మీ దాంపత్య జీవితంలో బంధువులు తలదూర్చేందుకు ఛాన్స్ ఇవ్వకండి.. జీవిత భాగస్వామితో మీ బంధం ఎలా ఉంటుంది?
Married Life Astrology: ఈ ఏడాది జీవిత భాగస్వామితో సంబంధాలు ఎలా ఉండబోతున్నాయి? ఇందుకు గ్రహాలు అనుకూలంగా ఉన్నాయా? జీవిత భాగస్వామికి కారకుడు శుక్ర గ్రహం. ఈ గ్రహాన్ని కళత్ర కారకుడు అంటారు. జాతక చక్రంలో గానీ, గ్రహ సంచారంలో గానీ శుక్రుడు అనుకూలంగా ఉన్నప్పుడు అంటే..
ఈ ఏడాది జీవిత భాగస్వామితో సంబంధాలు ఎలా ఉండబోతున్నాయి? ఇందుకు గ్రహాలు అనుకూలంగా ఉన్నాయా? జీవిత భాగస్వామికి కారకుడు శుక్ర గ్రహం. ఈ గ్రహాన్ని కళత్ర కారకుడు అంటారు. జాతక చక్రంలో గానీ, గ్రహ సంచారంలో గానీ శుక్రుడు అనుకూలంగా ఉన్నప్పుడు అంటే ఉచ్ఛ, స్వక్షేత్ర, మిత్ర క్షేత్రాలలో ఉన్నప్పుడు దాంపత్య జీవితం అనుకూలంగా, అన్యోన్యంగా సాగిపోతుంది. అదే విధంగా కళత్ర స్థానాధిపతిని, అంటే సప్తమ స్థానాధిపతిని బట్టి కూడా జీవిత భాగస్వామితో సత్సంబంధాల గురించి అంచనా వేయాల్సి ఉంటుంది. ప్రస్తుతం గ్రహ సంచారం ప్రకారం ఇందుకు ఏయే రాశుల వారికి జూలై నెలలో ఏయే గ్రహాలు అనుకూలంగా ఉన్నాయో పరిశీలించడం జరుగుతుంది.
మేషం: ఈ రాశికి కళత్ర కారకుడైన శుక్ర గ్రహమే కళత్ర స్థానాధిపతి కూడా అవుతాడు. ప్రస్తుతం శుక్రుడు ఈ రాశికి అయిదవ స్థానంలో సింహరాశిలో రాశి అధిపతి అయిన కుజ గ్రహంతోనే కలిసి ఉన్నాడు. అందువల్ల, మధ్య మధ్య కొన్ని చిటపటలు ఉన్నప్పటికీ, భార్యాభర్తల మధ్య అన్యోన్యత పెరగడానికే ఎక్కువ అవకాశం ఉంది. ఆలోచనలన్నీ జీవిత భాగస్వామి చుట్టూనే పరిభ్రమిస్తూ ఉంటాయి. జీవిత భాగస్వామికి కానుకలివ్వడం, ఎక్కువ సమయం కేటాయించడం జరుగుతుంది.
వృషభం: శుక్ర గ్రహం సుఖ స్థానంలో సంచరిస్తూ, సప్తమ స్థానాధిపతి అయిన కుజుడితో కలిసి ఉన్నందు వల్ల దాంపత్య జీవితం అన్యోన్యంగా సాగిపోవడానికి అవకాశం ఉంది. భార్యభర్తల మధ్య ఏవైనా మనస్పర్థలు ఉంటే అవి తొలగిపోయే అవకాశం ఉంది. జీవిత భాగస్వామి ఆనందం కోసం ఎంత ఖర్చు పెట్టడానికైనా, ఎక్కడికి వెళ్లడానికైనా, ఏం చేయడానికైనా సిద్ధంగా ఉండడం జరుగుతుంది. మధ్య మధ్య అలకలు, కోపతాపాలు ఉన్నప్పటికీ మొత్తం మీద ఆనందానికి కొరత ఉండదు.
