Mushroom Coffee: పుట్టగొడుగుల కాఫీతో పుట్టెడు ఆరోగ్య లాభాలు.. తెలిస్తే అవాక్కే..
మష్రూమ్ కాఫీ గురించి చాలా మందికి తెలియదు. దీని గురించి వింటే మీరు ఆశ్చర్యపోవచ్చు. దీంతో అసలు కాఫీ ఎలా చేస్తారు అనే సందేహాలు రావచ్చు. కానీ పుట్టగొడుగులతో తయారు చేసిన కాఫీ అనేక ఆరోగ్య సమస్యలకు దివ్యౌషధం కావచ్చు. ఒత్తిడి, ఆందోళన పెరుగుతున్న ఈ రోజుల్లో ఈ కాఫీ మన యువతకు అవసరం కావచ్చు.
మష్రూమ్ కాఫీలో కార్డిసెప్స్ ఉంటాయి. ఇది శరీరంలో ఆక్సిజన్ వినియోగాన్ని పెంచుతుంది. ఇది అలసట, బలహీనత వంటి సమస్యలను తగ్గించడంలో సహాయపడుతుందని నిపుణులు అంటున్నారు. ఔషధ గుణాలు అధికంగా ఉన్న పుట్టగొడుగులు రోగనిరోధక శక్తిని పెంచే లక్షణాలను కలిగి ఉంటాయి. అవి దీర్ఘకాలిక మంట, గుండె జబ్బుల వంటి సమస్యలను తగ్గించడంలోసహాయపడతాయి.
పుట్టగొడుగులలో ఫైబర్ పుష్కలంగా ఉంటుంది. కాబట్టి దీని నుండి తయారు చేసిన కాఫీ తాగడం వల్ల జీర్ణ సమస్యలు తగ్గుతాయి. అంతే కాదు అవి శరీరంలోని తెల్ల రక్త కణాలను యాక్టివ్ చేస్తాయి. అవి ఇన్ఫెక్షన్లతో పోరాడటం ద్వారా ఆరోగ్యాన్ని కాపాడుకోవడంలో సహాయపడతాయి.
మష్రూమ్ కాఫీలో విటమిన్ బి పుష్కలంగా ఉంటుంది. ఇది మన శరీరంలో శక్తి స్థాయిని గణనీయంగా పెంచుతుంది. ఇది అలసటను తగ్గించడమే కాకుండా, మెదడు పనితీరును మెరుగుపరుస్తుంది. ఏకాగ్రతను మెరుగుపరుస్తుంది.
పుట్టగొడుగులు కొలెస్ట్రాల్ స్థాయిలను తగ్గించడానికి, రక్తపోటును నియంత్రించడానికి సహాయపడే సమ్మేళనాలను కలిగి ఉంటాయి. అవి రక్త నాళాలను రక్షించడంలో, గుండె జబ్బుల ప్రమాదాన్ని తగ్గించడంలో సహాయపడతాయి.
పుట్టగొడుగు కాఫీలో సాధారణ కాఫీ కంటే తక్కువ కెఫిన్ ఉంటుంది. ముఖ్యంగా సాయంత్రం వేళల్లో ఇటువంటి కాఫీ తాగడం వల్ల నిద్రకు ఏ విధంగా భంగం కలగదు. ఇందులో తక్కువ మొత్తంలో కెఫిన్ ఉన్నందున, ఇది రాత్రి బాగా నిద్ర పోవడానికి సహాయపడుతుంది.