128 ఏళ్ల తర్వాత తొలిసారి.. 12 జట్లు, 180 మంది ఆటగాళ్లు.. ఒలింపిక్స్‌లో క్రికెట్ పూర్తి షెడ్యూల్ ఇదే..

La Olympics 2028

LA Olympics 2028: 128 సంవత్సరాల తర్వాత క్రికెట్ ఒలింపిక్స్‌లోకి తిరిగి రాబోతోంది. ఇటువంటి పరిస్థితిలో, అన్ని మ్యాచ్‌లు జులై 12, 2028 నుంచి జులై 29, 2028 వరకు జరుగుతాయి. లాస్ ఏంజిల్స్ నుంచి దాదాపు 50 కిలోమీటర్ల దూరంలో ఉన్న పోమెనా నగరంలోని ఫెయిర్‌గ్రౌండ్స్ స్టేడియంలో మ్యాచ్‌లు జరుగుతాయి. పురుషులు, మహిళలు కలిపి ఆరు జట్లు LA28లో క్రికెట్ ఆడతాయి. టీ20 ఫార్మాట్‌లో మొత్తం 180 మంది ఆటగాళ్ళు పాల్గొంటారు. ప్రతీరోజూ రోజు రెండు మ్యాచ్‌లు ఉంటాయి. కానీ జులై 14, 21 తేదీలలో మ్యాచ్‌లు ఉండవు. మహిళల మ్యాచ్‌లు జులై 12 నుంచి ప్రారంభమై జులై 20 వరకు జరుగుతాయి. మొదటి పురుషుల మ్యాచ్ జులై 22న, పతకాల మ్యాచ్ జులై 29న జరుగుతుంది.

పతక పోటీలు ఎప్పుడు జరుగుతాయి?

మహిళల పతకాల పోటీ జులై 20న, పురుషుల ఫైనల్ జులై 29న జరుగుతాయి. ప్రతి జట్టులో 15 మంది ఆటగాళ్లు ఉంటారు. ఇది అభిమానులకు మ్యాచ్‌ను ఆసక్తికరంగా, సరదాగా చేస్తుంది. కొత్త అభిమానులు ఈ ఆటకు కనెక్ట్ అయ్యేలా క్రికెట్‌ను ఒలింపిక్స్‌లో కూడా చేర్చిన సంగతి తెలిసిందే.

1900 పారిస్ ఒలింపిక్స్‌లో క్రికెట్ ఒక్కసారి మాత్రమే ఆడారు. అప్పుడు గ్రేట్ బ్రిటన్, ఫ్రాన్స్‌కు చెందిన రెండు జట్లు తలపడ్డాయి. అందులో గ్రేట్ బ్రిటన్ బంగారు పతకాన్ని గెలుచుకుంది. ఇప్పుడు క్రికెట్ తిరిగి రావడంతో అభిమానులు చాలా సంతోషంగా ఉన్నారు. అదే సమయంలో, ప్రపంచంలోని టాప్ 3 క్రికెట్ జట్లు ఏ పతకాలు గెలుచుకోగలవో కూడా చూడాల్సి ఉంది.

ఇటీవల, 2024లో అమెరికా, వెస్టిండీస్‌లో జరిగిన టీ20 ప్రపంచ కప్ అమెరికాలో క్రికెట్ ప్రజాదరణను పెంచింది. టెక్సాస్, ఫ్లోరిడా, న్యూయార్క్ వంటి నగరాల్లో మ్యాచ్‌లు జరిగాయి. LA28లో క్రికెట్ దానిని మరింత ముందుకు తీసుకెళుతుంది.

ఐదు కొత్త క్రీడల్లో క్రికెట్..

అంతర్జాతీయ ఒలింపిక్ కమిటీ LA28 కోసం క్రికెట్‌తో సహా ఐదు కొత్త క్రీడలను ఎంపిక చేసింది. వీటిలో బేస్‌బాల్/సాఫ్ట్‌బాల్, ఫ్లాగ్ ఫుట్‌బాల్, లాక్రోస్, స్క్వాష్ ఉన్నాయి. యువతను ఆకర్షించడానికి ఈ క్రీడలను ఎంపిక చేశారు.