మిథునం: కళత్ర కారకుడైన శుక్రుడు ఈ రాశివారికి మూడవ స్థానంలో ఉండడం, కళత్ర స్థానాధిపతి అయిన గురువు లాభస్థానంలో ఉండడం వల్ల దాంపత్య జీవితంలో సుఖ సంతోషాలకు కొదువ ఉండక పోవచ్చు. భార్యాభర్తలు విహార యాత్రలు చేయడానికి, జీవిత భాగస్వామికి విలువైన వస్తువులు కొనివ్వడానికి, ప్రేమానురాగాలు కురిపించడానికి ఎంతగానో అవకాశం ఉంది. అరమరికలు లేకుండా జీవితం సాగిపోతుంది. ఎక్కువగా కలిసి ప్రయాణాలు చేయడానికి వీలుంది.
కర్కాటకం: కళత్ర కారకుడైన శుక్రుడు ద్వితీయ స్థానమైన సింహరాశిలో సంచరించడం బాగానే ఉంది కానీ, సప్తమ స్థానాధిపతి అయిన శని అష్టమంలో ఉండడం వల్ల దాంపత్య జీవితంలో కొద్దిగా ఇబ్బందు లుండే అవకాశం ఉంది. సరసాలు, సరాగాలు, సల్లాపాలు కాస్తంత తక్కువగానూ, అలకలు, కోప తాపాలు కాస్తంత ఎక్కువగానూ ఉండే సూచనలు కనిపిస్తున్నాయి. కుటుంబ సభ్యుల విష యంలో ఇద్దరి మధ్యా చికాకులు, అపార్థాలు తలెత్తే అవకాశం ఉంది. ఓర్పుతో ఉండడం మంచిది.
సింహం: ఈ రాశికి కళత్ర స్థానాధిపతి అయిన శనీశ్వరుడు సప్తమంలోనే స్వక్షేత్రంలో ఉండడం, కళత్ర కారకుడైన శుక్రుడు సింహ రాశిలోనే సంచరిస్తూ ఉండడం వల్ల దాంపత్య జీవితం పటిష్ఠంగా ముందుకు సాగే అవకాశం ఉంది. వివాహ బంధం మరింత దృఢం అవుతుంది. నిత్యకల్యాణం, పచ్చతోరణంలా సాగిపోతుంది. ఇద్దరి మధ్యా ఎటువంటి సమస్యలున్నప్పటికీ అవి బయటికి రావడం, పరిష్కారం కావడం జరుగుతుంది. ఇద్దరి మధ్యా స్నేహ సంబంధాలు పెంపొందుతాయి.
కన్య: ఈ రాశికి ప్రస్తుతం శుక్రుడు వ్యయ స్థానంలో కుజ గ్రహంతో కలిసి సంచరిస్తున్నాడు. సప్తమాధి పతి అయిన గురు గ్రహం కూడా దుస్థానమైన అష్టమ స్థానంలో సంచరిస్తున్నందువల్ల, భార్యా భర్తలు ఒకరికొకరు దూరంగా ఉండాల్సిన అవసరం ఏర్పడుతుంది. ఉద్యోగపరంగా వేర్వేరు ప్రాంతా లలో కాలం గడపాల్సి రావచ్చు. కోపతాపాలు, అలకల కారణంగా కూడా ఇద్దరి మధ్యా దూరం ఏర్పడవచ్చు. బంధువుల కారణంగా ఇద్దరి మధ్యా విభేదాలు ఏర్పడే అవకాశం కూడా ఉంది.
తుల: కళత్ర కారకుడైన శుక్రుడు లాభస్థానంలో సప్తమాధిపతితో కలిసి ఉన్నందువల్ల దాంపత్య జీవితం సుఖసంతోషాలతో ముందుకు సాగిపోతుంది. విభేదాలు, వివాదాలు మటుమాయం అవుతాయి. అవినాభావ సంబంధం ఏర్పడుతుంది. ఒకరికొకరు అన్నట్టుగా పరిస్థితి మారిపోతుంది. జీవిత భాగస్వామికి విలువైన కానుకలు, వస్త్రాభరణాలు కొనివ్వడం జరుగుతుంది. విహార యాత్రకు వెళ్లే అవకాశం కూడా ఉంది. ఇద్దరి మధ్యా గతంలో ఎలాంటి సమస్యలున్నా పరిష్కారం అవుతాయి.
