మీ ఆరోగ్య సమస్యలను AIతో పంచుకుంటున్నారా? అది ఎంత డేంజర్ అంటే..?
AI చాట్బాట్ల ద్వారా ఆరోగ్య సమస్యలకు సలహాలు తీసుకోవడం అత్యంత ప్రమాదకరమని ఆక్స్ఫర్డ్ విశ్వవిద్యాలయ అధ్యయనం హెచ్చరిస్తోంది. ఇది వేగవంతమైన మార్గంగా అనిపించినా, AI తరచుగా తప్పుడు రోగనిర్ధారణలు ఇచ్చి, అత్యవసర వైద్య సహాయాన్ని గుర్తించడంలో విఫలమవుతుంది. నిజమైన వైద్యులకు AI ఎప్పటికీ ప్రత్యామ్నాయం కాదని నిపుణులు స్పష్టం చేస్తున్నారు.
AI ఎలాంటి సంచలనాలు సృష్టిస్తుందో నిత్యం ప్రత్యక్షంగా చూస్తున్నాం. ఏది నిజమో ఏది అబద్ధమో తెలుసుకోవడం కష్టంగా మారింది. అయితే AIని సరిగ్గా వాడితే ఎన్ని ఉపయోగాలు ఉన్నాయో.. తేడాగా వాడితే అన్నే దారుణాలు కూడా జరగొచ్చు. ఈ మధ్య కాలంలో చాలా మంది AIతో చేస్తున్న పొరపాట్లు ఏంటంటే.. తమ ఆరోగ్య సమస్యల గురించి AI చాట్బాట్తో పంచుకుంటున్నారు. నాకు ఈ సమస్య ఉంది, ఏం చేయమంటావ్? అంటూ అడుగుతున్నారు. అలా చేయడం చాలా ప్రమాదకరమని నిపుణులు హెచ్చరిస్తున్నారు.
మీ ఆరోగ్య సమ్యసలను AI చాట్బాట్లో టైప్ చేయడం, సమస్య గురించి పూర్తిగా తెలుసుకోవడానికి వేగవంతమైన మార్గంగా అనిపించవచ్చు కానీ కొత్త పరిశోధన ప్రకారం ఇది ప్రమాదకరం అని తేలింది. ఆక్స్ఫర్డ్ విశ్వవిద్యాలయ శాస్త్రవేత్తలు నాయకత్వం వహించిన ఈ అధ్యాయనంలో ఆక్స్ఫర్డ్ ఇంటర్నెట్ ఇన్స్టిట్యూట్, నఫీల్డ్ డిపార్ట్మెంట్ ఆఫ్ ప్రైమరీ కేర్ హెల్త్ సైన్సెస్ బృందాలు కూడా పాల్గొన్నాయి. డాక్టర్ను AI రీప్లేస్ చేయలేదని ఆ అధ్యాయనం స్పష్టంగా పేర్కొంటోంది.
రోగులు తమ లక్షణాల గురించి బిగ్ లాంగ్వేజ్పై ఆధారపడటం ప్రమాదకరమని తెలుసుకోవాలని ఈ అధ్యయనం సహ రచయిత, జనరల్ ప్రాక్టీషనర్ డాక్టర్ రెబెక్కా పేన్ అన్నారు. AI వ్యవస్థలు తప్పుడు రోగ నిర్ధారణలను ఇవ్వగలవని, అత్యవసర వైద్య సహాయం అవసరమైనప్పుడు గుర్తించడంలో విఫలమవుతాయని ఆమె హెచ్చరించారు. తీవ్రమైన తలనొప్పి నుండి ప్రసవానంతర అలసట వరకు వివిధ ఆరోగ్య పరిస్థితులను అంచనా వేయమని, వారికి ఏ పరిస్థితి ఉండవచ్చు, ఏ చర్య తీసుకోవాలో నిర్ణయించమని పరిశోధకులు దాదాపు 1,300 మంది పాల్గొనేవారిని కోరారు. కొంతమంది పాల్గొనేవారు AI చాట్బాట్లను ఉపయోగించగా, మరికొందరు GPని సంప్రదించడం వంటి సాంప్రదాయ మార్గాలపై ఆధారపడ్డారు.
ఫలితాలు ఇబ్బందికరంగా ఉన్నాయి. AIని ఉపయోగించే వ్యక్తులకు తరచుగా మంచి, చెడు సమాచారాన్ని కలిపి ఇచ్చేవారు. తేడాను చెప్పడంలో ఇబ్బంది పడ్డారు. చాట్బాట్లు ప్రామాణిక వైద్య జ్ఞాన పరీక్షలలో బాగా రాణించినప్పటికీ, వాస్తవ ప్రపంచంలో గందరగోళంగా ఉన్న మానవ ఆరోగ్య సమస్యలను ఎదుర్కొన్నప్పుడు అవి తడబడ్డాయి.
మరిన్ని టెక్ వార్తల కోసం ఇక్కడ క్లిక్ చేయండి