Video: లార్డ్స్‌ టెస్ట్‌లో విచిత్ర సంఘటన.. బుమ్రాపై ఊహించని దాడి.. వీడియో చూస్తే షాకింగే..?

Ind Vs Eng Jasprit Bumrah

Ind vs Eng Ladybirds Attack: లార్డ్స్ క్రికెట్ మైదానం ఎన్నో చారిత్రక ఘట్టాలకు వేదికైంది. కానీ, గురువారం జరిగిన ఇంగ్లండ్-భారత్ మధ్య మూడో టెస్ట్ మొదటి రోజు ఆటలో ఒక అరుదైన, అనూహ్యమైన ఘటన చోటు చేసుకుంది. లేడీబర్డ్స్ (ఆడ పురుగులు) భారీ సంఖ్యలో మైదానంలోకి రావడంతో మ్యాచ్‌కు తాత్కాలికంగా అంతరాయం కలిగింది. ఈ ఘటన భారత పేస్ బౌలర్ జస్ప్రీత్ బుమ్రాను తీవ్రంగా ఇబ్బంది పెట్టగా, ఇంగ్లండ్ కెప్టెన్ బెన్ స్టోక్స్ కూడా ఆశ్చర్యపోయాడు.

మ్యాచ్ చివరి సెషన్‌లో ఇంగ్లండ్ బ్యాట్స్‌మెన్ జో రూట్, బెన్ స్టోక్స్ క్రీజులో ఉండగా, ఒక్కసారిగా లేడీబర్డ్స్ గుంపులు గుంపులుగా మైదానంలోకి ప్రవేశించాయి. ముఖ్యంగా పెవిలియన్ ఎండ్‌లో ఈ పురుగుల బెడద ఎక్కువగా ఉంది. బుమ్రా బౌలింగ్ చేయడానికి సిద్ధమవుతుండగా, ఈ పురుగులు అతని చుట్టూ తిరగడం ప్రారంభించాయి. దీంతో బుమ్రా అసహనానికి గురయ్యాడు. అతను చేతులతో వాటిని తరిమికొట్టడానికి ప్రయత్నించినప్పటికీ, అవి వదలకుండా అతని చుట్టూ తిరుగుతూనే ఉన్నాయి.

ఆటగాళ్లకు, ముఖ్యంగా బౌలర్లకు ఇది ఏకాగ్రతను దెబ్బతీసేలా ఉండటంతో అంపైర్లు పాల్ రీఫెల్, షర్ఫుదౌలా సైకత్ చర్చించుకుని ఆటను కొద్దిసేపు నిలిపివేశారు. బెన్ స్టోక్స్ కూడా అంపైర్లతో ఈ విషయంపై మాట్లాడాడు. పురుగుల బెడద వల్ల ఆట నిలిచిపోవడం క్రికెట్ చరిత్రలోనే అరుదైన ఘటన అని కామెంటేటర్లు సైతం ఆశ్చర్యం వ్యక్తం చేశారు. గతంలో కుక్కలు, తేనెటీగలు వంటి వాటి వల్ల ఆట నిలిచిన సందర్భాలు ఉన్నా, లేడీబర్డ్స్ వల్ల ఇలా జరగడం వింతగా అనిపించింది.

కొద్దిసేపటి తర్వాత, పురుగుల సంఖ్య కాస్త తగ్గడంతో ఆట తిరిగి ప్రారంభమైంది. అయితే, ఈ ఘటన మైదానంలో ఉన్న ఆటగాళ్లకు, ప్రేక్షకులకు వినోదాన్ని పంచింది. బుమ్రా అసహనానికి గురైన తీరు, స్టోక్స్ ఆశ్చర్యపోయిన వైనం సోషల్ మీడియాలో చర్చనీయాంశమయ్యాయి.

ఈ వింత అంతరాయం తర్వాత కూడా ఇంగ్లండ్ ఆటను కొనసాగించి, తొలిరోజు ఆట ముగిసే సమయానికి 4 వికెట్ల నష్టానికి 251 పరుగులు చేసింది. జో రూట్ అద్భుతమైన 99 పరుగులతో నాటౌట్‌గా నిలిచాడు. ఇదంతా పక్కన పెడితే, లార్డ్స్ చరిత్రలో ఈ లేడీబర్డ్స్ దాడి కూడా ఒక ప్రత్యేకమైన అధ్యాయంగా మిగిలిపోవడం ఖాయం.