వృశ్చికం: సప్తమాధిపతి, కళత్ర కారకుడైన శుక్ర గ్రహం దశమ స్థానంలో రాశినాథుడైన కుజుడితో కలిసి ఉండడం వల్ల ఉద్యోగపరంగా ఇద్దరి మీదా కొద్దిగా ఒత్తిడి ఉన్నప్పటికీ దాంపత్య జీవితానికి ఎటు వంటి లోటూ ఉండకపోవచ్చు. సుఖ సంతోషాలకు ఇబ్బంది లేనప్పటికీ, చిటపటలు ఉండే అవ కాశం కూడా లేకపోలేదు. కోపతాపాలు తగ్గించుకుంటే దాంపత్యం మరింత సజావుగా సాగిపోయే అవకాశం ఉంది. విహార యాత్రలకు, విందులు, వినోదాలకు అవకాశం కనిపిస్తోంది.
ధనుస్సు: ఈ రాశివారికి శుక్ర గ్రహం అనుకూలంగా ఉన్నప్పటికీ, కళత్ర స్థానాధిపతి అయిన బుధ గ్రహం అనుకూలంగా లేనందువల్ల, భార్యాభర్తలలో ఒకరికొకరు సమయం కేటాయించుకునే అవకాశం ఉండకపోవచ్చు. వృత్తి, ఉద్యోగాల పరంగా పెరిగే ఒత్తిడి వల్ల, బాగా బిజీ అయిపోవడం వల్ల ఇద్దరి మధ్యా దూరం పెరిగే సూచనలున్నాయి. దాంపత్యపరంగా కొన్ని చికాకులు, ఇబ్బందులు తప్పక పోవచ్చు. ప్రేమానురాగాలు తగ్గకపోవచ్చు కానీ, సుఖ సంతోషాలు మాత్రం తగ్గే అవకాశం ఉంది.
మకరం: కళత్ర కారకుడైన శుక్రుడు దుస్థానమైన అష్టమ స్థానంలో సంచరించడం దాంపత్య జీవితానికి అనుకూలించదు. సప్తమాధిపతి చంద్రుడు కొద్దిగా అనుకూలంగా ఉండడమనేది దాంపత్యానికి అనుకూలంగా ఉంటుంది. మొత్తం మీద మిశ్రమ ఫలితాలు అనుభవానికి వస్తాయి. జీవిత భాగస్వామి బిజీ అయిపోవడం వల్ల లేదా అనారోగ్యానికి గురి కావడం వల్ల సుఖ సంతోషాలకు కొద్దిగా లోపం ఏర్పడుతుంది. దాంపత్యానికి లోటు లేదు కానీ, సాన్నిహిత్యానికి కొరత ఉంటుంది.
కుంభం: ఈ రాశివారికి కళత్ర కారకుడు శుక్రుడు సప్తమంలో ఉండడం, కళత్ర స్థానాధిపతి మిత్ర క్షేత్రాలలో సంచరించడం వంటి కారణాల వల్ల దాంపత్య జీవితం ఒక రోజు బాగుంటే మరొక రోజు బాగుండదు అన్నట్టుగా ఉంటుంది. అనవసర విషయాలకు, సమస్యలకు ప్రాధాన్యమివ్వడం, బంధువులు తలదూర్చడానికి అవకాశం ఇవ్వడం వంటి కారణాల వల్ల విసుగులు, చికాకులకు అవకాశం ఏర్ప డుతుంది. మనసులో ఎంతో ప్రేమ ఉన్నా దాన్ని సరిగ్గా వ్యక్తం చేయలేని పరిస్థితి ఏర్పడుతుంది.
మీనం: ఈ రాశికి ప్రస్తుతం శుక్ర గ్రహ సంచారం అనుకూలంగా లేదు. సప్తమాధిపతి అయిన బుధ గ్రహ సంచారం అనుకూలంగా ఉన్నందువల్ల జీవిత భాగస్వామి మీద ప్రేమ పెరిగే అవకాశం ఉంది. అయితే, కొద్దిగా సుఖ సంతోషాలు తగ్గే సూచనలున్నాయి. తరచూ ప్రయాణాలు చేయవలసి రావడం, వృత్తి ఉద్యోగాల పరంగా బిజీ అయిపోవడం, వ్యాపారంలో ఒత్తిడి పెరగడం, విశ్రాంతి లేకపోవడం వంటి కారణాల వల్ల దాంపత్య జీవితానందానికి కొద్దిగా లోటు ఏర్పడుతుంది.