Ganesh Nimajjanam 2026 Live: భాగ్యనగరం వినాయక నిమజ్జన మహోత్సవానికి సర్వం సిద్ధం!
భాగ్యనగరంలో వినాయక నిమజ్జన మహోత్సవానికి అధికారులు అన్ని ఏర్పాట్లు పూర్తి చేశారు. సెప్టెంబర్ 25న నగరంలో భారీ శోభాయాత్ర జరగనున్న నేపథ్యంలో లక్షలాది మంది భక్తులు తరలిరానున్నారు. ఖైరతాబాద్ మహాగణపతితో పాటు వివిధ ప్రాంతాల నుంచి వచ్చే విగ్రహాల నిమజ్జనం కోసం హుస్సేన్సాగర్ పరిసరాల్లో ప్రత్యేక వేదికలు, క్రేన్లు, బారికేడ్లు, లైటింగ్, మొబైల్ టాయిలెట్లు, తాగునీటి సదుపాయాలు ఏర్పాటు చేశారు. హుస్సేన్సాగర్ వద్ద నిమజ్జన ప్రక్రియను వేగంగా పూర్తి చేసేందుకు అదనపు క్రేన్లను అందుబాటులో ఉంచారు.
Updated on: Sep 25, 2026 | 7:28 AM
LIVE NEWS & UPDATES
-
జలమండలి విస్తృత ఏర్పాట్లు
హైదరాబాద్లో వినాయక నిమజ్జనోత్సవాన్ని దృష్టిలో పెట్టుకుని జలమండలి విస్తృత ఏర్పాట్లు చేపట్టింది. శోభాయాత్రకు తరలివచ్చే లక్షలాది మంది భక్తులకు తాగునీటి కొరత లేకుండా ప్రత్యేక చర్యలు తీసుకుంది. నిమజ్జనం పూర్తయ్యే వరకు రాబోయే 72 గంటల పాటు అధికారులు, సిబ్బంది అప్రమత్తంగా ఉండాలని జలమండలి ఎండీ అశోక్రెడ్డి ఆదేశించారు.
-
ఖైరతాబాద్ బడా గణేష్ నిమజ్జనానికి బ్రేక్.. !
ఖైరతాబాద్ బడా గణేష్ నిమజ్జనం ఈసారి కాస్త ఆలస్యమవుతోంది. క్రేన్లో సాంకేతిక లోపం తలెత్తడంతో శోభాయాత్రకు ఆలస్యం జరిగింది. ప్రస్తుతం నిమజ్జనం కోసం క్రేన్లను సిద్ధం చేశారు. మరికాసేపట్లో ఖైరతాబాద్ నుంచి ఎన్టీఆర్ మార్గ్ వైపు బడా గణేష్ శోభాయాత్ర ప్రారంభం కానుంది. గతేడాదితో పోలిస్తే ఈసారి శోభాయాత్ర ఆలస్యంగా మొదలవుతోంది. మధ్యాహ్నం 12 గంటలకు మహాగణపతి సాగర్ తీరానికి చేరుకునేలా అధికారులు ఏర్పాట్లు చేశారు. నిమజ్జనం కోసం క్రేన్ నంబర్-4ను సిద్ధం చేశారు. మధ్యాహ్నం 1:30 గంటలలోపు నిమజ్జనం పూర్తి చేయాలని లక్ష్యంగా పెట్టుకున్నారు. శోభాయాత్ర మార్గంలో భారీగా భద్రతా ఏర్పాట్లు చేశారు.
-
-
మరికొద్ది సేపట్లో బాలాపూర్ లడ్డూ వేలం పాట
బాలాపూర్ గణేష్ లడ్డూ వేలం పాటకు సర్వం సిద్ధమైంది. మరికొద్ది సేపట్లో ఉత్సవ సమితి సభ్యులు గణనాథుడికి ప్రత్యేక పూజలు నిర్వహించనున్నారు. అనంతరం బాలాపూర్ గ్రామ ప్రదక్షిణ తర్వాత శోభాయాత్ర ప్రారంభమవుతుంది. ఉదయం 9 గంటలకు బాలాపూర్ గణేష్ బొడ్రాయి వద్దకు చేరుకోనున్నారు. ఉదయం 9:30 గంటలకు ప్రతిష్ఠాత్మక లడ్డూ వేలం పాట ప్రారంభం కానుంది. వేలం పాటను చూసేందుకు భారీగా భక్తులు తరలిరానుండటంతో పోలీసులు పటిష్ఠ బందోబస్తు ఏర్పాటు చేశారు. ఇప్పటికే 15 లక్షల మందికి పైగా భక్తులు బాలాపూర్ గణేష్ను దర్శించుకున్నట్లు నిర్వాహకులు తెలిపారు. గతేడాది లడ్డూ రూ.35 లక్షలకు వేలం కాగా.. ఈసారి ఎంత ధర పలుకుతుందనే దానిపై ఉత్కంఠ నెలకొంది.
-
బాలాపూర్ గణేష్ లడ్డూ వేలం పాటకు సర్వం సిద్ధం!
