పింక్ సాల్ట్ vs తెల్ల ఉప్పు: ఆరోగ్యానికి ఏది మంచిది? తప్పక తెలుసుకోవాలండోయ్..! లేదంటే
మనం రోజూ తినే ఆహారంలో ఉప్పు ప్రధాన పాత్ర పోషిస్తుంది. అయితే ప్రస్తుతం మార్కెట్లో లభించే సాధారణ తెల్ల ఉప్పు (Table Salt) కంటే పింక్ హిమాలయన్ సాల్ట్ (Pink Salt) ఆరోగ్యానికి మేలని చాలామంది భావిస్తున్నారు. ప్రస్తుతం ఆరోగ్య స్పృహ ఉన్న ప్రతి ఒక్కరి వంటగదిలోనూ పింక్ హిమాలయన్ సాల్ట్ కనిపిస్తోంది. సాధారణ తెల్ల ఉప్పుతో పోలిస్తే ఇది ఖరీదైనదైనప్పటికీ, దీని అద్భుతమైన ఆరోగ్య ప్రయోజనాల దృష్ట్యా చాలామంది దీన్నే ఇష్టపడుతున్నారు. ఇంతకీ ఈ రెండింటిలో ఏది ఉత్తమం? ఈ రెండింటి మధ్య ప్రధాన వ్యత్యాసం వాటి తయారీ విధానం, అందులో ఉండే ఖనిజ లవణాలు ఏంటో ఇక్కడ చూద్దాం..
పింక్ సాల్ట్- తెల్ల ఉప్పు మధ్య తేడా: సాధారణ తెల్ల ఉప్పు సముద్రపు నీటి నుండి తయారవుతుంది. దీనిని తెల్లగా మార్చడానికి భారీగా శుద్ధి (Refining) చేస్తారు, ఈ ప్రక్రియలో ఇందులోని సహజ ఖనిజాలు తొలగిపోతాయి. దీనికి విరుద్ధంగా, పింక్ సాల్ట్ పాకిస్తాన్లోని హిమాలయ పర్వతాల గనుల నుండి లభిస్తుంది. ఇది ఎటువంటి కెమికల్ ప్రాసెసింగ్ లేకుండా సహజంగా లభించడం వల్ల దీని రంగు పింక్ రంగులో ఉంటుంది.
పింక్ సాల్ట్ వల్ల కలిగే ప్రయోజనాలు: ఇందులో సోడియంతో పాటు పొటాషియం, మెగ్నీషియం, క్యాల్షియం, ఐరన్ వంటి 84 రకాల సూక్ష్మ పోషకాలు ఉంటాయి. ఇవి శరీర కణాల పనితీరుకు తోడ్పడతాయి. తెల్ల ఉప్పుతో పోలిస్తే ఇందులో సోడియం శాతం కొంచెం తక్కువగా ఉంటుంది. ఇది రక్తపోటు (BP) సమస్య ఉన్నవారికి కొంత మేర మేలు చేస్తుంది.
ఆయుర్వేదం ప్రకారం, సైంధవ లవణం (పింక్ సాల్ట్) తీసుకోవడం వల్ల గ్యాస్, అసిడిటీ సమస్యలు తగ్గుతాయి మరియు జీర్ణశక్తి పెరుగుతుంది. ఇది శరీరంలోని పిహెచ్ (pH) స్థాయిలను సమతుల్యం చేయడంలో మరియు విషపూరిత పదార్థాలను బయటకు పంపడంలో సహాయపడుతుంది.
ఏది వాడాలి?: రుచి పరంగా పింక్ సాల్ట్ కొంచెం తక్కువ ఉప్పగా ఉంటుంది. అయితే, సాధారణ తెల్ల ఉప్పులో థైరాయిడ్ సమస్యలను నివారించే అయోడిన్ అదనంగా కలుపుతారు. పింక్ సాల్ట్లో అయోడిన్ తక్కువగా ఉంటుంది. కాబట్టి, మీరు పూర్తిగా పింక్ సాల్ట్కు మారాలనుకుంటే, మీ ఆహారంలో అయోడిన్ ఉండే ఇతర పదార్థాలు ఉండేలా చూసుకోవాలి.
ఏ ఉప్పు అయినా సరే, అతిగా తీసుకుంటే ఆరోగ్యం దెబ్బతింటుంది. ప్రపంచ ఆరోగ్య సంస్థ (WHO) ప్రకారం, ఒక వ్యక్తి రోజుకు 5 గ్రాముల కంటే తక్కువ ఉప్పును తీసుకోవాలి. మీ జీవనశైలికి ఏది సరిపోతుందో తెలుసుకోవడానికి వైద్యుని సలహా తీసుకోవడం ఉత్తమం.