యాపిల్‌ ప్రియులకు బ్యాడ్‌న్యూస్‌.. ఆ డివైజ్‌కు గుడ్‌బై చెప్పేసిన కంపెనీ!

టెక్ దిగ్గజం యాపిల్‌ తన అత్యంత శక్తివంతమైన డెస్క్‌టాప్‌లలో ఒకటైన మ్యాక్‌ ప్రోను అధికారికంగా వెబ్‌సైట్ నుంచి తొలగించింది. ఎలాంటి అధికారిక కార్యక్రమం లేకుండా, పెద్ద ప్రకటనలు లేకుండా తీసుకున్న ఈ నిర్ణయం కంపెనీ భవిష్యత్ వ్యూహంపై స్పష్టమైన సంకేతంగా మారింది. సమాచారం ప్రకారం భవిష్యత్తులో కొత్త మ్యాక్ ప్రో మోడల్‌ను విడుదల చేసే ప్రణాళికలు లేవని ఆపిల్ ధృవీకరించింది. ఒకప్పుడు ప్రొఫెషనల్ వర్క్‌స్టేషన్‌లలో అగ్రస్థానంలో నిలిచిన ఈ పరికరం, ఇప్పుడు కంపెనీ ఉత్పత్తుల జాబితా నుంచి పూర్తిగా తప్పుకుంది.

వీడియో ఎడిటింగ్, గ్రాఫిక్ డిజైన్, సాఫ్ట్‌వేర్ డెవలప్‌మెంట్ వంటి అధిక పనితీరు అవసరాల కోసం మ్యాక్ ప్రో ప్రధానంగా ఉపయోగించబడేది. 2019లో విడుదలైన చీజ్ గ్రేటర్ డిజైన్‌తో వచ్చిన వెర్షన్ ప్రొఫెషనల్స్‌ను మళ్లీ ఆకర్షించింది. అధిక శక్తి, అప్‌గ్రేడ్ అవకాశాలు, విస్తృత సామర్థ్యంతో అది ప్రత్యేక గుర్తింపు పొందింది. తర్వాతి కాలంలో ఆపిల్ తన స్వంత చిప్‌లపై దృష్టి పెట్టడంతో పరిస్థితి మారింది. కంప్యూటర్లు మరింత వేగవంతంగా, తక్కువ శబ్దంతో, కాంపాక్ట్ డిజైన్‌లోకి మారాయి. ఈ మార్పులో మ్యాక్ ప్రో ప్రాధాన్యం క్రమంగా తగ్గింది. 2023లో M2 Ultra చిప్‌తో అప్‌డేట్ చేసినప్పటికీ, అది పెద్దగా ఆకర్షణీయంగా నిలవలేకపోయింది.

ఈ సమయంలో మ్యాక్‌ స్టూడియో ప్రాముఖ్యత పెరిగింది. చిన్న పరిమాణంలో ఉన్నప్పటికీ, అధిక పనితీరు అందించే ఈ పరికరం చాలా మంది నిపుణులకు సరైన ప్రత్యామ్నాయంగా మారింది. కొత్త చిప్‌లతో ఇది భారీ పనులను సులభంగా నిర్వహించగలదు. ప్రస్తుతం ఆపిల్ డెస్క్‌టాప్ లైనప్ మరింత క్లియర్‌గా ఉంది. రోజువారీ వినియోగానికి iMac, కాంపాక్ట్ అవసరాలకు Mac mini, అధిక పనితీరు కోసం Mac Studio అందుబాటులో ఉన్నాయి. ల్యాప్‌టాప్ విభాగంలో MacBook Air, MacBook Pro వంటి ఎంపికలు వినియోగదారుల అవసరాలను తీర్చుతున్నాయి. మ్యాక్ ప్రో కేవలం ఒక కంప్యూటర్ మాత్రమే కాదు, అధిక స్వేచ్ఛ, అప్‌గ్రేడ్ సామర్థ్యం, ప్రొఫెషనల్ వర్క్‌ఫ్లోకు ప్రతీకగా నిలిచింది. అయితే సాంకేతిక మార్పులు, వినియోగదారుల అవసరాల్లో మార్పులు దాని ప్రాధాన్యాన్ని తగ్గించాయి. దీంతో ఒక ప్రఖ్యాత వర్క్‌స్టేషన్ యుగానికి అధికారికంగా ముగింపు పలికినట్లైంది.

మరిన్ని టెక్‌ వార్తల కోసం ఇక్కడ క్లిక్‌ చేయండి