Family Astrology: అనకూలంగా కీలక గ్రహాల సంచారం.. ఆ రాశుల వారికి కుటుంబ సమస్యల నుంచి త్వరలోనే విముక్తి..!
Zodiac Signs: జీవితంలో అంతా బాగున్నా.. కుటుంబానికి సంబంధించి కొన్ని సమస్యలు తీవ్రంగా ఇబ్బంది పెడుతూ ఉంటాయి. వీటికి ఒక పట్టాన పరిష్కారం కూడా దొరకదు. వీటిని ఏ విధంగా పరిష్కరించాలో తెలియక చాలామంది నానా అవస్థలు పడుతుంటారు. గ్రహచారంలో కొన్ని కీలక గ్రహాలు అనుకూలంగా సంచరిస్తున్నందున కొందరికి కుటుంబ సమస్యల నుంచి విముక్తి లభిస్తుంది.
జీవితంలో అంతా బాగున్నా.. కుటుంబానికి సంబంధించి కొన్ని సమస్యలు తీవ్రంగా ఇబ్బంది పెడుతూ ఉంటాయి. వీటికి ఒక పట్టాన పరిష్కారం కూడా దొరకదు. వీటిని ఏ విధంగా పరిష్కరించాలో తెలియక చాలామంది నానా అవస్థలు పడుతుంటారు. గ్రహచారంలో కొన్ని కీలక గ్రహాలు అనుకూలంగా సంచరిస్తున్నందున కొందరికి కుటుంబ సమస్యల నుంచి విముక్తి లభిస్తుంది. ఒకటి రెండు ముఖ్యమైన కుటుంబ సమస్యల నుంచి ఈ ఏడాది ఏ ఏ రాశుల వారు ఏ విధంగా బయటపడటానికి అవకాశం ఉన్నదీ ఇక్కడ పరిశీలిద్దాం.
మేషం: ఈ రాశి వారికి ఈ ఏడాది ఒకటి రెండు ప్రధానమైన కుటుంబ సమస్యలు వాటంతట అవే పరిష్కారం అయ్యే అవకాశం ఉంది. ఈ రాశిలో గురు సంచారం వల్ల కుటుంబ సమస్యల వల్ల ఎక్కువగా ఇబ్బంది పడే అవకాశం లేదు. ఒకటి రెండు సమస్యలు ఉన్నప్పటికీ అవి తీవ్రస్థాయి సమస్యలు కాకపోవచ్చు. అయితే, ఈ రాశిలో రాహు సంచారం కూడా జరుగుతున్నందువల్ల కొద్దిగా అనారోగ్య సమస్యలకు ఆస్కారం ఉంది. ఈ రాశి వారు తరచూ వినాయకుడికి అర్చన చేయించడం వల్ల అనారోగ్య సమస్యలు తగ్గే అవకాశం ఉంటుంది.
వృషభం: ఈ రాశి వారికి పిల్లలకు సంబంధించిన విషయాలు ఎక్కువగా పీడించే అవకాశం ఉంది. తండ్రి నుంచి కూడా కొన్ని సమస్యలు తీవ్ర స్థాయిలో ఇబ్బంది పెట్టే అవకాశం ఉంటుంది. అయితే, ముఖ్యమైన లేదా తీవ్రస్థాయి సమస్య ఒకటి అక్టోబర్ లేదా నవంబర్ నెలలో పరిష్కారం కావడం జరుగుతుంది. ప్రస్తుతానికి ఎంత మౌనంగా లేదా ప్రశాంతంగా ఉంటే అంత మంచిది. ఈ రాశి వారిని ఏ సమస్యా దీర్ఘకాలం పీడించే అవకాశం ఉండదు. ఏదైనా సమస్య తలెత్తినప్పుడు విష్ణు సహస్రనామం పారాయణం చేయడం చాలా మంచిది.
మిథునం: సాధారణంగా ఈ రాశి వారిని దాంపత్య సంబంధమైన సమస్యలు ఇబ్బంది పెట్టే అవకాశం ఉంది. జీవిత భాగస్వామి కారణంగా కొన్ని ఎవరికీ చెప్పుకోలేని సమస్యలు ఎదురు కావడం జరుగుతుంది. జీవిత భాగస్వామితో అపార్థాలకు, విభేదాలకు అవకాశం ఉంటుంది. కొద్దిగా ఆచి తూచి వ్యవహరించడం వల్ల ఉపయోగం ఉంటుంది. ప్రస్తుతానికి దాంపత్య సమస్యలు తార స్థాయిలో ఉండే సూచనలు కనిపిస్తున్నాయి. సెప్టెంబర్ మాసం తరువాత ఈ సమస్యలకు పరిష్కారం లభించవచ్చు. సుబ్రహ్మణ్య అష్టకం చదువుకోవడం వల్ల సమస్యలు శాంతిస్తాయి.
