Virat Kohli: సచిన్, ధోనీ కాదు.. కింగ్ కోహ్లీ దృష్టిలో బెస్ట్ వన్డే బ్యాటర్ ఎవరంటే?
Virat Kohli: విరాట్ కోహ్లీ తన డ్రీమ్ వన్డే బ్యాటర్ను రూపొందిస్తూ సచిన్ టెండూల్కర్, కుమార సంగక్కర, రాహుల్ ద్రావిడ్, వీరేంద్ర సెహ్వాగ్, మాథ్యూ హెడెన్, క్రిస్ గేల్, ఏబీ డివిలియర్స్లను ఎంపిక చేశారు. ప్రతి ప్రత్యేక షాట్కు ఒక్కో దిగ్గజాన్ని ఎంచుకున్న కోహ్లీ, తనను తాను, ఎంఎస్ ధోనీని మాత్రం ఎంపిక చేయకపోవడం ఆసక్తికరంగా మారింది.
Virat Kohli: క్రికెట్ ప్రపంచంలో రన్ మిషన్గా, రికార్డుల రారాజుగా పేరుగాంచిన విరాట్ కోహ్లీ తనదైన శైలిలో బ్యాటింగ్ రికార్డులను తిరగరాస్తూనే ఉన్నాడు. వన్డే క్రికెట్లో అత్యధిక సెంచరీలు బాదిన రికార్డుతో పాటు అత్యంత వేగంగా 15 వేల పరుగులు పూర్తి చేసిన చరిత్ర కోహ్లీ సొంతం. అయితే ఈ స్టార్ క్రికెటర్ తాజాగా ఒక ప్రత్యేక ఇంటర్వ్యూలో ప్రపంచ క్రికెట్లోని వివిధ దిగ్గజ ఆటగాళ్ల ప్రత్యేక షాట్లను ఎంచుకుంటూ తన కలల వన్డే బ్యాటర్ను తయారు చేశాడు. ఆశ్చర్యకరంగా ఈ జాబితాలో తనను తాను స్వయంగా ఎంచుకోకపోగా, భారత మాజీ కెప్టెన్ ఎంఎస్ ధోనీకి కూడా చోటు దక్కలేదు.
స్టార్ స్పోర్ట్స్ వేదికగా జరిగిన ఈ కార్యక్రమంలో 37 ఏళ్ల విరాట్ కోహ్లీ ప్రపంచ నలుమూలల నుంచి బెస్ట్ షాట్లు ఆడే ఏడుగురు దిగ్గజాలను సెలక్ట్ చేసుకున్నాడు. చేసుకున్నాడు. క్రికెట్ మైదానంలో ప్రతి షాట్కు ఒక ప్రత్యేకమైన మాస్టర్ ఉంటుందని భావించిన కోహ్లీ, వారి ప్రతిభను మిళితం చేసి ఒక పరిపూర్ణమైన బ్యాటర్ను ఊహించాడు. లెజెండరీ ఆటగాళ్ల పేర్లను ప్రకటిస్తూ అతను చెప్పిన వివరాలు ప్రస్తుతం సోషల్ మీడియాలో విపరీతంగా వైరల్ అవుతున్నాయి.
ఈ జాబితాలో మొట్టమొదటిదైన అద్భుతమైన స్ట్రైట్ డ్రైవ్ షాట్ కోసం ఎలాంటి తటపటాయింపు లేకుండా క్రికెట్ దేవుడు సచిన్ టెండూల్కర్ను కోహ్లీ ఎంచుకున్నాడు. ఇక కవర్ డ్రైవ్ షాట్ కోసం శ్రీలంక మాజీ కెప్టెన్ కుమార సంగక్కరను, క్లాసికల్ ఫ్లిక్ షాట్ కోసం భారత్ నమ్మదగిన బ్యాటర్ రాహుల్ ద్రావిడ్ను ఎంపిక చేశాడు. అలాగే పవర్ఫుల్ కట్ షాట్ కోసం వీరేంద్ర సెహ్వాగ్ పేరును ఖరారు చేశాడు.
Who makes the ultimate ODI batter? 🧐
#ViratKohli builds his ultimate ODI batter shot by shot, and his picks are pure class! 👑👌
WATCH #INDvWI | 2nd ODI 👉 WED, 30th SEP, 1 PM https://t.co/vkXDcl5i9L
— Star Sports (@StarSportsIndia) September 28, 2026
స్వీప్ షాట్ కోసం ఆటగాడిని ఎంచుకోవడానికి కోహ్లీకి కొద్ది క్షణాలు పట్టింది. ఇది చాలా కష్టమైన నిర్ణయమని పేర్కొంటూ ఆస్ట్రేలియా విధ్వంసకర మాజీ బ్యాటర్ మాథ్యూ హెడెన్కు ఆ స్థానాన్ని కేటాయించాడు. ఇక లాంగ్ సిక్సర్లు బాదే సామర్థ్యం కోసం బౌలర్ల గుండెల్లో రైళ్లు పరిగెత్తించే వెస్టిండీస్ హిట్టర్ క్రిస్ గేల్ను ఎంపిక చేశాడు. క్రిస్ గేల్ ఐపీఎల్లో రాయల్ ఛాలెంజర్స్ బెంగళూరు తరఫున కోహ్లీతో కలిసి సుదీర్ఘకాలం ఆడిన అనుభవం ఉన్న సంగతి తెలిసిందే.
ఈ సెలక్షన్లో అందరినీ ఆశ్చర్యపరిచిన అంశం ఏమిటంటే వికెట్ల మధ్య వేగంగా పరుగెత్తే విషయంలో ఎంఎస్ ధోనీ పేరును కోహ్లీ పరిశీలించకపోవడం. ధోనీ రన్నింగ్ బిట్వీన్ ది వికెట్స్లో ఎంతటి నిపుణుడో అందరికీ తెలిసిందే. అయితే ధోనీకి బదులుగా తన స్నేహితుడు, ఆర్సీబీ మాజీ సహచరుడు ఏబీ డివిలియర్స్ను వికెట్ల మధ్య వేగంగా పరుగెత్తే బెస్ట్ ప్లేయర్ గా కోహ్లీ ఎంచుకున్నాడు. సౌతాఫ్రికా దిగ్గజం డివిలియర్స్ అసాధారణ ప్రతిభే ఇందుకు కారణమని చెప్పాడు.
ప్రస్తుతం వెస్టిండీస్తో జరుగుతున్న వన్డే సిరీస్లో కోహ్లీ అద్భుతమైన ఫామ్లో కొనసాగుతున్నాడు. తిరువనంతపురంలో జరిగిన తొలి వన్డేలో కేవలం 88 బంతుల్లోనే అజేయంగా 139 పరుగులు సాధించి తన 55వ వన్డే సెంచరీ నమోదు చేశాడు. భారత్లో 7000 వన్డే పరుగులు పూర్తి చేసుకున్న కోహ్లీ, గౌహతి వేదికగా జరగనున్న రెండో వన్డే మ్యాచ్లో కూడా తన జోరును కొనసాగించడానికి సిద్ధమవుతున్నాడు.
మరిన్ని క్రీడా వార్తల కోసం ఇక్కడ క్లిక్ చేయండి..