ఎండల్లోనూ పుదీనా పచ్చగా, గుబురుగా పెరగాలంటే ఇలా చేస్తే చాలు.. నిపుణుల అదిరిపోయే చిట్కాలు..
వేసవి కాలం రాగానే మన ఆహారంలో పుదీనా ప్రాధాన్యత పెరుగుతుంది. చట్నీలు, జ్యూస్లు, బిర్యానీలలో పుదీనా ఇచ్చే రుచి. సువాసన అద్భుతం. అయితే ఈ మే, జూన్ నెలల తీవ్రమైన ఎండల కారణంగా ఇళ్లలో పెంచే పుదీనా మొక్కలు త్వరగా ఎండిపోతుంటాయి. చాలా మంది ఎంత నీరు పోసినా మొక్కలు చనిపోతున్నాయని ఆందోళన చెందుతుంటారు. ప్రయాగ్రాజ్కు చెందిన ప్రముఖ గార్డెనింగ్ నిపుణుడు రమేష్ కుమార్ పుదీనా మొక్కను ఏడాది పొడవునా పచ్చగా ఉంచేందుకు కొన్ని కీలకమైన రహస్యాలను పంచుకున్నారు.
ఎండ నుండి రక్షణ - సరైన స్థానాన్ని ఎంచుకోండి: పుదీనా మొక్కకు సూర్యరశ్మి అవసరమే కానీ మధ్యాహ్నం పూట వచ్చే తీవ్రమైన వేడిని అది తట్టుకోలేదు. పుదీనా కుండీని ఉదయం పూట కేవలం 2-3 గంటల ఎండ తగిలే చోట ఉంచండి. ఆ తర్వాత నీడ ఉండేలా చూడాలి. మీ బాల్కనీలో లేదా కిచెన్ విండో వద్ద ఎండ తక్కువగా ఉండే ప్రాంతం దీనికి అనువైనది.
వెడల్పాటి కుండీలే ఎందుకు శ్రేష్ఠం: మొక్క పెరిగే తీరును బట్టి కుండీని ఎంచుకోవడం చాలా ముఖ్యం. పుదీనా వేర్లు నిలువుగా కంటే అడ్డంగా వేగంగా వ్యాపిస్తాయి. మీరు లోతైన కుండీలో నాటితే వేర్లు కిందకు వెళ్లలేక మొక్క సరిగ్గా పెరగదు. అందుకే లోతు తక్కువగా ఉండి, వెడల్పు ఎక్కువగా ఉండే పాత్రలు లేదా ట్రేలను ఎంచుకోండి. దీనివల్ల వేర్లు బాగా విస్తరించి, మొక్క గుబురుగా తయారవుతుంది.
మట్టి మిశ్రమం - తేమను పట్టి ఉంచేలా: మట్టి గట్టిగా ఉంటే పుదీనా వేర్లు సరిగ్గా ఊపిరి పీల్చుకోలేవు. సాధారణ మట్టిని 50శాతం, వర్మీకంపోస్ట్ లేదా పశువుల ఎరువును 30శాతం, ఇసుకను 20శాతం కలిపి మిశ్రమాన్ని సిద్ధం చేయండి. ఇసుక కలపడం వల్ల నీరు నిల్వ ఉండదు, అదే సమయంలో వర్మీకంపోస్ట్ తేమను పట్టి ఉంచుతుంది. వేసవిలో పుదీనాకు తేమ చాలా అవసరం. కానీ ఎక్కువ నీరు పోస్తే వేర్లు కుళ్లిపోయే ప్రమాదం ఉంది. ఎండ ఎక్కువగా ఉన్నప్పుడు ఉదయం, సాయంత్రం వేళల్లో తేలికపాటి నీటిని చల్లండి.
ఎరువులు - ఆకులు మందంగా పెరగాలంటే: పుదీనా ఆకులు పెద్దవిగా, సువాసనతో ఉండాలంటే దానికి నత్రజని అధికంగా ఉండే ఎరువులు అవసరం. ప్రతి 10-15 రోజులకు ఒకసారి ఒక గుప్పెడు వర్మీకంపోస్ట్ వేయండి. ఇంట్లో వాడేసిన టీ పొడిని బాగా కడిగి ఎండబెట్టి మట్టిలో కలిపితే అది అద్భుతమైన ఎరువుగా పనిచేస్తుంది. ఇది ఆకులకు మంచి రంగును ఇస్తుంది. అదేవిధంగా ఒక లీటర్ నీటిలో 5 చుక్కల వేప నూనె కలిపి ఆకులపై స్ప్రే చేస్తే కీటకాల బెడద ఉండదు.
కత్తిరింపు - కొత్త కొమ్మల కోసం: పుదీనాను మనం ఎంత ఎక్కువగా ఉపయోగిస్తే అది అంత వేగంగా పెరుగుతుంది. మొక్క పైభాగంలో ఉన్న ఆకులను లేదా కొమ్మలను క్రమం తప్పకుండా కత్తిరిస్తూ ఉండాలి. ఇలా చేయడం వల్ల పక్కల నుండి కొత్త చిగుర్లు వచ్చి మొక్క పొదలాగా మారుతుంది. పువ్వులు రాకుండా చూసుకోవాలి, ఎందుకంటే పువ్వులు వస్తే ఆకుల సువాసన, పెరుగుదల తగ్గుతుంది.