కర్కాటకం:ఈ రాశి వారికి ఎక్కువగా అపార్ధాల వల్ల, క్షణికావేశాల వల్ల కుటుంబ సమస్యలు తలెత్తే అవకాశం ఉంటుంది. దంపతుల మధ్య కుటుంబ సభ్యుల మధ్య కమ్యూనికేషన్ సరిగా ఉండక పోవడం వల్ల సమస్యలు ఎదురవుతుంటాయి. ఈ సమస్యలు మరీ తీవ్రస్థాయిలో ఉండక పోవచ్చు. మధ్య మధ్య ఈ చిన్న చిన్న సమస్యలు తప్పకపోవచ్చు. జూలై నెల తరువాత కుటుంబంలో కాస్తంత ప్రశాంత వాతావరణం ఏర్పడుతుంది. ఈ రకమైన కుటుంబ సమస్యల పరిష్కారానికి ఎక్కువగా సుందరకాండ పారాయణం చేయడం మంచిది.
సింహం: సాధారణంగా ఈ రాశికి చెందిన వారి కుటుంబంలో అహానికి సంబంధించిన సమస్యలు తలెత్తుతూ ఉంటాయి. స్నేహపూర్వక వాతావరణం తక్కువగా ఉండే అవకాశం ఉంది. ఆధిపత్య ధోరణి ఎక్కువగా ఉంటుంది. ఈ సమస్యలను పరిష్కరించుకున్న పక్షంలో కుటుంబ వాతావరణం ప్రశాంతంగా ఉండే అవకాశం ఉంటుంది. ప్రస్తుతం ఈ రాశి వారికి గురు గ్రహం తొమ్మిదవ స్థానంలో సంచరిస్తున్నందువల్ల పెద్దల జోక్యంతో ముఖ్యమైన సమస్యలు పరిష్కారం అయ్యే అవకాశం ఉంది. శివార్చన చేయటం వల్ల ప్రశాంత జీవనానికి అవకాశం ఉంటుంది.
కన్య: అపార్ధాలు చేసుకోవడం, తప్పులు వెతకడం, ఇతరులను ఒక పట్టాన నమ్మకపోవడం వంటి కారణాలవల్ల కుటుంబ సమస్యలు తడితే అవకాశం ఉంటుంది. బంధువుల జోక్యం వల్ల సమస్యలు పెరగటం జరుగుతుంది. ప్రస్తుతం బుధ శుక్ర గ్రహాలు అనుకూలంగా ఉన్నందువల్ల సొంత ప్రయత్నాలతో కుటుంబ సమస్యలను పరిష్కరించుకునే సూచనలు కనిపిస్తున్నాయి. తొందరపాటు నిర్ణయాలను, తొందరపాటు మాటలను దూరంగా ఉంచడం మంచిది. ఈ ఏడాది సెప్టెంబర్ తర్వాత కుటుంబంలో ప్రశాంత వాతావరణం ఏర్పడే అవకాశం ఉంది. సుందరకాండ పఠించడం మంచిది.
తుల: ఆర్థిక సమస్యల కారణంగా దెబ్బతిన్న కుటుంబ వాతావరణం చాలావరకు మెరుగుపడే అవకాశం ఉంది. సాధారణంగా ఈగో సమస్యల వల్ల అప్పుడప్పుడు ప్రశాంత వాతావరణం దెబ్బతినే సూచనలు ఉంటాయి. ప్రస్తుతం సమయం అనుకూలంగా ఉన్నందువల్ల కుటుంబంలో సఖ్యత పెరగటం సామరస్య వాతావరణం ఏర్పడటం అన్యోన్యత మెరుగుపడటం వంటివి జరిగే అవకాశం ఉంది. తొందరపాటు నిర్ణయాలు తీసుకోకపోవడం మంచిది. జూలై నెల నుంచి మరింతగా ప్రశాంతత పెరిగే అవకాశం ఉంది. శివార్చన చేయడం వల్ల శుభ ఫలితాలు అనుభవానికి వస్తాయి.
వృశ్చికం: సాధారణంగా హద్దులు దాటిన కోప తాపాల వల్ల కుటుంబంలో సమస్యలు తలెత్తడం జరుగు తుంటుంది. అహంకారం కారణంగా సామరస్యం దెబ్బతినే అవకాశం ఉంటుంది. ప్రస్తుతం కుజ, శుక్ర గ్రహాలు కలిసి ఉన్నందువల్ల ఒకటి రెండు దాంపత్య సమస్యలు పరిష్కారమయ్యే అవ కాశం ఉంది. కుటుంబ సమస్యల పరిష్కారానికి జూలై ఆగస్టు నెలలు చాలావరకు అనుకూలంగా ఉన్నాయి. ఓర్పు సహనాలను సంయమనాన్ని అలవర్చుకోవలసి ఉంటుంది. ప్రణాళిక ప్రకారం ఆర్థిక వ్యవహారాలను చక్కదిద్దుకోవలసి ఉంటుంది. లలితా సహస్రనామం పారాయణం చేయడం వల్ల ఫలితం ఉంటుంది.
