Video: 3.2 ఓవర్లలో 7 పరుగులు.. హ్యాట్రిక్‌తోపాటు 6 వికెట్లు.. టీమిండియా బౌలర్ నయా రికార్డ్ గుర్తుందా..?

Deepak Chahar Hat Trick: క్రికెట్‌లో బౌలర్లు అద్భుతాలు చేయడం కొత్తేమీ కాదు. కానీ ఒకే మ్యాచ్‌లో కేవలం ఏడు పరుగులిచ్చి ఆరు వికెట్లు పడగొట్టడం మాత్రం అసాధారణం. భారత పేసర్ దీపక్ చాహర్ 2019 నవంబర్ 10న ఈ అద్భుతాన్ని చేసి చూపించాడు. నాగ్‌పూర్‌లో బంగ్లాదేశ్‌తో జరిగిన మూడో టీ20లో 3.2 ఓవర్లు బౌలింగ్ చేసి 6 వికెట్లు సాధించాడు. దీంతో పురుషుల టీ20 అంతర్జాతీయ క్రికెట్ చరిత్రలో అత్యుత్తమ బౌలింగ్ గణాంకాలను నమోదు చేశాడు.

బంగ్లాదేశ్‌పై చాహర్ బౌలింగ్ విధ్వంసం..!

ఈ మ్యాచ్‌లో తొలుత బ్యాటింగ్ చేసిన భారత్ నిర్ణీత 20 ఓవర్లలో ఐదు వికెట్ల నష్టానికి 174 పరుగులు చేసింది. శ్రేయస్ అయ్యర్ 62, కేఎల్ రాహుల్ 52 పరుగులతో రాణించారు. అనంతరం 175 పరుగుల లక్ష్యంతో బరిలోకి దిగిన బంగ్లాదేశ్‌కు ఆరంభంలోనే దీపక్ చాహర్ షాక్ ఇచ్చాడు.

తన మొదటి ఓవర్లోనే లిటన్ దాస్, సౌమ్య సర్కార్‌లను వరుస బంతుల్లో పెవిలియన్‌కు పంపించాడు. ఆ తర్వాత మహమ్మద్ మిథున్ వికెట్ తీసి బంగ్లాదేశ్ కీలక భాగస్వామ్యాన్ని విడదీశాడు. చివర్లో మరోసారి బంతి అందుకున్న చాహర్ ప్రత్యర్థి బ్యాటర్లను వణికించాడు.

చివరి మూడు బంతుల్లో హ్యాట్రిక్..!

చాహర్ 18వ ఓవర్ చివరి బంతికి షఫీయుల్ ఇస్లాంను ఔట్ చేశాడు. అనంతరం 20వ ఓవర్‌లో బౌలింగ్‌కు వచ్చి తొలి రెండు బంతుల్లో ముస్తాఫిజుర్ రెహమాన్, అమీనుల్ ఇస్లాంలను పెవిలియన్‌కు పంపించాడు. దీంతో హ్యాట్రిక్ పూర్తి చేశాడు. టీ20 అంతర్జాతీయ క్రికెట్‌లో హ్యాట్రిక్ సాధించిన తొలి భారత పురుష బౌలర్‌గా చరిత్ర సృష్టించాడు.

అజంతా మెండిస్ రికార్డు బద్దలు..!

అప్పటివరకు టీ20 అంతర్జాతీయ క్రికెట్‌లో అత్యుత్తమ బౌలింగ్ గణాంకాలు శ్రీలంక స్పిన్నర్ అజంతా మెండిస్ పేరిట ఉండేవి. అతడు 2012లో జింబాబ్వేపై 6/8 నమోదు చేశాడు. చాహర్ 6/7తో ఆ రికార్డును అధిగమించాడు. ఈ అద్భుత ప్రదర్శనకు ప్లేయర్ ఆఫ్ ది మ్యాచ్ అవార్డుతో పాటు సిరీస్‌లోనూ గుర్తింపు దక్కింది. భారత్ ఈ మ్యాచ్‌లో 30 పరుగుల తేడాతో గెలిచి సిరీస్‌ను 2-1తో కైవసం చేసుకుంది.

మరిన్ని క్రీడా వార్తల కోసం ఇక్కడ క్లిక్ చేయండి..