సింహాన్ని నిమురుతూ ఫోటో దిగాలనుకున్నాడు.. ఇంతలో.!

సౌత్ ఆఫ్రికా: కొన్నిచోట్ల మనం చూపించే అత్యుత్సాహం.. మన ప్రాణాలకు ప్రమాదం తెచ్చిపెడుతుంది. సరిగ్గా అలాంటి సంఘటన ఒకటి సౌత్ ఆఫ్రికా లో జరిగింది. పీటర్ జార్జ్ అనే వ్యక్తి తన వివాహ వార్షికోత్సవం సందర్భంగా భార్యతో కలిసి సౌత్ ఆఫ్రికాలోని ఓ జూకి వెళ్ళాడు. ఇక అక్కడ ఉన్న ఒక సింహ బోను దగ్గర ఆగారు. పీటర్ కాస్త ఎక్కువ అత్యుత్సాహంతో బోనులో చేయి పెట్టి సింహాన్ని నిమరడం మొదలుపెట్టాడు. అదే సమయంలో మరో ఆడ సింహం అక్కడకు రాగా.. దాన్ని కూడా నిమిరే ప్రయత్నం చేశాడు. వెంటనే ఆడ సింహం పీటర్ చేయి పట్టుకుని తినడానికి యత్నించింది. కాగా అతి కష్టం మీద పీటర్ తన చేతిని సింహం నోట్లో నుంచి లాక్కుని ప్రాణాలతో బయటపడ్డాడు. మరోవైపు చేతికి తీవ్ర గాయాలు కావడంతో వెంటనే ఆసుపత్రిలో చేరాడు. ఇక అక్కడ జరిగిన తతంగాన్ని అతని భార్య వీడియో తీసి నెట్ లో పెట్టింది.. అది ఇప్పుడు తెగ వైరల్ అవుతోంది. సింహాలతోనే పరాచకాలా తాతగారూ.. అంటూ పీటర్‌పై నెటిజన్లు కామెంట్లు చేస్తున్నారు.

ఎన్నో ఏళ్లుగా ఈ జూ నడుపుతున్నామని.. ఎప్పుడూ కూడా ఇలాంటి సంఘటన జరగలేదని జూ అధికారులు చెబుతున్నారు. ప్రతీ చోటా ప్రమాద హెచ్చరిక బోర్డులు ఏర్పాటు చేశామని.. కానీ పీటర్ వాటిని అతిక్రమించారని పార్క్ అధికారి ఒకరు తెలిపారు. కాగా ఈ సంఘటనపై తాము ఎటువంటి చర్చలు తీసుకోబోమని అధికారులు స్పష్టం చేశారు.