Video: రంజీ ఫైనల్లో రచ్చరచ్చ.. ఆ లక్కీ బౌండరీతో పొట్టుపొట్టుగా.. అసలేం జరిగిందంటే?

Paras Dogra vs Aneesh KV Clash: రంజీ ట్రోఫీ 2025–26 ఫైనల్ మ్యాచ్ హుబ్లీలోని కేఎస్‌సీఏ క్రికెట్ గ్రౌండ్‌లో ఉత్కంఠభరితంగా కొనసాగుతున్న సమయంలో ఓ అనూహ్య ఘటన చోటుచేసుకుంది. జమ్మూ కాశ్మీర్ జట్టు కెప్టెన్ పరాస్ డోగ్రా, కర్ణాటక ఫీల్డర్ అనీష్ కేవీ మధ్య మైదానంలో ఘర్షణ చోటుచేసుకోవడంతో పరిస్థితి ఉద్రిక్తంగా మారింది. ఈ ఘటన ఫిబ్రవరి 25న జరిగింది. పరిస్థితిని శాంతింపజేయడానికి కర్ణాటక కెప్టెన్ మయాంక్ అగర్వాల్ మధ్యలోకి వచ్చి ఇద్దరినీ అదుపులోకి తెచ్చేందుకు ప్రయత్నించాడు.

లక్కీ బౌండరీతో మొదలైన గొడవ..

జమ్మూ కాశ్మీర్ ఇన్నింగ్స్ 100వ ఓవర్‌లో ఈ వివాదానికి తెరలేచింది. కర్ణాటక పేసర్ ప్రసిద్ధ్ గంటకు 140.5 కిలోమీటర్ల వేగంతో వేసిన బంతి మిడిల్, ఆఫ్ స్టంప్ దిశగా పడింది. పిచ్ మీద తాకిన తర్వాత కొంచెం స్ట్రెయిట్ అవ్వడంతో పరాస్ డోగ్రా ఆశ్చర్యపోయాడు. డిఫెన్స్ ప్రయత్నంలో బంతి అతడి బ్యాట్ అంచును తాకి గల్లీ వైపు దూసుకెళ్లింది.

అక్కడున్న ఫీల్డర్ పూర్తిగా డైవ్ చేసినా బంతిని అడ్డుకోలేకపోయాడు. బంతి బౌండరీకి చేరడంతో డోగ్రాకు నాలుగు పరుగులు లభించాయి. ఇది అతడికి లక్కీ ఎస్కేప్‌గా మారింది.

అనీష్ కేవీ – పరాస్ డోగ్రా మధ్య వాగ్వాదం..

pic.twitter.com/LGSWm1nV22

— Drizzyat12Kennyat8 (@45kennyat7PM) February 25, 2026

కానీ బౌండరీ అనంతరం జరిగిన సంఘటన అందరినీ ఆశ్చర్యానికి గురిచేసింది. సిల్లీ పాయింట్‌లో హెల్మెట్ ధరించి నిలిచిన అనీష్ కేవీతో పరాస్ డోగ్రా మధ్య మాటల తూటాలు మొదలయ్యాయి. క్షణాల్లోనే ఆ వాగ్వాదం తీవ్ర స్థాయికి చేరుకుంది. ఇద్దరూ ఆగ్రహంతో కనిపించడంతో పరిస్థితి చేజారేలా అనిపించింది.

ఈ సమయంలో మయాంక్ అగర్వాల్ జోక్యం చేసుకుని పరిస్థితిని చల్లార్చే ప్రయత్నం చేశాడు. అయినప్పటికీ కొద్దిసేపు వాగ్వాదం కొనసాగింది. చివరకు అంపైర్లు రంగంలోకి దిగడంతో డోగ్రా, అనీష్‌ను వేరు చేశారు.

అంపైర్లు హెచ్చరిక..

ఈ ఘటన తర్వాత అంపైర్లు కర్ణాటక బ్యాటర్ దేవదత్ పడిక్కల్‌తో కూడా మాట్లాడి, ఫీల్డింగ్ జట్టు క్రమశిక్షణ పాటించాలని హెచ్చరించారు. అనంతరం పరాస్ డోగ్రా అనీష్ కేవీకి క్షమాపణ చెప్పేందుకు ప్రయత్నించాడు. కానీ ప్రత్యామ్నాయ ఫీల్డర్ అయిన అనీష్ ఆ క్షమాపణను స్వీకరించడానికి ఆసక్తి చూపలేదని సమాచారం. అంపైర్ కూడా పరిస్థితిని వివరించి అతడిని శాంతింపజేయడానికి ప్రయత్నించాడు.

ఫైనల్‌కు కర్ణాటక, జమ్మూ కాశ్మీర్ ప్రయాణం..

ఈ ఫైనల్‌కు చేరుకునే క్రమంలో రెండు జట్లు కూడా ఉత్కంఠభరిత ప్రయాణాన్ని ఎదుర్కొన్నాయి. కర్ణాటక ప్రారంభంలో బలంగా ఆడినా మధ్యప్రదేశ్ చేతిలో ఓడిపోయింది. అయితే ముంబై, ఉత్తరాఖండ్‌పై సాధించిన విజయాలతో ఫైనల్‌కు అర్హత సాధించింది.

జమ్మూ కాశ్మీర్ కూడా ముంబై చేతిలో తొలి మ్యాచ్ ఓడిపోయిన తర్వాత మూడు విజయాలు, మూడు డ్రాలతో క్వార్టర్ ఫైనల్‌కు చేరింది. మధ్యప్రదేశ్‌పై క్వార్టర్ ఫైనల్‌లో గెలిచి, సెమీఫైనల్‌లో బెంగాల్‌ను ఓడించి 67 ఏళ్లలో తొలిసారిగా రంజీ ట్రోఫీ ఫైనల్‌కు చేరడం విశేషం.

ప్రస్తుతం ఫైనల్ రెండో రోజు ముగిసే సమయానికి జమ్మూ కాశ్మీర్ 109 ఓవర్లలో 4 వికెట్ల నష్టానికి 351 పరుగులు చేసింది. పరాస్ డోగ్రా (22*), కన్హయ్య వాధవన్ (30*) క్రీజులో నిలిచిఉన్నారు.

రంజీ ట్రోఫీ 2025–26 ఫైనల్ ప్లేయింగ్ ఎలెవెన్స్..

కర్ణాటక జట్టు: కేఎల్ రాహుల్, మయాంక్ అగర్వాల్, దేవదత్ పడిక్కల్ (కెప్టెన్), కరుణ్ నాయర్, స్మరణ్ రవిచంద్రన్, శ్రేయాస్ గోపాల్, కృథిక్ కృష్ణ (వికెట్ కీపర్), విద్యాధర్ పాటిల్, విజయ్‌కుమార్ వైశాక్, శిఖర్ షెట్టి, ప్రసిద్ధ్ కృష్ణ

జమ్మూ కాశ్మీర్ జట్టు: కామ్‌రాన్ ఇక్బాల్, యావర్ హసన్, శుభమ్ పుండీర్, పరాస్ డోగ్రా (కెప్టెన్), అబ్దుల్ సమద్, కన్హయ్య వాధవన్ (వికెట్ కీపర్), అబిద్ ముస్తాక్, ఆఖిబ్ నబీ దార్, యుధ్వీర్ సింగ్ చరక్, సాహిల్ లోత్రా, సునీల్ కుమార్.