Jofra Archer: క్రికెట్ లో కూడా పవర్ నాప్ ఉంటుందా భయ్యా? ఉంటది ఉంటది! ట్రెండింగ్‌లోకి వచ్చిన జోఫ్రా బాబా వీడియో

Jora Archer

భారత్-ఇంగ్లాండ్ మూడో వన్డేలో ఆసక్తికర సంఘటన చోటుచేసుకుంది. ఇంగ్లాండ్ పేసర్ జోఫ్రా ఆర్చర్ మ్యాచ్ జరుగుతున్న సమయంలో డగౌట్‌లో నిద్రపోతూ కెమెరాలకు చిక్కాడు. ఈ ఘటనపై భారత మాజీ కోచ్ రవిశాస్త్రి చేసిన వ్యాఖ్య సోషల్ మీడియాలో వైరల్‌గా మారింది.

బుధవారం అహ్మదాబాద్ వేదికగా జరిగిన మూడో వన్డేలో ఇంగ్లాండ్ ఇన్నింగ్స్ 25వ ఓవర్‌లో ఈ ఘటన చోటుచేసుకుంది. హ్యారీ బ్రూక్, లియామ్ లివింగ్‌స్టోన్ బ్యాటింగ్ చేస్తున్న సమయంలో డగౌట్‌లో నిద్రిస్తున్న ఆర్చర్‌ను కెమెరాలు పట్టుకున్నాయి. దీనిపై కామెంట్రీలో రవిశాస్త్రి సరదాగా “ఇది ఒక నిద్రకు మంచి సమయం” అని వ్యాఖ్యానించాడు.

మూడు మ్యాచ్‌ల సిరీస్‌ను ఇప్పటికే సొంతం చేసుకున్న టీమ్ ఇండియా, మూడో వన్డేలో 142 పరుగుల తేడాతో ఘన విజయం సాధించింది. భారత టాప్ ఆర్డర్ బ్యాట్స్‌మెన్ శుభ్‌మాన్ గిల్ (112), విరాట్ కోహ్లీ (52), శ్రేయాస్ అయ్యర్ (78) అద్భుతమైన బ్యాటింగ్‌తో జట్టును 356 పరుగుల వద్ద నిలిపారు.

ఇంగ్లాండ్ బ్యాటింగ్ విభాగం మాత్రం భారత బౌలర్ల దాటికి నిలవలేకపోయింది. 34.2 ఓవర్లలో 214 పరుగులకే ఆలౌట్ అయింది. ఇది వన్డే క్రికెట్‌లో భారత్ ఇంగ్లాండ్‌పై నమోదు చేసిన రెండవ అతిపెద్ద రికార్డు.

ఇంగ్లాండ్ జట్టు ఆరంభంలో కొంత మెరుగైన ప్రదర్శన చేసినా, స్పిన్ బౌలింగ్‌ ఎదుట పూర్తిగా విఫలమైంది. బెన్ డకెట్ (34), ఫిల్ సాల్ట్ (24) కొంత పోరాడినప్పటికీ, స్పిన్నర్ల బౌలింగ్‌కు సరైన ప్రత్యామ్నాయం కనిపెట్టలేకపోయారు.

భారత బౌలర్లు అద్భుతంగా రాణించారు. అర్ష్‌దీప్ సింగ్ (2/33) తన వేగవంతమైన బౌలింగ్‌తో ఇంగ్లాండ్ టాప్ ఆర్డర్‌ను కదిలించాడు. స్పిన్ బౌలింగ్‌కు అలవాటు పడలేక ఇంగ్లాండ్ మిడిల్ ఆర్డర్ చేతులెత్తేసింది.

భారత కెప్టెన్ రోహిత్ శర్మ ఈ విజయంపై సంతోషం వ్యక్తం చేస్తూ, “మేము ఎదుర్కొన్న ప్రతి సవాలును అధిగమించాం. బౌలర్లు అద్భుతంగా రాణించారు. ఇది భారత క్రికెట్ బలాన్ని చూపిస్తుంది” అని అన్నారు.

ఈ టూర్‌లో ఆర్చర్ 7 వికెట్లకే పరిమితం కావడం, బౌలింగ్‌లో స్థిరత లేకపోవడం, ఇప్పుడు మూడో వన్డేలో డగౌట్‌లో నిద్రపోవడం అనే అంశాలు అభిమానుల ఆగ్రహానికి కారణమయ్యాయి. సోషల్ మీడియాలో ఈ వీడియో ట్రెండింగ్‌లోకి వచ్చింది.

ఇంగ్లాండ్ జట్టు వరుస పరాజయాలతో తీవ్ర ఒత్తిడిలో ఉంది. జోఫ్రా ఆర్చర్ ప్రదర్శన పట్ల కూడా విమర్శలు పెరుగుతున్నాయి. మరోవైపు, భారత జట్టు తన అద్భుత ఫామ్‌ను కొనసాగిస్తూ మరో ఘన విజయాన్ని ఖాతాలో వేసుకుంది.

మరిన్ని క్రీడా వార్తల కోసం ఇక్కడ క్లిక్ చేయండి..