పెద్ద ఫ్యామిలీల కోసం Hyundai నెక్స్ట్ జనరేషన్ SUV.. టెక్నాలజీలో కూడా బెస్ట్
భారతీయ SUV మార్కెట్లో Hyundai Cretaకు ఉన్న ఆదరణ గురించి ప్రత్యేకంగా చెప్పాల్సిన అవసరం లేదు. ఈ పాపులర్ మోడల్‌ను మరింత ఆధునికంగా తీర్చిదిద్దేందుకు హ్యుందాయ్ సంస్థ సిద్ధమవుతున్నట్లు తెలుస్తోంది. మీడియాలో వస్తున్న నివేదికల ప్రకారం, త్వరలో రానున్న నెక్స్ట్ జనరేషన్ Cretaతో పాటు 7-సీటర్ వెర్షన్‌ను కూడా మార్కెట్లోకి తీసుకురావాలని కంపెనీ భావిస్తోంది. ఈ మోడల్ అందుబాటులోకి వస్తే పెద్ద కుటుంబాలతో ప్రయాణించే వారికి మరో SUV ఎంపిక లభిస్తుంది. ప్రస్తుతం 5-సీటర్ విభాగంలో కొనసాగుతున్న క్రెటా.. కొత్త వెర్షన్‌తో మరింత విస్తృతమైన కస్టమర్లను ఆకర్షించే అవకాశం ఉంది.
Updated on: Nov 01, 2026 | 8:00 PM
ప్రస్తుతం థర్డ్ జనరేషన్ Hyundai Creta అభివృద్ధి పనులు వేగంగా జరుగుతున్నట్లు సమాచారం. ఈ కొత్త SUVకి కంపెనీ SX3 అనే కోడ్‌నేమ్‌ను కేటాయించినట్లు తెలుస్తోంది. భారతీయ రోడ్లపై ఇప్పటికే టెస్టింగ్ నిర్వహిస్తున్నట్లు వార్తలు వస్తున్నాయి. కొత్త తరం మోడల్‌లో డిజైన్, ప్లాట్‌ఫామ్, ఇంటీరియర్ స్పేస్ పరంగా గణనీయమైన మార్పులు ఉండవచ్చని అంచనా. ముఖ్యంగా 5-సీటర్, 7-సీటర్ కాన్ఫిగరేషన్లలో అందుబాటులోకి తీసుకురావచ్చనే సమాచారం ఆసక్తిని పెంచుతోంది.
కొత్త K3 ప్లాట్‌ఫామ్‌పై క్రెటా..
కొత్త జనరేషన్ Cretaలో Hyundai సంస్థ K3 ప్లాట్‌ఫామ్‌ను ఉపయోగించనున్నట్లు నివేదికలు చెబుతున్నాయి. ఇదే ప్లాట్‌ఫామ్‌పై కొత్త తరం Kia Seltosను కూడా రూపొందించారు. దీంతో ప్రస్తుత మోడల్‌తో పోలిస్తే కొత్త క్రెటా వీల్‌బేస్ పెరిగే అవకాశం ఉంది. ఫలితంగా క్యాబిన్‌లో ఎక్కువ స్థలం లభించడంతో పాటు SUV మొత్తం పరిమాణంలోనూ మార్పులు ఉండవచ్చని అంచనా. 7-సీటర్ వెర్షన్ డిజైన్ ప్రస్తుత క్రెటాను పోలి ఉన్నప్పటికీ, ముందు, వెనుక భాగాల్లో ప్రత్యేకమైన మార్పులు చేయనున్నట్లు సమాచారం. దీనివల్ల రెండు వెర్షన్ల మధ్య స్పష్టమైన డిజైన్ తేడాలు కనిపించవచ్చు.
స్ట్రాంగ్ హైబ్రిడ్ ఛాన్స్!
ఇంజిన్ ఆప్షన్ల విషయానికి వస్తే కొత్త Cretaలో 1.5 లీటర్ టర్బో పెట్రోల్, 1.5 లీటర్ డీజిల్ ఇంజిన్లు అందించే అవకాశం ఉంది. ప్రస్తుతం Hyundai Alcazarలోనూ ఈ ఇంజిన్ ఆప్షన్లు అందుబాటులో ఉన్నాయి. మరోవైపు, హైబ్రిడ్ వాహనాలపై కంపెనీ దృష్టి పెడుతున్న నేపథ్యంలో కొత్త క్రెటాలో Strong Hybrid టెక్నాలజీని తీసుకొచ్చే అంశాన్ని కూడా పరిశీలిస్తున్నట్లు సమాచారం. అయితే దీనిపై ఇప్పటివరకు అధికారిక ప్రకటన వెలువడలేదు.
మార్కెట్లోకి వచ్చిన తర్వాత 7-సీటర్ Creta, Mahindra Scorpio-N, Tata Safari, MG Hector వంటి SUVలతో పోటీ పడే అవకాశం ఉంది. అయితే ఈ కొత్త మోడల్ విడుదల తేదీ, ధర, పూర్తి ఫీచర్ల వివరాలను హ్యుందాయ్ ఇంకా వెల్లడించలేదు. కంపెనీ నుంచి అధికారిక ప్రకటన వచ్చిన తర్వాతే ఈ SUVకి సంబంధించిన మరిన్ని వివరాలపై స్పష్టత రానుంది.
