Vaibhav Suryavanshi : ధోనీ బర్త్‌డే సందర్భంగా స్పెషల్ గిఫ్ట్ ఇవ్వబోతున్న వైభవ్ సూర్యవంశీ

Vaibhav Suryavanshi (1)

Vaibhav Suryavanshi : భారత యువ సంచలనం వైభవ్ సూర్యవంశీ ఒక సంచలన ప్రకటన చేశాడు. తదుపరి మ్యాచ్‌లో తాను డబుల్ సెంచరీ సాధించడానికి ప్రయత్నిస్తానని వైభవ్ చెప్పాడు. ఒకవేళ ఇది నిజమైతే ఎంఎస్ ధోనీ 44వ పుట్టినరోజు (జులై 7) చాలా ప్రత్యేకంగా మారబోతుంది. ఎందుకంటే వైభవ్ సూర్యవంశీ తన తదుపరి మ్యాచ్‌ను ధోనీ పుట్టినరోజున, అంటే జులై 7న ఆడనున్నాడు. ఇంగ్లాండ్, భారత్ అండర్-19 జట్ల మధ్య ఈ మ్యాచ్ వోర్సెస్టర్‌షైర్‌లో జరుగుతుంది. ఇది ఐదు వన్డేల సిరీస్‌లో చివరి మ్యాచ్. భారత్ ఇప్పటికే మొదటి నాలుగు వన్డేలలో మూడింటిని గెలుచుకుంది. ఈ మ్యాచ్‌లో వైభవ్ సూర్యవంశీ తన డబుల్ సెంచరీతో సిరీస్‌ను 4-1తో గెలిపిస్తే, ధోనీకి ఇంతకంటే మంచి పుట్టినరోజు బహుమతి ఏముంటుంది కదూ.

వైభవ్ సూర్యవంశీ తన తదుపరి మ్యాచ్‌లో డబుల్ సెంచరీ చేస్తానని చెప్పిన ఇంటర్వ్యూ వీడియోను బీసీసీఐ షేర్ చేసింది. ఆ వీడియోలో వైభవ్ సూర్యవంశీ డబుల్ సెంచరీ చేస్తానని చెప్పడమే కాదు, ఆ టార్గెట్ ఎలా సాధించవచ్చో కూడా వివరించాడు. తన ప్రయత్నం మొత్తం 50 ఓవర్లు ఆడటమే అని వైభవ్ అన్నాడు. తాను 50 ఓవర్లు ఆడితే, ఎక్కువ పరుగులు చేయడమే కాకుండా జట్టుకు కూడా ప్రయోజనం కలుగుతుందని చెప్పాడు.

గత మ్యాచ్‌లో తాను అవుటైనప్పుడు కూడా 20కి పైగా ఓవర్లు మిగిలి ఉన్నాయని వైభవ్ సూర్యవంశీ చెప్పాడు. భారత్-ఇంగ్లాండ్ అండర్-19 జట్ల మధ్య జరిగిన నాలుగో వన్డేలో వైభవ్ సూర్యవంశీ 78 బంతుల్లో 143 పరుగులు చేశాడు. అతను అవుటైనప్పుడు 28వ ఓవర్ ప్రారంభమైంది. అంటే, మొత్తం 22 ఓవర్ల ఆట మిగిలి ఉంది. అంటే, వైభవ్ ఆ 22 ఓవర్లు ఆడి ఉంటే, చాలా సులభంగా డబుల్ సెంచరీ చేయగలిగేవాడు. గత మ్యాచ్‌లో చేయలేని ఆ డబుల్ సెంచరీని తదుపరి మ్యాచ్‌లో సాధించడానికి వైభవ్ సూర్యవంశీ ప్రయత్నిస్తున్నాడు.

వైభవ్ సూర్యవంశీ డబుల్ సెంచరీ చేయలేకపోయినా కనీసం మరో సెంచరీ చేస్తాడని అతని చిన్ననాటి కోచ్ మనీష్ ఓఝా కూడా ఆశిస్తున్నాడు. మనీష్ ఓఝా తదుపరి మ్యాచ్‌లో వైభవ్ సూర్యవంశీ పెద్ద ఇన్నింగ్స్ ఆడతాడని, అలాగే తన ధోనీకి పుట్టినరోజు నాడు మరచిపోలేని గిఫ్ట్ కూడా ఇస్తాడని ఆశాభావం వ్యక్తం చేశాడు. వైభవ్ సూర్యవంశీ తన మాట నిలబెట్టుకుంటాడో లేదో జులై 7న జరిగే మ్యాచ్ లో చూడాలి.

మరిన్ని క్రికెట్‌ వార్తల కోసం ఇక్కడ క్లిక్ చేయండి..