ENG vs PAK: అదో పనికి రాని చెత్త టీమ్.. పాకిస్థాన్‌పై ఇంగ్లాండ్ దిగ్గజం నోటిదురద

ENG vs PAK: ఇంగ్లాండ్, పాకిస్థాన్ మధ్య లీడ్స్ వేదికగా మూడు మ్యాచ్‌ల టెస్ట్ సిరీస్ నేటి నుంచే ప్రారంభం కాబోతోంది. ఈ ముఖ్యమైన మ్యాచ్ ప్రారంభానికి కొద్ది గంటల ముందే ఇంగ్లాండ్ మాజీ పేసర్ స్టువర్ట్ బ్రాడ్ నోటికి పని చెప్పాడు. రిటైర్మెంట్ తర్వాత వ్యాఖ్యాతగా, స్పోర్ట్స్ ప్రెజెంటర్‌గా వ్యవహరిస్తున్న బ్రాడ్, ఒక పాడ్‌కాస్ట్ చర్చలో పాల్గొంటూ పాకిస్థాన్ క్రికెట్ జట్టు స్థాయిని దారుణంగా తగ్గించి మాట్లాడాడు. ప్రస్తుత పాక్ పేస్ విభాగం అత్యంత బలహీనంగా ఉందంటూ తీవ్రమైన వ్యాఖ్యలు చేశాడు.

అదొక వర్స్ట్ టీమ్.. క్లీన్ స్వీప్ ఖాయం

పాడ్‌కాస్ట్‌లో బ్రాడ్ మాట్లాడుతూ.. “పాకిస్థాన్ జట్టులో ఏమాత్రం సత్తా లేదు. అది ఒక పనికిరాని టీమ్. 36 ఏళ్ల వయసున్న మహమ్మద్ అబ్బాస్‌ను మళ్లీ జట్టులోకి తెచ్చుకున్నారంటేనే వారి పరిస్థితి ఎంత దారుణంగా ఉందో అర్థం చేసుకోవచ్చు. ఇంగ్లాండ్ ఈ సిరీస్‌ను చాలా తేలికగా 3-0తో సొంతం చేసుకుంటుంది” అని విమర్శలు గుప్పించాడు. అయితే, జట్టులోకి రీ-ఎంట్రీ ఇచ్చిన అబ్బాస్ చివరి 3 మ్యాచుల్లో 18 వికెట్లు తీసి అద్భుత ఫామ్‌లో ఉన్న విషయాన్ని బ్రాడ్ ఏమాత్రం పరిగణనలోకి తీసుకోకపోవడం గమనార్హం.

మూడు దశాబ్దాల ఓటమి చరిత్ర

పాకిస్థాన్‌పై బ్రాడ్ ఈ స్థాయిలో విరుచుకుపడటానికి ఒక చారిత్రక నేపథ్యం కూడా ఉంది. ఇంగ్లాండ్ గడ్డపై పాకిస్థాన్ చివరిసారిగా 1996లో టెస్ట్ సిరీస్ గెలిచింది. ఆ తర్వాత దాదాపు ముప్పై ఏళ్లు గడుస్తున్నా బ్రిటన్ నేలపై పాక్ ఒక్క టెస్ట్ సిరీస్ కూడా గెలవలేకపోయింది. ఇటీవల సొంతగడ్డపై వెస్టిండీస్‌తో సిరీస్‌ను సైతం సమం చేసుకున్న పాక్, ఇంగ్లాండ్‌ను వారి స్వదేశంలో ఎదుర్కొని నిలవడం దాదాపు అసాధ్యమని క్రికెట్ విశ్లేషకులు భావిస్తున్నారు.

తొలి టెస్టుకు బాబర్ ఆజమ్ దూరం

ఇప్పటికే తీవ్ర ఒత్తిడిలో ఉన్న పాకిస్థాన్‌కు మ్యాచ్ ప్రారంభానికి ముందే కోలుకోలేని షాక్ తగిలింది. ప్రాక్టీస్ మ్యాచ్ సమయంలో కుడిచేతికి గాయం కావడంతో కెప్టెన్ బాబర్ ఆజమ్ తొలి టెస్టుకు దూరమయ్యాడు. కొన్ని వారాల కిందే షాన్ మసూద్ స్థానంలో మళ్లీ టెస్టు సారథ్య బాధ్యతలు చేపట్టిన బాబర్ లేకపోవడం పాక్ బ్యాటింగ్ విభాగానికి పెద్ద ప్రతిబంధకం. లార్డ్స్‌లో జరిగే రెండో టెస్టు సమయానికి బాబర్ కోలుకుంటాడని హెడ్ కోచ్ సర్ఫరాజ్ ఖాన్ ఆశాభావం వ్యక్తం చేశాడు.

మరిన్ని క్రికెట్‌ వార్తల కోసం ఇక్కడ క్లిక్‌ చేయండి..