IPL 2026 Points Table : పాయింట్ల పట్టికలో ఢిల్లీ విశ్వరూపం.. ఒకే ఒక్క దెబ్బతో ముంబై, పంజాబ్ కోటలు బద్దలు

Ipl 2026 Points Table

IPL 2026 Points Table : ఐపీఎల్ 2026 సీజన్ ఇప్పుడిప్పుడే ఊపందుకుంటోంది. కేవలం ఐదు మ్యాచులు మాత్రమే పూర్తయినప్పటికీ, పాయింట్ల పట్టికలో అప్పుడే సమీకరణాలు వేగంగా మారిపోతున్నాయి. ముఖ్యంగా లక్నో సూపర్ జెయింట్స్ (LSG)పై ఢిల్లీ క్యాపిటల్స్ (DC) సాధించిన భారీ విజయం టేబుల్‌ను తలకిందులు చేసింది. నెట్ రన్ రేట్ కీలకంగా మారిన ఈ తరుణంలో, ఢిల్లీ తన మొదటి మ్యాచ్‌తోనే టాప్ గేర్‌లోకి దూసుకెళ్లింది. ప్రత్యర్థిని తక్కువ స్కోరుకే ఆలౌట్ చేసి, లక్ష్యాన్ని త్వరగానే ఛేదించడం ఢిల్లీకి బాగా కలిసివచ్చింది.

ముంబై, పంజాబ్‌లకు ఢిల్లీ చెక్

లక్నోపై సాధించిన 6 వికెట్ల ఘనవిజయంతో ఢిల్లీ క్యాపిటల్స్ అటు పాయింట్లను, ఇటు నెట్ రన్ రేట్‌ను భారీగా పెంచుకుంది. ప్రస్తుతం +1.397 నెట్ రన్ రేట్‌తో ఢిల్లీ పాయింట్ల పట్టికలో నేరుగా మూడో స్థానానికి చేరుకుంది. దీనివల్ల అంతకుముందు మూడు, నాలుగు స్థానాల్లో ఉన్న ముంబై ఇండియన్స్ (+0.687), పంజాబ్ కింగ్స్ (+0.509) వరుసగా నాలుగు, ఐదు స్థానాలకు పడిపోయాయి. ఈ మూడు జట్లు కూడా ఇప్పటివరకు తలో ఒక మ్యాచ్ ఆడి రెండేసి పాయింట్లతో ఉన్నప్పటికీ, ఢిల్లీ రన్ రేట్ ఎక్కువగా ఉండటంతో ఆ జట్టు టాప్-3లో పాగా వేసింది.

టాప్-2లో రాజస్థాన్, బెంగళూరు జోరు

ఐదు మ్యాచులు ముగిసిన తర్వాత కూడా రాజస్థాన్ రాయల్స్ తన అగ్రస్థానాన్ని కాపాడుకుంది. రాజస్థాన్ జట్టు +4.171 రన్ రేట్‌తో మిగతా జట్ల కంటే చాలా ఎత్తులో ఉంది. ఇక రెండో స్థానంలో రాయల్ ఛాలెంజర్స్ బెంగళూరు (+2.907) కొనసాగుతోంది. ప్రస్తుతం పాయింట్ల పట్టికలో మొదటి ఐదు స్థానాల్లో ఉన్న జట్లన్నీ తలో 2 పాయింట్లతోనే ఉన్నాయి. కేవలం నెట్ రన్ రేట్ ఆధారంగానే వాటి ర్యాంకింగ్‌లు మారుతున్నాయి. మరోవైపు ఢిల్లీ చేతిలో చిత్తుగా ఓడిపోయిన లక్నో సూపర్ జెయింట్స్ ఎనిమిదో స్థానానికి దిగజారింది.

సమీర్ రిజ్వీ వీరబాదుడు.. ఢిల్లీకి విజయం

లక్నోలోని ఎకానా స్టేడియంలో జరిగిన ఈ పోరులో ఢిల్లీ బౌలర్లు మొదట లక్నోను 141 పరుగులకే కట్టడి చేశారు. రన్ ఛేజ్‌లో ఢిల్లీ 26 పరుగులకే 4 వికెట్లు కోల్పోయి కష్టాల్లో పడినప్పటికీ, యువ సంచలనం సమీర్ రిజ్వీ అద్భుతం చేశాడు. కేవలం 47 బంతుల్లోనే 70 పరుగులు చేసి అజేయంగా నిలిచి ఢిల్లీని గెలిపించాడు. ఇతని ఇన్నింగ్స్ వల్ల ఢిల్లీ 17.1 ఓవర్లలోనే లక్ష్యాన్ని పూర్తి చేసింది. దీనివల్ల ఢిల్లీ నెట్ రన్ రేట్ భారీగా పెరిగి, పాయింట్ల పట్టికలో మిగతా జట్లను అధిగమించేందుకు వీలైంది.

రాబోయే మ్యాచులే కీలకం

ప్రస్తుతానికి పాయింట్ల పట్టికలో గందరగోళం ఉన్నప్పటికీ, లీగ్ స్టేజ్ పెరిగేకొద్దీ అసలైన పోటీ మొదలవుతుంది. ఢిల్లీ క్యాపిటల్స్ తన తర్వాతి మ్యాచుల్లోనూ ఇదే జోరు కొనసాగిస్తే టాప్-2లోకి వెళ్లే అవకాశం ఉంది. అటు ముంబై, పంజాబ్ జట్లు తమ రన్ రేట్‌ను మెరుగుపరుచుకోవాలంటే తర్వాతి మ్యాచ్‌ల్లో భారీ విజయాలు సాధించాల్సి ఉంటుంది. లక్నో జట్టు మాత్రం తన తర్వాతి మ్యాచ్‌లో గెలిచి పాయింట్ల ఖాతా తెరవాలని పట్టుదలతో ఉంది.

మరిన్ని క్రికెట్ న్యూస్ కోసం ఇక్కడ క్లిక్ చేయండి..