IPL 2025: ‘హెడ్’ఏక్ కి హెడేక్ పుట్టిస్తున్న ఆస్ట్రేలియన్ స్టార్ పేసర్! మరి ఇలా తగులుకున్నాడు ఏంటి భయ్యా.. 8 లో 6 సార్లు!
మిచెల్ స్టార్క్ తన అద్భుతమైన బౌలింగ్తో SRHపై ఢిల్లీ క్యాపిటల్స్ విజయానికి మార్గం సుగమం చేశాడు. ట్రావిస్ హెడ్ను మరోసారి తన బౌలింగ్తో ఓడించి, మొత్తం 6వ సారి అతన్ని అవుట్ చేశాడు. 4 ఓవర్లలో 5 వికెట్లు తీసి SRHను 163 పరుగులకే పరిమితం చేశాడు. స్టార్క్ స్పెల్ కారణంగా DC సునాయాసంగా గెలిచి టోర్నమెంట్లో తమ అజేయ పరంపరను కొనసాగించింది.
IPL 2025లో సన్రైజర్స్ హైదరాబాద్ (SRH) పై ఢిల్లీ క్యాపిటల్స్ (DC) విజయానికి ప్రధాన కారణంగా మిచెల్ స్టార్క్ నిలిచాడు. విశాఖపట్నంలో జరిగిన ఈ మ్యాచ్లో స్టార్క్ తన ప్రత్యర్థి, తన దేశస్థుడైన ట్రావిస్ హెడ్ను మళ్లీ పెవిలియన్కు పంపాడు. అంతర్జాతీయ క్రికెట్లో ఇప్పటికే హెడ్ను పలుమార్లు అవుట్ చేసిన స్టార్క్, ఐపీఎల్లో కూడా అదే విజయాన్ని కొనసాగిస్తూ మరొకసారి హెడ్కు చుక్కలు చూపించాడు.
ట్రావిస్ హెడ్ IPL 2025లో SRH తరఫున ఓపెనర్గా బరిలోకి దిగాడు. మ్యాచ్ ప్రారంభంలో స్టార్క్ వేసిన రెండో బంతికి అద్భుతమైన షాట్ ఆడి తొలి బౌండరీ సాధించినా, అతని ఇన్నింగ్స్ ఎక్కువ సేపు నిలువలేదు. పవర్ప్లే చివరి ఓవర్లో స్టార్క్ షార్ట్ బంతిని విసరగా, హెడ్ పుల్ షాట్ ఆడడానికి ప్రయత్నించాడు. అయితే, బంతి అంచుకు తగిలి వికెట్ కీపర్ KL రాహుల్ గ్లోవ్స్లోకి వెళ్ళిపోయింది.
ఇది స్టార్క్ చేతిలో హెడ్ ఆరోసారి అవుట్ కావడం. మొత్తం 8 ఇన్నింగ్స్లలో స్టార్క్ 34 బంతులు మాత్రమే వేసి హెడ్ను 6 సార్లు పెవిలియన్ పంపాడు. ఈ బంతుల్లో హెడ్ కేవలం 18 పరుగులు మాత్రమే చేయగలిగాడు. దీని ద్వారా స్టార్క్ హెడ్కి స్పెషలిస్ట్ బౌలర్గా మారిపోయాడు.
మొత్తం మీద, విశాఖపట్నంలో SRHతో జరిగిన మ్యాచ్లో స్టార్క్ ఒక మ్యాచ్ విన్నర్గా నిలిచాడు. నాలుగు ఓవర్లలో 5/35 గణాంకాలతో T20 క్రికెట్లో తన తొలి ఐదు వికెట్ల ప్రదర్శన అందించాడు. ఈ ప్రదర్శనతో, 2008లో డెక్కన్ ఛార్జర్స్పై అమిత్ మిశ్రా తీసిన 5/17 తర్వాత ఐపీఎల్లో ఐదు వికెట్లు తీసిన రెండవ ఢిల్లీ క్యాపిటల్స్ బౌలర్గా స్టార్క్ రికార్డు నెలకొల్పాడు.
ఈ అద్భుత ప్రదర్శన తర్వాత, స్టార్క్ తన సహచర ఆటగాడు హెడ్పై సెటైర్ వేస్తూ, “ఇకపై అతను మొదటి బంతిని ఎదుర్కోలేదు అనుకుంటున్నాను. గత 15 ఏళ్లుగా నేను ఎక్కువ T20 క్రికెట్ ఆడలేదు.” అని వ్యాఖ్యానించాడు.
ఈ మ్యాచ్లో స్టార్క్ తన స్పెల్లో నిప్పులు చెరిగాడు. SRH బ్యాటింగ్ లైనప్ను చిత్తు చేసి, కీలకమైన వికెట్లు తీశాడు. అతను ఇషాన్ కిషన్, ట్రావిస్ హెడ్, నితీష్ కుమార్ రెడ్డిలను తొలగించడమే కాకుండా, డెత్ ఓవర్లలో వియాన్ ముల్డర్, హర్షల్ పటేల్లను కూడా అవుట్ చేసి SRHను కేవలం 163 పరుగులకే పరిమితం చేశాడు.
ఢిల్లీ క్యాపిటల్స్ ఈ లక్ష్యాన్ని సునాయాసంగా ఛేదించింది. SRH నిర్ధేశించిన 164 పరుగుల లక్ష్యాన్ని 7 వికెట్ల తేడాతో ఛేదించి టోర్నమెంట్లో తమ అజేయ విజయాన్ని కొనసాగించింది. స్టార్క్ అద్భుత ప్రదర్శన DCకు బలాన్ని చేకూర్చింది. అతని బౌలింగ్ దాడి SRHపై పూర్తి ఆధిపత్యం చెలాయించిందని చెప్పొచ్చు.
మరిన్ని క్రీడా వార్తల కోసం ఇక్కడ క్లిక్ చేయండి..