధాని జోహన్నెస్‌బర్గ్ ప్రాధాన్యం

దక్షిణాఫ్రికాలో అతిపెద్ద మెట్రోపాలిటన్ నగరమైన జోహన్నెస్‌బర్గ్‌కు అధికారిక రాజధాని హోదా లేకపోయినప్పటికీ, అది దేశ ఆర్థిక రాజధానిగా విలసిల్లుతుంది. దేశ అత్యున్నత రాజ్యాంగ న్యాయస్థానం ఇక్కడే ఉండటం విశేషం. 1994లో నెల్సన్ మండేలా సారథ్యంలో వర్ణవివక్ష వ్యతిరేక నూతన ప్రజాస్వామ్య ప్రభుత్వం ఏర్పడిన తర్వాత కూడా భిన్న సంస్కృతుల సమైక్యతకు చిహ్నంగా ఈ మూడు రాజధానుల విధానాన్ని ఇప్పటికీ విజయవంతంగా కొనసాగిస్తున్నారు.