వ్యర్థాల నుంచి కోట్లాది రూపాయల వ్యాపారం.. పనస గింజలతో కాఫీ తయారు చేసి అదరగొడుతున్న కేరళ మహిళ!
వ్యర్థాలుగా భావించి పడవేసే.. పనస పండు గింజలు కోట్ల రూపాయల ఆదాయ వనరుగా మారతాయని మీరు ఎప్పుడైనా ఊహించారా? కానీ, ఒక సాదాసీదా మహిళకు అది సాధ్యమైంది. పారేసిన పనస గింజలను సేకరించి, వాటిని శుద్ధి చేసి ఒక అద్భుతమైన కాఫీని తయారు చేశారు. ఆరోగ్యంపై అధిక శ్రద్ధపెడుతున్న వారికి ఈ కాఫీ ఒక వరంగా మారింది. చెత్తగా భావించే పడవేసే విత్తనాలతో మొదలైన ఆమె వ్యాపారం నేడు దేశం నలుదిశలా విస్తరించి కోట్లలో టర్నోవర్ అందిస్తుంది. పూర్తి వివరాల్లోకి వెళితే..
మనం పనస పండు తిన్న తర్వాత లోపల ఉండే గింజలను పారేస్తుంటాం. కానీ, ఒక సాదాసీదా మహిళ ఆలోచన ఆ పారేసే గింజలనే కోట్ల రూపాయల విలువైన వ్యాపారంగా మార్చింది. కేరళలోని వయనాడ్కు చెందిన జామీ సాజీ అనే మహిళ వేస్ట్ టు వెల్త్ (వ్యర్థాల నుండి సంపద) అనే సూత్రానికి నిలువెత్తు నిదర్శనంగా నిలిచారు. పనస గింజలతో ఆమె తయారు చేస్తున్న ప్రత్యేకమైన కాఫీ ఇప్పుడు దేశవ్యాప్తంగా వైరల్ అవుతోంది.
చిన్న వంటగది నుండి కోట్ల టర్నోవర్ వైపు:
జామీ సాజీ ప్రయాణం ఆమె ఇంటి వంటగదిలోనే చాలా సాధారణంగా ప్రారంభమైంది. పనస గింజల ఆరోగ్య ప్రయోజనాలను తెలుసుకున్న ఆమె, వాటిని ఎండబెట్టి, రోస్ట్ చేసి కాఫీ పొడిగా మార్చడంపై ప్రయోగాలు చేశారు. అలా తయారైన కాఫీ పొడిని ఆమె సోషల్ మీడియాలో షేర్ చేయగా, దానికి అనూహ్య స్పందన లభించింది. రుచిలో సాంప్రదాయ కాఫీకి ఏమాత్రం తీసిపోని ఈ పనస గింజల కాఫీ, ప్రస్తుతం ఆన్లైన్ ప్లాట్ఫారమ్ల ద్వారా దేశవ్యాప్తంగా విక్రయించబడుతోంది. నేడు ఈ స్టార్టప్ కోట్లాది రూపాయల టర్నోవర్తో దూసుకుపోతోంది.
కెఫీన్ లేని ఆరోగ్యకరమైన కాఫీ:
ఈ కాఫీకి ఇంత డిమాండ్ పెరగడానికి ప్రధాన కారణం ఇందులో కెఫీన్ లేకపోవడమే. సాధారణ కాఫీ తాగడం వల్ల కొందరిలో నిద్రలేమి, గ్యాస్ వంటి సమస్యలు వస్తాయి. కానీ, ఈ పనస గింజల కాఫీ పూర్తిగా కెఫీన్ రహితమైనది. ఆరోగ్యానికి ఎంతో సురక్షితమైనది. హెల్త్ కాన్షియస్ ఉన్నవారికి ఇది ఒక అద్భుతమైన ప్రత్యామ్నాయంగా మారింది.
రైతులకు, మహిళలకు ఆసరా:
జామీ సాజీ కేవలం వ్యాపారవేత్తగా ఎదగడమే కాకుండా సమాజానికి కూడా మేలు చేస్తున్నారు. గతంలో పనస గింజలను పారేసే స్థానిక రైతులకు ఇప్పుడు ఆమె అదనపు ఆదాయ వనరుగా మారారు. రైతుల నుండి నేరుగా గింజలను సేకరించడం ద్వారా వారికి మంచి ధర లభిస్తోంది. అలాగే, ఈ తయారీ ప్రక్రియలో స్థానిక మహిళలకు ఉపాధి కల్పిస్తూ ఆమె ఎందరికో ఆదర్శంగా నిలిచారు.
ఫుడ్ సేఫ్టీ సర్టిఫికేషన్, మార్కెటింగ్ వంటి ఎన్నో సవాళ్లను ఎదుర్కొని నిలబడిన జామీ సాజీ కథ, పెద్ద పెట్టుబడుల కంటే వినూత్నమైన ఆలోచన, పట్టుదల ఉంటే ఎలాంటి విజయాన్నైనా అందుకోవచ్చని నిరూపిస్తోంది. మీరూ ఒకసారి ఈ పనస గింజల కాఫీని రుచి చూడాలనుకుంటున్నారా?