చికెన్, మటన్, చేపలు కాదు.. ఘుమఘుమలాడే కోబ్రా వంటకాలకు ఫుల్లు గిరాకీ! ఎక్కడంటే..
ప్రపంచవ్యాప్తంగా ఆహారపు అభిరుచులు విభిన్నంగా ఉంటాయి. వంటల ప్రపంచంలో మీరు బహుశా చికెన్ పకోడీ, మటన్ కబాబ్‌లు, ఫిష్ ఫ్రైలు, అనేక రకాల మాంసాహార వంటకాలను చూసి ఉంటారు. కానీ, విషపూరితమైన నాగుపాముతో కూడా వంట చేయగలరని మీరు ఎప్పుడైనా ఊహించారా? వినడానికి వింతగా అనిపించినప్పటికీ, ప్రపంచంలోని కొన్ని ప్రాంతాలలో నాగుపాము మాంసంతో చేసిన వంటకాలు ఎంతో ప్రాచుర్యం పొందాయి. అటువంటి ఒక మార్కెట్‌కు సంబంధించిన వీడియో ప్రస్తుతం సోషల్ మీడియాలో వైరల్ అవుతోంది. అక్కడ నాగుపాము మాంసంతో పకోడాలు, టిక్కాలు, సాసేజ్‌లు, ఇంకా అనేక రకాల ఇతర వంటకాలను తయారుచేస్తున్నారు.
Updated on: Aug 08, 2026 | 8:56 AM
ప్రపంచవ్యాప్తంగా ఒక్కో ప్రాంతంలో ఒక్కో రకమైన ఆహారపు అలవాట్లు ఉంటాయి. కొన్ని చోట్ల సాధారణంగా తినే ఆహార పదార్థాలు, మరికొన్ని ప్రాంతాల ప్రజలకు వింతగా లేదా ఆందోళనకరంగా అనిపిస్తాయి. సోషల్ మీడియాలో వైరల్ అవుతున్న ఒక వీడియోలో, నాగుపాముతో రకరకాల వంటకాలు తయారుచేసే ఒక మార్కెట్ కనిపిస్తోంది. ఈ వీడియో ఆ ప్రదేశం గురించి విస్తృత చర్చకు దారితీసింది. ప్రజలు ఆశ్చర్యపోతూ ఈ విలక్షణమైన మార్కెట్ గురించి మాట్లాడుకుంటున్నారు. ఇండోనేషియా రాజధాని జకార్తాలోని ఒక వీధి ఆహార మార్కెట్ కి సంబంధించిన వీడియో ఇంటర్‌నెట్‌లో తీవ్ర చర్చనీయాంశమైంది. అత్యంత ప్రమాదకరమైన కోబ్రా మాంసంతో ఇక్కడ రకరకాల వంటకాలు తయారు చేసి విక్రయిస్తుండటమే ఇందుకు కారణం.
వైరల్ వీడియో విశేషాలు:
పాకిస్తాన్‌కు చెందిన ప్రముఖ ట్రావెల్ బ్లాగర్ అద్నాన్ ముసాఫిర్ తన ఇన్‌స్టాగ్రామ్ ఖాతాలో ఈ వీడియోను షేర్‌ చేశారు. మనదేశంలో రోడ్డు పక్కన చాట్, నూడుల్స్ లేదా కబాబ్ దుకాణాలు ఉన్నట్లే, జకార్తాలోని కొన్ని వీధుల్లో కోబ్రా మాంసాన్ని విక్రయించే ప్రత్యేక స్టాల్స్ దర్శనమిస్తాయి. ఈ వీడియోలో ఒక మహిళ ప్రమాదకరమైన కోబ్రాను సాధారణ వస్తువులా చేతుల్లో పట్టుకోవడం చూడవచ్చు. ఇతరులకు హాని తలపెట్టకుండా ఆ పాము నోటికి టేప్ వేసి ఉంచారు.
కోబ్రా మాంసంతో రకరకాల డిష్‌లు:
ఈ మార్కెట్‌లో కోబ్రా మాంసాన్ని రకరకాల పద్ధతుల్లో వండి వడ్డిస్తారు. దుకాణదారులు వినియోగదారుల రుచికి తగినట్లుగా కోబ్రా సూప్, టీక్కా, పకోడీలు, సాసేజ్‌లు, గ్రిల్డ్ వంటకాలను తయారు చేస్తారు. అక్కడి స్థానిక ప్రజలు దీనిని ఎంతో ఇష్టంగా తింటారు. కొందరు దీనిని కేవలం రుచి కోసం తింటే, మరికొందరు తమ సాంప్రదాయ ఆహారంలో భాగంగా భావిస్తారు.
నెటిజన్ల భిన్నాభిప్రాయాలు:
ఈ వీడియో సోషల్ మీడియాలో ప్రత్యక్షం కాగానే నెటిజన్లు రకరకాలుగా స్పందించారు. ప్రపంచంలో ప్రాంతాన్ని బట్టి ఆహార సంస్కృతి ఎంత భిన్నంగా ఉంటుందో ఈ వీడియో స్పష్టం చేస్తోందని కొందరు కామెంట్ చేశారు. అత్యంత విషపూరితమైన పాములను ఆహారంగా తీసుకోవడం క్షేమం కాదని, వ్యాధుల బారిన పడే ప్రమాదం ఉందంటూ మరికొందరు ఆందోళన వ్యక్తం చేశారు. ఇలాంటి విషపూరిత జీవులను ఆహారం కోసం వేటాడటం వల్ల పర్యావరణ సమతుల్యత దెబ్బతింటుందని వన్యప్రాణి ప్రేమికులు హెచ్చరిస్తున్నారు. మొత్తానికి, ఒక ప్రాంతంలో భయానకంగా భావించే జీవి, మరొక ప్రాంతంలో ఆహారంగా మారడం మానవ సంస్కృతిలోని వైవిధ్యాన్ని తెలియజేస్తోంది. ప్రస్తుతం ఈ కోబ్రా స్ట్రీట్ ఫుడ్ వీడియో అంతర్జాలంలో ట్రెండింగ్‌గా నిలిచింది.
