Hyderabad: ఫైన్‌తో పోతుంది అనుకోకండి.. వీళ్లందరికీ జైలు శిక్ష పడింది..
మద్యం సేవించి వాహనాలు నడిపిన 17 మందికి మేడ్చల్ కోర్టు జైలు శిక్ష విధించింది. అక్టోబర్ 27న విచారించిన 24 డ్రంక్ అండ్ డ్రైవ్ కేసుల్లో 11 మందికి రెండు రోజులు, నలుగురికి మూడు రోజులు, మరో ఇద్దరికి ఐదు రోజుల జైలు శిక్ష విధిస్తూ తీర్పునిచ్చింది. నిందితులందరికీ కలిపి రూ.22,500 జరిమానా కూడా విధించింది.
Updated on: Oct 27, 2026 | 9:21 PM
మద్యం సేవించి వాహనాలు నడిపితే జైలు శిక్ష తప్పదని మేడ్చల్ ట్రాఫిక్ పోలీసులు హెచ్చరిస్తున్నారు. డ్రంక్ అండ్ డ్రైవ్ కేసుల్లో న్యాయస్థానం 17 మందికి జైలు శిక్ష విధించింది. మరోవైపు, ఈ కేసుల్లో మొత్తం రూ.22,500 జరిమానా కూడా విధించింది. మేడ్చల్ ట్రాఫిక్ పోలీసులు నిర్వహిస్తున్న తనిఖీల్లో భాగంగా నమోదైన కేసులపై అక్టోబర్ 27న మేడ్చల్‌లోని ప్రధాన జూనియర్ సివిల్ జడ్జి-కమ్-VII అదనపు జ్యుడీషియల్ ఫస్ట్ క్లాస్ మేజిస్ట్రేట్ న్యాయస్థానంలో విచారణ జరిగింది.
మొత్తం 24 డ్రంక్ అండ్ డ్రైవ్ కేసులను విచారించిన న్యాయస్థానం అన్నింటినీ పరిష్కరించింది. వీటిలో 17 మందికి జైలు శిక్ష విధిస్తూ తీర్పునిచ్చింది. 11 మందికి రెండు రోజుల జైలు శిక్ష, నలుగురికి మూడు రోజుల జైలు శిక్ష, మరో ఇద్దరికి ఐదు రోజుల జైలు శిక్ష విధించింది. నిందితులందరికీ కలిపి మొత్తం రూ.22,500 జరిమానా విధించింది.
మద్యం సేవించి వాహనాలు నడపడం చట్టరీత్యా నేరమని మేడ్చల్ ట్రాఫిక్ పోలీసులు స్పష్టం చేశారు. డ్రంక్ అండ్ డ్రైవింగ్ వల్ల వాహనదారుల ప్రాణాలకే కాకుండా రహదారిపై ప్రయాణించే ఇతరుల ప్రాణాలకు కూడా ముప్పు వాటిల్లుతుందని హెచ్చరించారు. ట్రాఫిక్ నిబంధనలు ఉల్లంఘిస్తే చట్టపరమైన చర్యలతో పాటు జైలు శిక్షను కూడా ఎదుర్కోవాల్సి వస్తుందని తెలిపారు. వాహనదారులు బాధ్యతాయుతంగా వ్యవహరించాలని, మద్యం సేవించిన తర్వాత వాహనాలు నడపకుండా ట్రాఫిక్ నిబంధనలను తప్పనిసరిగా పాటించాలని పోలీసులు విజ్ఞప్తి చేశారు.