ధనుస్సు: తరచూ ఒత్తిడికి గురి కావడం వల్ల, సరైన ప్లానింగ్ లేకపోవడం వల్ల కుటుంబ సమస్యలు తలెత్తే అవకాశం ఉంటుంది. ఆర్థిక ఆరోగ్య సమస్యలకు అవకాశం లేనప్పటికీ, ఈ రాశి వారికి చిన్న చిన్న సమస్యలను సైతం భూతద్దంలో చూసే అలవాటు ఉంటుంది. కుటుంబ సమస్యల కంటే ఎక్కువగా దాంపత్య సమస్యలు ఈ రాశి వారిని ఇబ్బంది పెట్టే అవకాశం ఉంటుంది. ఈ రకమైన సమస్యలు కూడా ప్రస్తుతం చాలా వరకు అదుపులో ఉండటం జరుగుతుంది. ఈ రాశి వారు తమ సమస్యల పరిష్కారం కోసం హనుమాన్ చాలీసా చదువుకోవడం మంచిది.
మకరం: సాధారణంగా ఈ రాశి వారు కుటుంబంలో సమస్యలు తలెత్తడానికి అవకాశం ఇవ్వరు. అనారోగ్యం, ఆర్థిక వ్యవహారాలు మాత్రం కొద్దిగా ఇబ్బంది పెట్టే అవకాశం ఉంటుంది. కుటుంబ పరంగా తీవ్రస్థాయి సమస్యలు ఉండకపోవచ్చు. ఏవైనా చిన్న సమస్యలు ఉన్నప్పటికీ అవి ఎప్పటికప్పుడు పరిష్కారం అయ్యే అవకాశం ఉంటుంది. కుటుంబ జీవితానికి అత్యంత ప్రాధాన్యం ఇచ్చే ఈ రాశి వారు కుటుంబ పరంగా లేదా దాంపత్య పరంగా ఏ చిన్న సమస్య తలెత్తినప్పటికీ వెంటనే పరిష్కరించడం జరుగుతుంది. ఈ రాశి వారు తరచూ శివార్చన చేయించడం వల్ల శుభ ఫలితాలు అనుభవానికి వస్తాయి.
కుంభం: ఈ రాశి వారు సాధారణంగా తమ మనసులోని మాటను బయట పెట్టరు. కష్టసుఖాలను ఇతరులతో పంచుకోరు. ఈ రాశి వారు ఎవరికీ ఒక పట్టాన అర్థం కాకపోవడం వల్ల కుటుంబ పరంగా సమస్యలు తలెత్తే అవకాశం ఉంటుంది. కమ్యూనికేషన్ వ్యవస్థ ఏదీ లేనందు వల్ల కుటుంబంలో ఇబ్బందులు తలెత్తుతుంటాయి. అంతేకాక ఈ రాశి వారి కుటుంబంలో ఒక పట్టాన సమస్యలు తలెత్తవు. సమస్య తలెత్తితే ఒక పట్టాన పరిష్కారం కాదు. సాధారణంగా తీవ్రస్థాయి సమస్యలు ఉండే అవకాశం లేదు. ఈ రాశి వారు కూడా తరచూ శివార్చన చేయించడం వల్ల శుభ ఫలితాలు అనుభవానికి వస్తాయి.
మీనం: సాధారణంగా ఈ రాశి వారు సమస్యల రాకను ముందుగానే ఊహించి వాటికి అడ్డుకట్ట వేయటం జరుగుతుంటుంది. కుటుంబ సమస్యలను ముందుగానే ఊహించడం వీరికి వెన్నతో పెట్టిన విద్య. ఏ సమస్య నైనా ఎక్కువ కాలం కొనసాగ నివ్వరు. ఈ రాశి వారికి తరచూ జీవిత భాగ స్వామితో విభేదాలు ఏర్పడుతుంటాయి. ఇద్దరి మధ్య కమ్యూనికేషన్ సమస్య తలెత్తుతూ ఉంటుంది. బంధువుల కారణంగా కూడా కుటుం బంలో తరచూ చికాకులు వస్తూ ఉంటాయి. కుటుంబ, దాంపత్య సమస్యల పరిష్కారానికి ఈ రాశి వారు లలితా సహస్రనామం పారాయణం చేయడం మంచిది.