Hair Fall: వార్నీ.. జుట్టు రాలడానికి కారణం ఇదా.. అసలు విషయం తెలిస్తే అవాక్కే..
ఈ రోజుల్లో చాలా మందిని వేధించే సమస్య జుట్టు రాలడం. దీనికి జన్యుపరమైన, హార్మోన్ల మార్పులతో పాటు అనేక కారణాలు ఉండవచ్చు. అందులో ఒత్తిడి కూడా ఒక ముఖ్య కారణం. దీర్ఘకాలంగా ఒత్తిడిలో ఉండటం వల్ల జుట్టు రాలడం సమస్య పెరుగుతుందని నిపుణులు హెచ్చరిస్తున్నారు. ఒత్తిడికి గురైనప్పుడు రోగనిరోధక శక్తి బలహీనపడి, జుట్టు కుదుళ్లు దెబ్బతింటాయి. దీనివల్ల జుట్టు విపరీతంగా రాలుతుంది. అయితే ఈ సమస్య చాలా అరుదుగా, తీవ్రమైన ఒత్తిడి ఉన్నప్పుడు మాత్రమే కనిపిస్తుందని నిపుణులు అంటున్నారు.
ఎక్కువసేపు ఒత్తిడికి గురికావడం మానసిక, శారీరక ఆరోగ్యంపై చెడు ప్రభావాన్ని చూపుతుంది. దీనితో పాటు ఇది చర్మం, జుట్టును కూడా ప్రభావితం చేస్తుంది. మంచి మానసిక ఆరోగ్యం, మెరిసే చర్మం, ఒత్తుగా ఉండే జుట్టు కోసం ఒత్తిడిని అదుపులో ఉంచుకోవడం చాలా ముఖ్యం. దీని కోసం కొన్ని పద్ధతులను పాటించాలని నిపుణులు సూచిస్తున్నారు.
ధ్యానం, శ్వాస వ్యాయామాలు: రోజుకు 10-15 నిమిషాలు ధ్యానం చేయడం లేదా శ్వాస వ్యాయామాలు చేయడం వల్ల మనస్సు ప్రశాంతంగా ఉంటుంది.
జర్నలింగ్: మీ మనసులోని ఆలోచనలు, మిమ్మల్ని బాధపెడుతున్న విషయాలను ఒక డైరీలో రాసుకోవడం వల్ల ఒత్తిడి తగ్గుతుంది. అలాగే మీ సమస్యలను స్నేహితులు లేదా సన్నిహితులతో పంచుకోవడం కూడా మంచిది.
వ్యాయామం: ప్రతిరోజూ 20-30 నిమిషాలు వ్యాయామం చేయడం లేదా నడవడం వల్ల శరీరంలో 'ఎండార్ఫిన్' అనే సంతోషకరమైన హార్మోన్లు విడుదలవుతాయి. ఇవి మానసిక స్థితిని మెరుగుపరుస్తాయి.
సమతుల్య ఆహారం, నిద్ర: ప్రతిరోజూ 7-8 గంటలు ప్రశాంతంగా నిద్రపోవాలి. దీంతో పాటు సమతుల్య ఆహారం తీసుకోవడం కూడా చాలా అవసరం. ఈ చిన్న మార్పులను జీవనశైలిలో భాగం చేసుకోవడం ద్వారా ఒత్తిడిని నియంత్రించి, జుట్టు రాలడాన్ని తగ్గించుకోవచ్చు. మీరు కూడా ఈ పద్ధతులను అనుసరించి ఆరోగ్యంగా ఉండండి.