600 Test Wickets: టెస్టుల్లో 600 వికెట్లు తీసిన ఐదుగురు బౌలర్లు.. లిస్టులో భారత్ నుంచి ‘మాజీ కెప్టెన్’ మాత్రమే..
Test Records: టెస్ట్ క్రికెట్ చరిత్రలో ఇప్పటివరకు ఐదుగురు బౌలర్లు మాత్రమే 600 వికెట్ల మార్క్‌ని దాటగలిగారు. ఈ ఐదుగురిలో ముగ్గురు స్పిన్నర్లు కాగా, మిగిలిన ఇద్దరూ ఇంగ్లాండ్‌కి చెందిన పేసర్లు. అసలు ఇంతకీ టెస్టు క్రికెట్‌లో 6 వందలకు పైగా వికెట్లు తీసిన బౌలర్లు ఎవరో ఇప్పుడు చూద్దాం..
1. ముత్తయ్య మురళీధరన్: శ్రీలంక స్పిన్ మాంత్రికుడు ముత్తయ్య మురళీధరన్ టెస్టు క్రికెట్ చరిత్రలో అత్యధిక వికెట్లు తీసిన రికార్డ్‌ని కలిగి ఉన్నాడు. మొత్తం 133 టెస్టులు ఆడిన మురళీధరణ్ ఏకంగా 800 వికెట్లను పడగొట్టాడు.
2. షేన్ వార్న్: ఆస్ట్రేలియా స్పిన్ ఛామర్ షేన్ వార్న్ అత్యధిక టెస్టు వికెట్లు తీసిన రెండో ఆటగాడిగా కొనసాగుతున్నాడు. షేన్ వార్న్ 145 టెస్టుల్లో మొత్తం 708 వికెట్లను తీసుకున్నాడు.
3. జేమ్స్ అండర్సన్: టెస్టు క్రికెట్ చరిత్రలో 600 వికెట్లు తీసిన తొలి పేసర్‌గా ఇంగ్లాండ్ బౌలర్ జేమ్స్ ఆండర్సన్ నిలిచాడు. అలాగే అత్యధిక వికెట్లు తీసిన మూడో టెస్ట్ బౌలర్‌గా ఉన్న అండర్సన్ ఇప్పటివరకు 182 టెస్టుల్లో ఆడి 688 వికెట్లు తీశాడు.
4. అనిల్ కుంబ్లే: భారత్ తరఫున అత్యధిక వికెట్లు తీసిన బౌలర్‌గా రికార్డు సృష్టించిన అనిల్ కుంబ్లే ఈ లిస్టు నాల్గో స్థానంలో ఉన్నాడు. మొత్తం 132 టెస్టులు ఆడిన ఈ భారత మాజీ కెప్టెన్ 619 వికెట్లు పడగొట్టాడు.
5. స్టువర్ట్ బ్రాడ్: మంచెస్టర్ వేదికగా జరుగుతున్న యాషెస్ సిరీస్ 2023 మూడో టెస్ట్ ఆడుతున్న స్టువర్ట్ బ్రాడ్ తాజాగా 600వ వికెట్ తీసుకుని ఈ లిస్టులో స్థానం పొందాడు. ఇప్పటివరకు 166 టెస్టులు ఆడిన బ్రాడ్ 600 వికెట్లను తీసుకోవడంతో పాటు ఆ ఘనత సాధించిన రెండో ఇంగ్లాండ్ బౌలర్‌గా, రెండో అంతర్జాతీయ పేసర్‌గా నిలిచాడు.