Seven horse painting: 7 గుర్రాల పెయింటింగ్ మీ ఇంట్లో ఉందా..? అయితే, ఈ విషయాలు తప్పక తెలుసుకోండి..!
చాలా మంది ఇళ్లలో ఏడు తెల్లని పరిగెడుతున్న గుర్రాల ఫోటోలు కనిపిస్తుంటాయి. వాస్తు శాస్త్రంలో ఈ ఫోటోకు ఎంతో ప్రాముఖ్యత ఉందని జ్యోతిశాస్త్ర నిపుణులు చెబుతున్నారు. ఏడు తెల్లని గుర్రాలు పరిగెడుతున్న దృశ్యం వేగం, ధైర్యం, విజయం, పురోగతికి చిహ్నంగా పరిగణించబడుతుంది. ఇంట్లో సరైన దిశలో ఈ చిత్రాన్ని ఉంచడం వల్ల జీవితంలో అన్ని విజయాలేనని నమ్ముతారు. ఏడు గుర్రాల చిత్రం ఇంట్లో పెట్టుకుంటే ఆ ఇంట్లో సంపద పెరుగుతుందని, వారికి అదృష్టం కలిసి వస్తుందని నమ్ముతారు.
వాస్తు, ఫెంగ్ షూయి శాస్త్రం ప్రకారం కూడా గుర్రాల చిత్రం ఇంట్లో ఉంటే జీవితంలో ఆనందం, శ్రేయస్సు ఉంటాయని నమ్ముతారు. వాస్తు శాస్త్రంలో ఏడు అదృష్ట సంఖ్యగా భావిస్తారు. పెళ్లిలో వేసే సప్తపది ఏడు అడుగులు. ఇంద్రధనుస్సులో రంగులు ఏడు, ఈ భూమిపై ఉన్న మహా సముద్రాలు కూడా ఏడు, సప్త రుషులు, సూర్యుడి రథానికి ఉండే గుర్రాలు కూడా ఏడు.
ఇలా హిందూ మతంలో ఏడు సంఖ్య సానుకులమైనదిగా భావిస్తారు. అందుకే ఏడు గుర్రాల పెయింటింగ్ శుభాన్ని సూచిస్తుందని నమ్ముతారు. అయితే ఈ ఏడు తెల్ల గుర్రాల చిత్రం సరైన దిశలో ఉంచుకోవడం చాలా అవసరం. అప్పుడే అది శుభఫలితాలను అందిస్తుంది. ప్రతికూల శక్తులని నిరోధించడంలో ఏడు గుర్రాల చిత్రం సహాయపడుతుంది.
ఆర్థిక సమస్యల్ని పరిష్కరించడంలో కీలక పాత్ర పోషిస్తుంది. తెల్లని ఏడు గుర్రాల ఫోటోను ఇంట్లో దక్షిణ దిశగా ఏర్పాటు చేసుకోవాలని చెబుతున్నారు. ఏడు తెల్లని గుర్రాల బొమ్మను దక్షిణ దిశలో ఉంచడం వల్ల జీవితంలో విజయం సాధిస్తారు. కెరీర్‌లో పురోగతి కనిపిస్తుందని చెబుతారు. ఈ దిశ విజయం, కీర్తితో ముడిపడి ఉండటం వల్ల దక్షిణం వైపుగా ఏడు గుర్రాల చిత్రాన్ని పెడితే మీరు అన్నింటా విజయం సాధిస్తారని నమ్ముతారు.
వాస్తు శాస్త్రం ప్రకారం..ఈ పెయింటింగ్ వేలాడదీసేటప్పుడు గుర్రాల ముఖాలు తలుపుకు ఎదురుగా ఉండకుండా చూసుకోవాలి. అది మీ జీవితంలో ప్రతికూల ప్రభావాన్ని చూపుతుంది. తూర్పు దిక్కున కూడా పెట్టుకుంటే శుభప్రదంగా పరిగణిస్తారు. ఇందులో తెలుపు రంగు గుర్రాలు శాంతి, విజయం, శ్రేయస్సుని సూచిస్తుంది. అందుకే ఇంట్లో, ఆఫీసులో ఈ రంగు గుర్రాల పెయింటింగ్ పెట్టుకోవచ్చు. కానీ, బెడ్ రూమ్, పూజ గది, స్టడీ రూమ్, వాష్ రూమ్ దగ్గర మాత్రం ఈ గుర్రాల పెయింటింగ్ పెట్టుకోకూడదు.
ఇకపోతే, ఇలాంటి ఏడు గుర్రాల ఫోటో ఇంటికి తెచ్చుకునే ముందు వాటి రంగు కూడా ముఖ్యమే అంటున్నారు నిపుణులు. నల్లటి రంగులో ఉన్న గుర్రాలు శని గ్రహాన్ని సూచిస్తాయి. బూడిద రంగు గుర్రాలు రాహు గ్రహాన్ని సూచిస్తాయి. బంగారు రంగు గుర్రాలు సూర్యుడికి ప్రతీకగా చెబుతారు. అలాగే ఫోటోలో గుర్రాలన్నీ ఒకవైపు పరిగెడుతున్నటు వంటి పెయింటింగ్ కొనుగోలు చేయాలి.