Video: 147 ఏళ్ల చరిత్రలో జరగని అద్భుతం.. 26 బంతుల్లో భారీ రికార్డ్ సృష్టించిన ఇంగ్లండ్‌..

Eng Vs Wi, 2nd Test

England vs West Indies, 2nd Test: వెస్టిండీస్‌తో జరిగిన తొలి టెస్టులో ఏకపక్షంగా విజయం సాధించిన ఇంగ్లండ్ జట్టు ఇప్పుడు భారీ రికార్డు సృష్టించింది. నేటి నుంచి ప్రారంభమైన నాటింగ్‌హామ్ టెస్టులో ఇంగ్లండ్ బ్యాట్స్‌మెన్లు 147 ఏళ్ల టెస్టు క్రికెట్ చరిత్రలో తొలిసారిగా ఈ ఘనత సాధించారు. వెస్టిండీస్‌పై ఇంగ్లండ్ జట్టు కేవలం 4.2 ఓవర్లలోనే 50 పరుగుల మార్కును దాటింది. ఇది ప్రపంచ రికార్డు. ఇంతకుముందు ఈ రికార్డు ఇంగ్లండ్ పేరిట మాత్రమే ఉండేది. ఈ జట్టు 1994 సంవత్సరంలో దక్షిణాఫ్రికాపై 4.3 ఓవర్లలో యాభై మార్కును దాటింది. కానీ, ఇప్పుడు 30 సంవత్సరాల తర్వాత ఈ జట్టు తన సొంత గణాంకాలను మెరుగుపరుచుకుంది.

బెన్ డకెట్ రికార్డ్ స్కోర్..

నాటింగ్‌హామ్‌ టెస్టులో ఇంగ్లండ్‌కు ఆరంభం అంతగా లభించలేదు. తొలి ఓవర్ మూడో బంతికే ఈ జట్టు తొలి వికెట్ కోల్పోయింది. క్రౌలీ 0 పరుగుల వద్ద అవుటయ్యాడు. అయితే ఆ తర్వాత ఆలీ పోప్‌తో కలిసి బెన్ డకెట్ జట్టు స్కోరును తర్వాతి 23 బంతుల్లో యాభై దాటించాడు. బెన్ డకెట్ కేవలం 32 బంతుల్లో హాఫ్ సెంచరీ సాధించాడు. ఇది అతని వేగవంతమైన టెస్ట్ అర్ధ సెంచరీగా నిలిచింది. దూకుడుగా బ్యాటింగ్ చేసిన ఈ ఆటగాడు ఓలీ పోప్‌తో కలిసి 106 పరుగుల భాగస్వామ్యాన్ని నెలకొల్పాడు. బెన్ డకెట్ 59 బంతుల్లో 71 పరుగులు చేసి ఔటయ్యాడు. అతని వికెట్‌ను షమర్ జోసెఫ్ తీశాడు. డకెట్ బ్యాట్ నుంచి మొత్తం 14 ఫోర్లు వచ్చాయి.

వెస్టిండీస్‌పై ఇంగ్లండ్‌ ఆధిపత్యం..

మూడు టెస్టుల సిరీస్‌లో వెస్టిండీస్‌పై ఇంగ్లండ్ జట్టు పూర్తి ఆధిపత్యం చెలాయించింది. లార్డ్స్‌ వేదికగా జరిగిన తొలి టెస్టులో ఇంగ్లండ్‌ జట్టు ఇన్నింగ్స్‌ 114 పరుగుల తేడాతో ఘన విజయం సాధించింది. వెస్టిండీస్ తొలి ఇన్నింగ్స్‌లో 121 పరుగులు మాత్రమే చేసింది. దీంతో ఇంగ్లండ్ తొలి ఇన్నింగ్స్‌లో 371 పరుగులు చేసింది. ఆ తర్వాత, వెస్టిండీస్ జట్టు రెండవ ఇన్నింగ్స్‌లో 136 పరుగులు మాత్రమే చేయగలిగింది. ఫలితంగా ఈ జట్టు ఇన్నింగ్స్ ఓటమిని చవిచూసింది. ఈ మ్యాచ్ జేమ్స్ అండర్సన్‌కు చివరి టెస్ట్ అని తెలిసిందే.

మరిన్ని క్రీడా వార్తల కోసం ఇక్కడ క్లిక్ చేయండి..