మంది ఎక్కువైతే మజ్జిగ పలచన అని మన దగ్గర సామెత ఉంది. సినిమా ఇండస్ట్రీలో ఇప్పుడు ఈ ప్రావెర్బ్ ని విపరీతంగా వాడేస్తున్నారు. కాకపోతే కొద్ది పాటి మార్పులతోనేలెండి. కథ నిడివి పెరిగితే.. కేరక్టర్లు ఫస్ట్ పార్టులో పెద్దగా కనిపించకపోయినా , జస్ట్ ఉండీలేనట్టున్నా ఫర్వాలేదన్నట్టే ఉంది మాట... కథ ఎక్కువైతే.. కేరక్టర్ల స్క్రీన్ స్పేస్ పలచగవుతుందన్నది ఈ మధ్య రిపీటెడ్గా వినిపిస్తున్న మాట. .
దేవర సినిమా పార్ట్ ఒన్లో నా పాత్ర గురించి పెద్దగా ఊహించకండి. తారక్తో ఓ పాట మాత్రం ఉంటుంది. నా కేరక్టర్ ఎక్కువగా సెకండ్పార్ట్ లోనే ఉంటుంది అంటూ విషయాన్ని చల్లగా చెప్పేశారు జాన్వీ కపూర్. అదేంటి? తంగం కేరక్టర్ గురించి తెగ ఊహించుకున్నాం కదా అంటూ డీలా పడుతున్నారు ఫ్యాన్స్. మరికొందరైతే ఒక్కడుగు వెనక్కేసి కల్కి సినిమాలో దిశా పాట్ని రోల్ని గుర్తుచేసుకుంటున్నారు.
కల్కి సినిమాలో దిశ పాట్నికి కూడా చెప్పుకోదగ్గ రోల్ లేదు. జస్ట్ ఓ సీన్ కోసం.. ఓ పాట కోసం ఆమెను తీసుకున్నట్టు అనిపించింది. ప్రభాస్ లేడీ లవ్గా కనిపించినా, స్క్రీన్ మీద చెప్పుకోదగ్గంత సేపు దిశ కేరక్టర్ లేదు. సెకండ్ హాఫ్లో అయినా ఇంకాస్త నిడివి ఉంటుందో, లేకుంటే ఇలాగే ఒకట్రెండు సీన్లతో సరిపెట్టుకుంటారో చూడాల్సిందే. ఆచార్యలో కాజల్ అగర్వాల్ పరిస్థితి మరీ దారుణం.
ఆచార్య యూనిట్ లాహే లాహే లిరికల్ సాంగ్ని రిలీజ్ చేసినప్పుడు కాజల్ అందులో కనిపించారు. కానీ, సినిమాలో ఫిట్ కావడం లేదంటూ ఎడిటింగ్లో ఆ పాత్రను పూర్తిగా తీసేశారు. ఇండియన్2 ఓపెనింగ్ ఫొటోల్లో కాజల్ కనిపించినా, సినిమాల్లో మాత్రం కనిపించలేదు. ఇండియన్3లో కాజల్ కనిపిస్తారనే హింట్స్ ఇచ్చారు. అటు సిద్ధార్థ్ పక్కన నటించిన రకుల్ ప్రీత్సింగ్కి కూడా పెద్ద పోర్షన్ ఏమీ లేదు.
సలార్ సినిమా ఒక రకంగా శ్రుతిహాసన్ చుట్టూ తిరుగుతున్నట్టే ఉంటుంది. కానీ ఆమె రోల్ స్క్రీన్ మీద ఎంత సేపో కనిపించదు. పార్ట్ 2లో అయినా పెంచుతారేమో చూడాలి. సెకండ్హాఫ్లో చూసుకోవచ్చన్న ధీమాతోనే, ఎక్కువగా రివీల్ చేస్తే, కథను కొనసాగించడం కష్టమవుతుందనుకుంటున్నారేమో.. హీరోయిన్ల కేరక్టర్లకు ఫస్ట్ పార్టుల్లో కత్తెర వేసేస్తున్నారు కెప్టెన్స్.