అంబర్‌పేట్ శంకర్‌పై మళ్లీ రౌడీషీట్.. బెదిరింపుల నేపథ్యంలో..?

నగరంలో బెదిరింపుల ఆరోపణలు ఎదుర్కొంటున్న చిన్నబోయిన శంకర్ అలియాస్ అంబర్‌పేట్ శంకర్‌‌పై పోలీసులు మళ్లీ రౌడీషీట్ తెరిచారు. గతంలో మూసివేసిన రౌడీషీట్‌ను తాజాగా నమోదైన కేసుల నేపథ్యంలో అంబర్‌పేట్ పోలీసులు తిరిగి తెరిచినట్లు తెలిపారు. శంకర్‌పై ఉన్న రౌడీషీట్‌ను 2019లో మూసివేశారు. అయితే ఇటీవల ఆయనపై నమోదైన కేసులను పరిగణనలోకి తీసుకుని రౌడీషీట్‌ను మళ్లీ రీ ఓపెన్ చేసినట్లు పోలీసులు వెల్లడించారు. ఇటీవల బిల్డర్ జి. అంజనేయులు ఇచ్చిన ఫిర్యాదు మేరకు బంజారాహిల్స్ పోలీసులు శంకర్‌తో పాటు మరో ఆరుగురిపై కేసు నమోదు చేశారు. సెటిల్‌మెంట్‌కు అంగీకరించాలంటూ తనపై ఒత్తిడి తెచ్చి బెదిరింపులకు పాల్పడ్డారని అంజనేయులు ఫిర్యాదులో పేర్కొన్నట్లు పోలీసులు తెలిపారు. సెటిల్‌మెంట్‌కు అంగీకరించకపోతే తీవ్ర పరిణామాలు ఎదుర్కోవాల్సి వస్తుందని తనను బెదిరించినట్లు బిల్డర్ ఆరోపించారు. అంతేకాకుండా తన కుటుంబ సభ్యులకు కూడా హాని చేస్తామని బెదిరింపులు వచ్చినట్లు పోలీసులకు ఫిర్యాదు చేసినట్లు సమాచారం.

బిల్డర్ ఫిర్యాదుతో బంజారాహిల్స్ పోలీసులు శంకర్ సహా ఏడుగురిపై కేసు నమోదు చేశారు. ప్రస్తుతం ఈ వ్యవహారంపై పోలీసులు దర్యాప్తు చేస్తున్నారు. అసలు వివాదం ఏమిటి? సెటిల్‌మెంట్ విషయంలో ఎలాంటి పరిణామాలు చోటుచేసుకున్నాయి? బెదిరింపుల ఆరోపణల్లో వాస్తవమెంత? అనే అంశాలపై పోలీసులు విచారణ కొనసాగిస్తున్నారు. మేడిపల్లి పోలీస్‌ స్టేషన్ పరిధిలో కూడా ఓ బెదిరింపు కేసు నమోదయినట్లు సమాచారం. తాజా కేసుల నేపథ్యంలోనే అంబర్‌పేట్ శంకర్‌పై గతంలో మూసివేసిన రౌడీషీట్‌ను తిరిగి తెరిచినట్లు పోలీసులు తెలిపారు. ఈ కేసులో దర్యాప్తు కొనసాగుతోంది.