నిత్యానంద దేశంపై అశ్విన్ ఫన్నీ సెటైర్..చూడాల్సిందే సుమీ..!

అమ్మాయిల కిడ్నాప్ సహా పలు  ఆరోపణలు ఎదుర్కొంటున్న వివాదాస్పద మత గురువు నిత్యానంద దేశం విడిచి పారిపోయిన విషయం తెలిసిందే. నిత్యానందపై గుజరాత్ పోలీసులు బ్లూ కార్నర్ నోటీసులు కూడా జారీ చేశారు. ఈ నేపథ్యంలో సదరు స్వామివారు అనూహ్యంగా  ఈక్వెడార్‌లో  తేలారు. అక్కడ ఓ ద్వీపాన్ని కొని, దానికి ‘కైలాస’ అనే ప్రత్యేక దేశంగా నామకరణం చేశాడు. ఈ ద్వీపం ట్రినిడాడ్‌ అండ్‌ టొబాగోకు దగ్గర్లో ఉంది. అంతేనా ఆ దేశానికి జెండాను, ఎజెండాను కూడా రూపొందించారు. ఇక ప్రభుత్వంతో పాటు రాష్ట్రపతిని, ప్రధానమంత్రిని, కేబినెట్‌ను కూడా ఖరారు చేశారు. ‘కైలాస’ రాజకీయేతర హిందూ దేశమని, తమను ప్రత్యేక దేశంగా గుర్తించాల్సిందిగా త్వరలోనే ఐరాసను కోరనున్నారట నిత్యానంద.

కాగా ఈ విషయంపై భారత క్రికెట్ ఆటగాడు అశ్విన్, నిత్యానందకు తనదైన శైలిలో చురకలంటించాడు. అక్కడికి రావాలంటే వీసా ఎలా పొందాలని ట్విట్టర్ వేదికగా పశ్నించాడు. లేదా వీసా ఆన్ అరైవల్ ఏమైనా ఇవ్వబోతున్నారా అంటూ ఫన్నీగా కౌంటరిచ్చారు. ఆ ట్వీట్ ఇప్పుడు సోషల్ మీడియాలో తెగ చక్కర్లు కొడుతోంది.