బాలాపూర్ గణేష్ లడ్డూ వేలం పాటకు సర్వం సిద్ధమైంది. ఈసారి ప్రతిష్ఠాత్మక లడ్డూను ఎవరు దక్కించుకుంటారనే అంశంపై ఉత్కంఠ నెలకొంది. ఉదయం బాలాపూర్ గణేష్కు ఉత్సవ సమితి సభ్యులు ప్రత్యేక పూజలు నిర్వహించారు. పూజల అనంతరం గ్రామంలో గణనాథుడి శోభాయాత్ర నిర్వహించేందుకు సర్వం సిద్దం చేశారు. అనంతరం గ్రామ బొడ్రాయి వద్ద బాలాపూర్ గణేష్ లడ్డూ వేలం పాట జరగనుంది. వేలం పాటను తిలకించేందుకు భారీగా భక్తులు తరలివచ్చే అవకాశం ఉంది. ఇప్పటికే బాలాపూర్ గణేష్ను 15 లక్షల మందికి పైగా భక్తులు దర్శించుకున్నట్లు నిర్వాహకులు తెలిపారు
-
పోలీసుల నిఘాలో శోభాయాత్ర
గణపతి శోభాయాత్ర మార్గంలో భక్తుల భారీ రద్దీ దృష్ట్యా పోలీసులు విస్తృత భద్రతా ఏర్పాట్లు చేశారు. కీలక ప్రాంతాల్లో బారికేడ్లు ఏర్పాటు చేయడంతో పాటు ట్రాఫిక్ను నియంత్రించేందుకు ప్రత్యేక చర్యలు చేపట్టారు. భక్తులకు ఎలాంటి ఇబ్బందులు తలెత్తకుండా అధికారులు సమన్వయంతో ఏర్పాట్లను పర్యవేక్షిస్తున్నారు.
-
-
మహాగణపతి శోభాయాత్రకు ఏర్పాట్లు పూర్తి
హైదరాబాద్లో ఖైరతాబాద్ మహాగణపతి శోభాయాత్రకు ఏర్పాట్లు పూర్తయ్యాయి. ఖైరతాబాద్ నుంచి ఎన్టీఆర్ మార్గ్ వైపు బడా గణేష్ శోభాయాత్ర సాగనుంది. మధ్యాహ్నం 12 గంటల సమయంలో మహాగణపతి సాగర్ తీరానికి చేరుకునేలా అధికారులు ఏర్పాట్లు చేశారు. నిమజ్జనం కోసం ప్రత్యేకంగా క్రేన్ నంబర్-4ను సిద్ధం చేశారు. మధ్యాహ్నం 1:30 గంటలలోపు మహాగణపతి నిమజ్జన ప్రక్రియను పూర్తి చేయాలని అధికారులు లక్ష్యంగా పెట్టుకున్నారు.
భాగ్యనగరంలో వినాయక నిమజ్జన మహోత్సవానికి అధికారులు అన్ని ఏర్పాట్లు పూర్తి చేశారు. సెప్టెంబర్ 25న నగరంలో భారీ శోభాయాత్ర జరగనున్న నేపథ్యంలో లక్షలాది మంది భక్తులు తరలిరానున్నారు. ఖైరతాబాద్ మహాగణపతితో పాటు వివిధ ప్రాంతాల నుంచి వచ్చే విగ్రహాల నిమజ్జనం కోసం హుస్సేన్సాగర్ పరిసరాల్లో ప్రత్యేక వేదికలు, క్రేన్లు, బారికేడ్లు, లైటింగ్, మొబైల్ టాయిలెట్లు, తాగునీటి సదుపాయాలు ఏర్పాటు చేశారు. హుస్సేన్సాగర్ వద్ద నిమజ్జన ప్రక్రియను వేగంగా పూర్తి చేసేందుకు అదనపు క్రేన్లను అందుబాటులో ఉంచారు.
భారీగా తరలివచ్చే భక్తుల కోసం పోలీసులు విస్తృత భద్రతా చర్యలు చేపట్టారు. నగరవ్యాప్తంగా 20 వేల మందికి పైగా పోలీసులను మోహరించగా.. 10 వేలకు పైగా సీసీ కెమెరాలు, డ్రోన్లతో నిఘా కొనసాగనుంది. కీలక ప్రాంతాల్లో బాంబ్ డిటెక్షన్ బృందాలు, ర్యాపిడ్ యాక్షన్ ఫోర్స్, సీఆర్పీఎఫ్ బలగాలను కూడా అందుబాటులో ఉంచారు.
భక్తుల రద్దీని దృష్టిలో ఉంచుకుని హైదరాబాద్ మెట్రో సేవలను పొడిగించారు. మరోవైపు ప్రధాన శోభాయాత్ర మార్గాల్లో ట్రాఫిక్ ఆంక్షలు అమల్లో ఉంటాయి. సెప్టెంబర్ 25 ఉదయం 6 గంటల నుంచి 26న ఉదయం 10 గంటల వరకు ప్రధాన మార్గాల్లో సాధారణ వాహనాల రాకపోకలపై ఆంక్షలు విధించారు. ప్రజలు వీలైనంత వరకు మెట్రో, ఆర్టీసీ, ఎంఎంటీఎస్ వంటి ప్రజా రవాణాను వినియోగించాలని అధికారులు సూచించారు.
మొత్తంగా.. భక్తుల భద్రత, తాగునీరు, వైద్య సదుపాయాలు, ట్రాఫిక్ నియంత్రణ, నిమజ్జన ప్రక్రియ సజావుగా సాగేందుకు అధికారులు సమన్వయంతో చర్యలు చేపట్టారు.
మరిన్ని ఆధ్యాత్మిక వార్తల కోసం ఇక్కడ క్లిక్ చేయండి..
Published On - Sep 25,2026 6:39 AM
