నేవిగేషన్ కోసమే గూగుల్ మ్యాప్స్ వాడుతున్నారా? ఈ పనులు కూడా చేయొచ్చని తెలుసా
Google Maps.. సాధారణంగా ఎవరికైనా తెలియని ప్రాంతాలకు వెళ్లవలసి వస్తే వెంటనే గుర్తువచ్చే పేరు డిజిటల్ నావిగేషన్ యాప్. కేవలం దారి చూపడానికి మాత్రమే పరిమితమైన ఆ అప్లికేషన్ ఇప్పుడు సరికొత్త కృత్రిమ మేధస్సు అప్డేట్తో సరికొత్త రూపం సంతరించుకుంది. గమ్యస్థానాలను చేరవేయడమే కాకుండా దైనందిన అవసరాలను సులభంగా తీర్చే అద్భుతమైన ఫీచర్లను అందించడానికి సిద్ధమైంది.
స్మార్ట్ఫోన్ వినియోగదారులు నిత్యం వాడే ప్రముఖ మ్యాపింగ్ యాప్లో ఊహించని మార్పులు రాబోతున్నాయి. కేవలం లొకేషన్లు వెతకడం కోసమే కాకుండా వివిధ రకాల సేవలను నేరుగా పొందడానికి వీలుగా సరికొత్త అప్డేట్ను ప్రవేశపెట్టారు. దారి వెతుక్కోవడంతో పాటు మనకు కావలసిన వంటకాలను తెప్పించుకోవడం వంటి పనులను ఇది చాలా సులువుగా మారుస్తుంది.
ఆస్క్ మ్యాప్స్ సేవలు
టెక్నాలజీ రంగంలో వస్తున్న మార్పులకు అనుగుణంగా ప్రముఖ సంస్థ తన మ్యాపింగ్ యాప్లో సరికొత్త అనుభూతిని అందిస్తోంది. గతంలో ఎన్నడూ లేని విధంగా కృత్రిమ మేధస్సు ఆధారిత సేవలు వినియోగదారులకు అందుబాటులోకి వస్తున్నాయి. ఆఫీసు నుంచి ఇంటికి వెళ్లే సమయంలో ఇష్టమైన అల్పాహారాన్ని కోరుకుంటే వేరే అప్లికేషన్లను తెరవాల్సిన అవసరం లేకుండానే నేరుగా ఆర్డర్ చేసుకోవచ్చు.
ప్రయాణ మార్గంలో ఉన్న ఉత్తమమైన రెస్టారెంట్లను ఎంచుకుని అక్కడికక్కడే చెల్లింపులు పూర్తి చేసే వెసులుబాటు లభిస్తుంది. అంతేకాకుండా జీమెయిల్ ఖాతాతో అనుసంధానం కావడం ద్వారా ప్రయాణ వివరాలు, ఫ్లైట్ బుకింగ్స్, హోటల్ రిజర్వేషన్ సమాచారం అంతా ఒకే చోట లభిస్తుంది. ఎలాంటి ఇబ్బంది లేకుండా ఒక వ్యక్తిగత గైడ్ లాగా వ్యవహరిస్తూ పనులన్నీ సులభతరం చేస్తుంది.
ట్రాఫిక్ అప్డేట్లు
ప్రయాణికుల సౌలభ్యం కోసం బస్సులు, రైళ్లు, మెట్రో రైళ్ల కచ్చితమైన సమయాలతో పాటు ఆలస్యానికి సంబంధించిన వివరాలను లైవ్ విడ్జెట్ ద్వారా తెలుసుకోవచ్చు. వినియోగదారులు కూడా నేరుగా షాపుల బోర్డులను ఫొటోలు తీసి అప్డేట్ చేయడం ద్వారా సమాచారాన్ని ఇతరులతో పంచుకోవచ్చు. హోటల్ గదుల ఎంపిక నుంచి స్థానిక ఈవెంట్ల టికెట్ల బుకింగ్ వరకు అన్ని సేవలు ఒకే వేదికపై దొరుకుతాయి. బడ్జెట్ తగినట్లుగా నగరంలోని ప్రసిద్ధ ప్రాంతాలను పోల్చి చూసే సదుపాయం కూడా ఇందులో ఉంటుంది. మొత్తానికి ఈ అప్డేట్ ద్వారా కేవలం మార్గదర్శిగా మాత్రమే కాకుండా అత్యంత ఉపయోగకరమైన డిజిటల్ అసిస్టెంట్లా మారుతుంది.