IND vs SL 2nd Test: గిల్ సేనకు గెలుపు జోష్.. లంకకు గాయాల షాక్.. కొలంబో టెస్టులో వర్షం ఎవరి కొంప ముంచుతుంది?
IND vs SL 2nd Test: గాలేలో ఘనవిజయం సాధించిన టీమిండియా, కొలంబోలోనూ శ్రీలంకను ఓడించి సిరీస్ క్లీన్స్వీప్ చేయాలని చూస్తోంది. అయితే లంక కీలక ఆటగాళ్ల గాయాలతో సతమతమవుతుండగా, SSC పిచ్ స్పిన్నర్లకు అనుకూలించే అవకాశం ఉంది. మరోవైపు కొలంబోలో వర్ష సూచనలు ఉండటంతో రెండో టెస్టుపై ఉత్కంఠ నెలకొంది.
IND vs SL 2nd Test: గాలే టెస్టులో లంకను చిత్తు చేసిన భారత క్రికెట్ జట్టు, ఇప్పుడు రెందో టెస్టులోనూ విజయం సాధించి రెండు టెస్టుల సిరీస్ను క్లీన్స్వీప్ చేయాలని పట్టుదలగా ఉంది. ఆగస్టు 23 ఆదివారం నుంచి కొలంబోలోని సింహళీస్ స్పోర్ట్స్ క్లబ్ (SSC) మైదానంలో ఈ ఆఖరి పోరు ప్రారంభం కానుంది. వాతావరణం, పిచ్ పరిస్థితులు ఎలా ఉన్నాయో చూద్దాం. మొదటి టెస్టులో 165 రన్స్ తేడాతో ఘనవిజయం సాధించిన శుభ్మన్ గిల్ సారథ్యంలోని భారత జట్టు ఆత్మవిశ్వాసంతో ఉంది. తొలి ఇన్నింగ్స్లో దేవదత్ పడిక్కల్ సాధించిన సెంచరీ (167) భారత్ను మంచి స్ట్రాంగ్ పొజిషన్లో నిలబెట్టింది. ఆ తర్వాత కేఎల్ రాహుల్ (82), ధ్రువ్ జురెల్ (51) సమయానికి తగ్గట్లు రాణించారు. బౌలింగ్లో మానవ్ సుతార్ అద్భుత ప్రదర్శన చేస్తూ రెండు ఇన్నింగ్స్ల్లో కలిపి 10 వికెట్లు పడగొట్టి ప్రత్యర్థి కమరాన్ని విరిచారు. రవీంద్ర జడేజా కూడా కీలక వికెట్లతో మద్దతుగా నిలిచారు.
గాయాల పాలైన శ్రీలంక జట్టు
సొంతగడ్డపై ఘోర పరాజయాన్ని మూటగట్టుకున్న శ్రీలంకకు ఈ మ్యాచ్లో తీవ్రమైన ఎదురుదెబ్బలు తగిలాయి. ఆ జట్టు కీలక బ్యాటర్లు దినేష్ చండిమాల్, కుసల్ మెండిస్, పతుమ్ నిస్సంక గాయాల వల్ల ఈ టెస్టుకు దూరమయ్యారు. చండిమాల్ గాలే టెస్టులో తీవ్ర గాయానికి గురవగా, నిస్సంక మణికట్టు శస్త్రచికిత్స నుంచి కోలుకుంటున్నారు. ప్రబాత్ జయసూర్య, కెషార నువాంత వంటి స్పిన్నర్లు తొలి టెస్టులో ప్రభావం చూపినప్పటికీ, సీనియర్ బ్యాటర్లు లేకపోవడం లంకకు కోలుకోలేని దెబ్బ కానుంది.
కొలంబో పిచ్ స్వభావం ఎలా ఉండనుంది?
సింహళీస్ స్పోర్ట్స్ క్లబ్ మైదానంలో పిచ్ సమతూకంగా ఉంటుందని క్యూరేటర్లు చెబుతున్నారు. తొలి రోజుల్లో బ్యాటింగ్కు అనుకూలించినప్పటికీ, మ్యాచ్ పెరిగేకొద్దీ స్పిన్నర్లకు ఎక్కువ సహకారం లభించే అవకాశం ఉంది. శ్రీలంక జట్టు పూర్తిగా స్పిన్ ఫ్రెండ్లీ పిచ్ను సిద్ధం చేయకుండా, పేసర్లకు, స్పిన్నర్లకు సమానంగా ఉపయోగపడే వికెట్నే తయారుచేస్తున్నట్లు తెలుస్తోంది. ఇక్కడ టాస్ గెలిచిన జట్టు మొదట బ్యాటింగ్ ఎంచుకోవడానికే మొగ్గు చూపుతుంది.
వాతావరణ సూచన.. మళ్లీ వర్షం పడేనా?
కొలంబో వాతావరణం ప్రస్తుతం క్రికెట్ అభిమానులను కాస్త ఆందోళనకు గురిచేస్తోంది. మ్యాచ్ జరిగే రోజుల్లో వేడిగా, తేమతో కూడిన మేఘావృత వాతావరణం ఉంటుందని వాతావరణ శాఖ తెలిపింది. గరిష్ఠ ఉష్ణోగ్రత 31 డిగ్రీల సెల్సియస్గా నమోదయ్యే అవకాశం ఉంది. ముఖ్యంగా మధ్యాహ్నం వేళ తేలికపాటి నుంచి భారీ వర్షాలు పడే సూచనలు ఉన్నాయి. నిరంతరాయంగా వర్షం పడకపోయినా, అప్పుడప్పుడు ఆట ఆగిపోయే అవకాశాలు కనిపిస్తున్నాయి. గాయాలతో సతమతమవుతున్న శ్రీలంకపై భారత్ మరో విజయాన్ని సాధించి సిరీస్ కైవసం చేసుకోవాలని భావిస్తోంది. వర్షం గండం దాటి మ్యాచ్ సాఫీగా సాగితే మాత్రం కొలంబోలో భారత జట్టు విజయకేతనం ఎగరవేస్తుందనడంలో ఎలాంటి సందేహం లేదు.
మరిన్ని క్రికెట్ వార్తల కోసం ఇక్కడ క్లిక్ చేయండి