Cricket Records: క్రికెట్ హిస్టరీనే మార్చిన పసికూన.. సౌతాఫ్రికాకే చెమటలు పట్టించిందిగా..
Namibia beat South Africa: అక్టోబర్ 11 నమీబియాకు ఒక ప్రత్యేక రోజు. ఎందుకంటే, దేశంలోని మొట్టమొదటి ప్రైవేట్ యేతర క్రికెట్ స్టేడియం మొదటిసారిగా ఉపయోగించారు. ఈ క్రమంలో తొలిసారి బలీయమైన దక్షిణాఫ్రికా జట్టును ఎదుర్కొంది. నమీబియా ఈగల్స్ చరిత్ర సృష్టించింది.
Updated on: Oct 12, 2025 | 7:04 AM
Namibia vs South Africa T20: అంతర్జాతీయ టీ20 క్రికెట్లో ఒక పెను సంచలనం నమోదైంది..! పసికూనగా భావించే నమీబియా జట్టు, పటిష్టమైన దక్షిణాఫ్రికాపై సంచలన విజయాన్ని నమోదు చేసింది. సొంతగడ్డపై జరిగిన ఏకైక టీ20 మ్యాచ్లో నమీబియా చివరి బంతికి విజయం సాధించి, క్రికెట్ చరిత్రలో తమకంటూ ఒక ప్రత్యేక స్థానాన్ని లిఖించుకుంది. ఈ విజయం నమీబియా క్రికెట్కు ఒక చారిత్రక మైలురాయిగా నిలిచింది.
చివరి బంతికి ఉత్కంఠ విజయం..!
శనివారం విండ్హోక్లోని నమీబియా క్రికెట్ గ్రౌండ్లో జరిగిన ఈ మ్యాచ్ చివరి బంతి వరకు ఉత్కంఠభరితంగా సాగింది. తొలుత బ్యాటింగ్ చేసిన దక్షిణాఫ్రికా నిర్ణీత 20 ఓవర్లలో 8 వికెట్లు కోల్పోయి కేవలం 134 పరుగులు మాత్రమే చేయగలిగింది. నమీబియా బౌలర్ల ధాటికి దక్షిణాఫ్రికా బ్యాటర్లలో జేసన్ స్మిత్ (31), రూబిన్ హెర్మన్ (23) మాత్రమే కొంతవరకూ రాణించారు. స్టార్ ఆటగాళ్లు క్వింటన్ డి కాక్ (1), హెండ్రిక్స్ (7) విఫలమయ్యారు.
నమీబియా బౌలర్లు సత్తా చాటడంతో సౌతాఫ్రికా భారీ స్కోర్ చేయడంలో విఫలమైంది. నమీబియా పేసర్ రూబెన్ ట్రంపెల్మాన్ అద్భుతంగా బౌలింగ్ చేసి 3 వికెట్లు పడగొట్టగా, మ్యాక్స్ హీంగో 2 వికెట్లతో సత్తా చాటాడు.
హీరోగా జేన్ గ్రీన్..
135 పరుగుల లక్ష్యాన్ని ఛేదించే క్రమంలో నమీబియాకు ఆరంభంలోనే ఎదురుదెబ్బలు తగిలినా, బ్యాటర్లు పట్టుదలను ప్రదర్శించారు. కెప్టెన్ గెర్హార్డ్ ఎరాస్మస్ (21) ఇన్నింగ్స్ను నిలబెట్టే ప్రయత్నం చేశాడు.
అయితే, విజయం కోసం చివరి ఓవర్లో 11 పరుగులు అవసరమయ్యాయి. ఈ దశలో వికెట్ కీపర్ జేన్ గ్రీన్ (30 నాటౌట్, 23 బంతుల్లో) అద్భుతమైన పోరాటాన్ని కనబరిచాడు.
ఆఖరి ఓవర్లోని తొలి బంతికి గ్రీన్ ఒక భారీ సిక్సర్ కొట్టి మ్యాచ్ను నమీబియా వైపు తిప్పాడు.
ఆఖరి బంతికి జట్టు విజయానికి ఒక్క పరుగు మాత్రమే అవసరం కాగా, గ్రీన్ ఫోర్ కొట్టి జట్టుకు చిరస్మరణీయమైన విజయాన్ని అందించాడు. నమీబియా 20 ఓవర్లలో 6 వికెట్లు కోల్పోయి 138 పరుగులు చేసి 4 వికెట్ల తేడాతో గెలిచింది. ఆల్ రౌండర్ ప్రదర్శన చేసిన రూబెన్ ట్రంపెల్మాన్ ‘ప్లేయర్ ఆఫ్ ది మ్యాచ్’గా ఎంపికయ్యాడు.
నమీబియాకు ఇది నాలుగో విజయం..
ఐసీసీ ఫుల్ మెంబర్ జట్టుపై నమీబియాకు ఇది మొదటి విజయం. అసోసియేట్ జట్టు చేతిలో దక్షిణాఫ్రికా ఓడిపోవడం చరిత్రలో ఇది రెండోసారి (2022 టీ20 ప్రపంచకప్లో నెదర్లాండ్స్ చేతిలో తొలిసారి ఓడింది).
గతంలో నమీబియా ఐర్లాండ్, జింబాబ్వే, శ్రీలంక వంటి ఫుల్ మెంబర్ జట్లపై టీ20ల్లో విజయం సాధించింది. దక్షిణాఫ్రికాపై సాధించిన ఈ విజయం ఆ దేశ క్రికెట్ చరిత్రలో ఒక సరికొత్త అధ్యాయాన్ని లిఖించింది.
మరిన్ని క్రీడా వార్తల కోసం ఇక్కడ క్లిక్ చేయండి..
