Vastu Tips: శంఖు పుష్పం మొక్క నాటడానికి కూడా వాస్తు నియమాలున్నాయని తెలుసా.. ఏ దిశలో ఏ రోజున నాటడం శుభప్రదం అంటే..
హిందూ ధర్మంలో మొక్కలను దైవంగా భావించి పూజిస్తారు. అంతేకాదు రకరకాల పువ్వులు, పండ్లు దేవుళ్ళకు ఇష్టమైనవిగా పరిగణిస్తారు. వాటిని ఆయా దేవుళ్ళకు సమర్పించడం వలన సులభంగా దివానుగ్రహం కలుగుతుందని.. కోరిన కోర్కెలు తీరతాయని విశ్వాసం. అదే విధంగా వాస్తు శాస్త్రంలో కూడా మొక్కల గురించి ప్రస్తావించారు. కొన్ని రకాల మొక్కలు ఇంట్లో నాటడం వలన విజయం లభిస్తుందని.. ఇంట్లో సానుకూల శక్తిని నింపుతుందని విశ్వాసం. మొక్కలు మనిషి జీవితాలపై తీవ్ర ప్రభావం చూపుతాయి. ఈ రోజు శివుడికి, శనిశ్వరుడికి ఇష్టమైన శంఖుపుష్పం మొక్కను ఇంట్లో ఎ దిశలో నాటడం శుభప్రదమో తెలుసుకుందాం..
ఈ దిశలో నాటాలంటే : వాస్తు శాస్త్రం ప్రకారం ఈ మొక్కను ఇంటికి తూర్పు, ఉత్తరం , ఈశాన్య దిశలో నాటడం చాలా శుభప్రదంగా పరిగణించబడుతుంది. ఈ దిశను దైవిక దిశగా పరిగణిస్తారు. ఈ దిశలో శంఖాకర పువ్వుల మొక్కను నాటడం వల్ల ఇంటికి ఆనందం, శ్రేయస్సు లభిస్తుంది. ప్రధాన ద్వారానికి కుడివైపున ఈ మొక్కను నాటడం కూడా చాలా మంచిదని భావిస్తారు. ఇలా చేయడం వల్ల ఇంట్లో శుభ ఫలితాలు, సంతోషం వెల్లివిరుస్తాయి. అయితే, ఈ మొక్కను ఎప్పుడూ పశ్చిమ లేదా దక్షిణ దిశలో నాటకూడదు.
ఏ రోజు నాటాలంటే : శంఖు మొక్కను గురు, శుక్రవారాల్లో ఇంట్లో నాటాలి. గురువారం మహావిష్ణువు. శుక్రవారం కూడా లక్ష్మీదేవికి అంకితం చేయబడింది. ఈ రెండు రోజుల్లో ఏదైనా ఒక రోజు పూలు నాటడం శుభప్రదంగా భావిస్తారు. శుక్రవారం రోజున ఈ మొక్కను నాటడం వల్ల లక్ష్మీదేవి ఇంటికి చేరుతుంది. గురువారం రోజున ఈ మొక్కను నాటడం వల్ల విష్ణువు ఆశీస్సులు మీ వెంటే ఉంటాయని విశ్వాసం.
నాటడం వల్ల కలిగే ప్రయోజనాలు: వాస్తు శాస్త్రం ప్రకారం ఈ మొక్కను ఇంట్లో పెడితే డబ్బుకు సంబంధించిన సమస్యలు తొలగిపోతాయి. ఈ నీలం శంఖు పుష్పం మొక్క సంపదను ఆకర్షిస్తుంది. వాస్తు ప్రకారం ఈ మొక్కను నాటడం వల్ల ఇంట్లో సానుకూల శక్తి ప్రసరిస్తుంది. తద్వారా ఒక వ్యక్తి జీవితంలో విజయం సాధిస్తాడు. చెడు సంఘటలు జీవితం నుండి దూరంగా వేల్తాయని నమ్మకం.
శని దోషం నివారణకు: శనివారం నాడు శని దేవుడికి నీలం రంగు శంఖు పూలు సమర్పించడం చాలా పవిత్రమైనదిగా భావిస్తారు. ఇది శని దేవుడిని సంతోషపరుస్తుంది. ఇలా చేయడం వల్ల ఎలి నాటి శని, శని దోష ప్రభావాలను దూరం చేసుకోవచ్చు.
లక్ష్మీదేవిని ఆకర్షిస్తుంది: కృష్ణకాంత అంటే నీలిరంగు శంఖపు పువ్వు ధనలక్ష్మిని ఆకర్షిస్తుందని నమ్ముతారు. ఈ మొక్క నాటిన ఇంట్లో లక్ష్మీదేవి కొలువై ఉంటుంది. ధనవంతులు కావడానికి మీరు పడిన కష్టానికి తగిన ఫలితం దక్కుతుంది.
మేధస్సు పెరుగుతుంది: బ్లూ కలర్‌ ఫ్లవర్‌ను ఇంట్లో నాటడం వల్ల కుటుంబ సభ్యుల్లో తెలివితేటలు పెరుగుతాయి. దీనితో పాటు ఈ పువ్వులతో విష్ణువుకి పూజ చేయడం మంచిది. కుటుంబం సభ్యుల మధ్య సంబంధాలు మెరుగైనవిగా ఉంటాయని చెబుతారు.
డబ్బు ఆకర్షిస్తుంది: తెల్లని శంఖు పువ్వు ధనలక్ష్మిని ఆకర్షిస్తుంది. ఇంట్లో శంఖు పుష్పం మొక్కను నాటడం వలన ఆ ఇంట్లో సభ్యులు ఇబ్బందులు ఎదుర్కొనే అవకాశాలను తగ్గిస్తుంది. ఇంట్లో ఆనందం, శాంతి ఉంటుంది. ఆహార ధాన్యాల కొరత ఉండదు.