ఒకే రోజు 2 కీలక మార్పులు.. కెప్టెన్గా మాజీ ప్లేయర్ రీఎంట్రీ.. కోచ్గా ధోని దోస్త్కి బంఫర్ ఆఫర్
England Test Coach and Test Captain: స్టీఫెన్ ఫ్లెమింగ్ కోచింగ్ నైపుణ్యం, జో రూట్ అనుభవజ్ఞులైన సారథ్యం ఇంగ్లాండ్ టెస్టు క్రికెట్ను పునర్నిర్మించడంలో కీలక పాత్ర పోషించనున్నాయి. ఈ కొత్త ద్వయం ప్రపంచ టెస్టు ఛాంపియన్షిప్లో ఎలాంటి సంచలనాలు సృష్టిస్తుందో రాబోయే రోజుల్లో తేలనుంది.
England Test Coach and Test Captain: వరల్డ్ క్రికెట్లో ఊహించని రీతిలో భారీ మార్పు చోటుచేసుకుంది! ఇంగ్లాండ్ పురుషుల టెస్టు జట్టు నయా ప్రధాన కోచ్గా చెన్నై సూపర్ కింగ్స్ మాజీ కోచ్ స్టీఫెన్ ఫ్లెమింగ్ బాధ్యతలు స్వీకరించనున్నారు. మరోవైపు 2022లో పగ్గాలు వదిలేసిన స్టార్ బ్యాటర్ జో రూట్ మళ్లీ ఇంగ్లాండ్ టెస్టు కెప్టెన్గా తిరిగి రావడం క్రికెట్ వర్గాల్లో తీవ్ర చర్చనీయాంశంగా మారింది.
ఐపీఎల్లో చెన్నై సూపర్ కింగ్స్ జట్టుకు సుదీర్ఘకాలం పాటు అద్భుతమైన సేవలు అందించిన న్యూజిలాండ్ దిగ్గజం స్టీఫెన్ ఫ్లెమింగ్, ఇప్పుడు ఇంగ్లాండ్ రెడ్ బాల్ క్రికెట్ రూపురేఖలను మార్చేందుకు సిద్ధమయ్యారు. ఈ నెల ప్రారంభంలోనే సీఎస్కేతో తన 18 ఏళ్ల ప్రయాణానికి వీడ్కోలు పలికిన ఆయన, ఇంగ్లాండ్ అండ్ వేల్స్ క్రికెట్ బోర్డుతో (ECB) ప్రతిష్టాత్మకమైన నాలుగు సంవత్సరాల కాంట్రాక్ట్పై సంతకం చేశారు. సెప్టెంబర్ 2030 వరకు ఫ్లెమింగ్ ఈ పదవిలో కొనసాగనున్నారు. న్యూజిలాండ్ జట్టుకు అత్యంత విజయవంతమైన కెప్టెన్గా పేరుగాంచిన ఆయనకు ఇంగ్లాండ్ కౌంటీ క్రికెట్లో కాటిన్యా పట్ల అవగాహన, మిడిల్సెక్స్, యార్క్షైర్, నాటింగ్హామ్షైర్ జట్లతో ఆడిన అనుభవం ఎంతగానో ఉపయోగపడనుంది.
ఇదికూడా చదవండి: తొలుత 175 పరుగులు, ఆ తర్వాత 9 వికెట్లు.. లంకను దహనం చేసిన టీమిండియా తోపు
కెప్టెన్గా తిరిగి రూట్ జోరు..
మరో రసవత్తరమైన మలుపు ఏంటంటే, స్టార్ బ్యాటర్ జో రూట్ మరోసారి కెప్టెన్సీ బాధ్యతలను స్వీకరించడమే! 2017 నుంచి 2022 మధ్య ఇంగ్లాండ్ను 65 టెస్టుల్లో నడిపించి, అత్యధికంగా 27 విజయాలు అందించిన రికార్డు రూట్ సొంతం. నాటి సారథ్య భారంతో బ్యాటింగ్పై దృష్టి పెట్టేందుకు కెప్టెన్సీని వదులుకున్న రూట్, ఇప్పుడు సరికొత్త ఉత్సాహంతో మళ్లీ జట్టును నడిపించేందుకు సుముఖత వ్యక్తం చేశారు. ఫ్లెమింగ్ అనుభవం, రూట్ నాయకత్వ పటిమ కలసి ఇంగ్లాండ్ జట్టుకు సరికొత్త ఊపునిస్తాయని అభిమానులు విశ్వసిస్తున్నారు.
కొత్త అధ్యాయానికి శ్రీకారం..
ఇంగ్లాండ్ కౌంటీ ఛాంపియన్షిప్లో నాటింగ్హామ్షైర్ను విజేతగా నిలిపిన ఘనత ఉన్న ఫ్లెమింగ్కు, ఇంగ్లాండ్ పరిస్థితులపై పూర్తి స్థాయి పట్టు ఉంది. ది హండ్రెడ్ లీగ్లో సదరన్ బ్రేవ్ జట్టుకు కోచ్గానూ ఆయన తన ముద్ర వేశారు. బ్రెండన్ మెకల్లమ్ స్థానంలో బాధ్యతలు చేపడుతున్న ఫ్లెమింగ్, యువ ఆటగాళ్లలోని ప్రతిభను వెలికితీస్తూ ఇంగ్లాండ్ టెస్టు క్రికెట్ను సరికొత్త ఎత్తులకు తీసుకెళ్లడమే లక్ష్యంగా ప్రణాళికలు రచిస్తున్నారు. ప్రపంచ వ్యాప్తంగా వివిధ టీ20 లీగ్లలో విజయవంతమైన కోచ్గా పేరుపొందిన ఫ్లెమింగ్, టెస్టు ఫార్మాట్లో ఏ తరహా వ్యూహాలతో ముందుకెళ్తారో చూడాలి.
మరిన్ని క్రికెట్ వార్తల కోసం ఇక్కడ క్లిక్ చేయండి..