Rinku Singh: ఫస్ట్ క్లాస్ క్రికెట్‌లో చరిత్ర సృష్టించిన రింకూ సింగ్.. టాప్ 10లో చోటు

Rinku Singh: టీ20 క్రికెట్‌లో తన సిక్సర్లతో అభిమానులను అలరించే రింకూ సింగ్ ఇప్పుడు ఫస్ట్ క్లాస్ క్రికెట్‌లోనూ అదరగొడుతున్నాడు. రంజీ ట్రోఫీ 2026-27 సీజన్‌లో వరుసగా రెండో సెంచరీ సాధించి అరుదైన ఘనత అందుకున్నాడు. గోవాతో జరిగిన మ్యాచ్‌లో అజేయంగా 118 పరుగులు చేసిన రింకూ, ఫస్ట్ క్లాస్ క్రికెట్‌లో కనీసం 50 ఇన్నింగ్స్ ఆడిన బ్యాటర్లలో అత్యధిక బ్యాటింగ్ యావరేజ్ ఉన్న ఆటగాళ్ల జాబితాలో తొమ్మిదో స్థానానికి చేరాడు. ఈ జాబితాలో దిగ్గజ క్రికెటర్ డాన్ బ్రాడ్‌మన్ అగ్రస్థానంలో ఉండటం విశేషం.

ఒంటరి పోరాటంతో జట్టును ఆదుకున్న రింకూ

గోవాతో జరిగిన రంజీ మ్యాచ్‌లో ఉత్తరప్రదేశ్ జట్టు బ్యాటింగ్‌లో తీవ్రంగా తడబడింది. కేవలం 33 పరుగులకే మూడు వికెట్లు కోల్పోయింది. ఆ తర్వాత కూడా వికెట్లు వరుసగా పడటంతో ఒక దశలో 137 పరుగులకే 9 వికెట్లు కోల్పోయి కష్టాల్లో పడింది. ఇలాంటి పరిస్థితుల్లో క్రీజులో నిలిచిన రింకూ సింగ్ అద్భుతంగా ఆడాడు. 186 బంతుల్లో 118 పరుగులతో నాటౌట్‌గా నిలిచాడు. అతడి ఇన్నింగ్స్‌లో 11 ఫోర్లు, 2 సిక్సర్లు ఉన్నాయి. చివరి వికెట్‌కు వంశ్ చౌదరితో కలిసి కీలక భాగస్వామ్యం నెలకొల్పి జట్టు స్కోరును 202 పరుగులకు చేర్చాడు. గోవా బౌలర్ యశ్ కస్వాంకర్ 86 పరుగులిచ్చి 5 వికెట్లు పడగొట్టినా, రింకూ పోరాటంతో ఉత్తరప్రదేశ్ 200 పరుగుల మార్కును దాటగలిగింది.

ఎక్కువమంది చదివినది: జస్ట్ 6 బంతుల్లో 400 స్ట్రైక్ రేట్‌తో ఊచకోత.. కట్‌చేస్తే.. యూవీ 19 ఏళ్ల రికార్డ్ బ్రేక్..

వినోద్ కాంబ్లీని దాటిన రింకూ

ఈ సీజన్ తొలి మ్యాచ్‌లో బిహార్‌పై రింకూ 112 పరుగులతో సెంచరీ సాధించాడు. ఇప్పుడు గోవాపై 118 పరుగులతో అజేయంగా నిలిచి వరుసగా రెండో శతకాన్ని నమోదు చేశాడు. ఈ రెండు ఇన్నింగ్స్‌లతో అతడి ఫస్ట్ క్లాస్ బ్యాటింగ్ సగటు 61.33కు పెరిగింది. అంతకుముందు 59.67 సగటుతో ఉన్న భారత మాజీ క్రికెటర్ వినోద్ కాంబ్లీని రింకూ అధిగమించాడు. ఇప్పటివరకు 55 ఫస్ట్ క్లాస్ మ్యాచ్‌లు ఆడిన రింకూ, 78 ఇన్నింగ్స్‌ల్లో 3,987 పరుగులు చేశాడు. ఇందులో 11 సెంచరీలు, 23 హాఫ్ సెంచరీలు ఉన్నాయి. అతడి అత్యధిక స్కోరు 176 పరుగులు. అంతేకాదు, ఉత్తరప్రదేశ్ తరఫున ఫస్ట్ క్లాస్ క్రికెట్‌లో అత్యధిక సెంచరీలు చేసిన బ్యాటర్‌గా కూడా రింకూ నిలిచాడు.

టాప్-10లో భారత ఆటగాళ్లు వీరే

ఫస్ట్ క్లాస్ క్రికెట్‌లో కనీసం 50 ఇన్నింగ్స్‌లు ఆడిన బ్యాటర్లలో అత్యధిక సగటు విషయంలో డాన్ బ్రాడ్‌మన్ 95.14 సగటుతో అగ్రస్థానంలో ఉన్నాడు. భారత ఆటగాడు విజయ్ మర్చంట్ 71.64 సగటుతో రెండో స్థానంలో నిలిచాడు. జార్జ్ హెడ్లీ 69.86, అజయ్ శర్మ 67.46, విలియం పాన్స్ఫోర్డ్ 65.18, విలియం వుడ్‌ఫుల్ 64.99, శాంతను సుగ్వేకర్ 63.10 సగటులతో తర్వాతి స్థానాల్లో ఉన్నారు. సర్ఫరాజ్ ఖాన్ 62.92 సగటుతో ఎనిమిదో స్థానంలో ఉండగా, రింకూ సింగ్ 61.33 సగటుతో తొమ్మిదో స్థానానికి చేరాడు. కే.సీ.ఇబ్రహీం 61.24 సగటుతో పదో స్థానంలో ఉన్నాడు. ఈ జాబితాలో చోటు దక్కించుకోవడం రింకూ రెడ్ బాల్ క్రికెట్‌లో చూపిస్తున్న నిలకడకు నిదర్శనం.

ఎక్కువమంది చదివినది: తొలి రెండు బంతుల్లో రెండు వికెట్లు.. ప్రపంచ రికార్డ్ నే షేక్ చేసిన టీమిండియా నయా సెన్సేషన్..!

చివరి 11 ఇన్నింగ్స్‌ల్లో 850 పరుగులు

రింకూ ఇటీవలి ఫస్ట్ క్లాస్ ప్రదర్శన కూడా అద్భుతంగా ఉంది. అతడి చివరి 11 ఇన్నింగ్స్‌ల స్కోర్లు 118 నాటౌట్, 112, 60, 20, 176, 165 నాటౌట్, 68, 89, 6, 26, 10. ఈ ఇన్నింగ్స్‌ల్లో మొత్తం 850 పరుగులు చేశాడు. బ్యాటింగ్ సగటు 94.44గా ఉంది. ఈ క్రమంలో నాలుగు సెంచరీలు, మూడు హాఫ్ సెంచరీలు సాధించాడు. సాధారణంగా టీ20 స్పెషలిస్ట్‌గా గుర్తింపు పొందిన రింకూ, రెడ్ బాల్ క్రికెట్‌లోనూ తన సామర్థ్యాన్ని నిరూపిస్తున్నాడు. అతడి ప్రస్తుత ఫామ్‌తో భారత టెస్టు జట్టులో అవకాశం దక్కుతుందా అనే చర్చ మొదలైంది.