Telugu Director: పరభాషా హీరోలతోనే ఆ తెలుగు దర్శకుడు సినిమాలు.. అసలెవరా దర్శకుడు.?
అన్ని ఇండస్ట్రీల దర్శకులేమో తెలుగు హీరోలు డేట్స్ ఎప్పుడిస్తారా..? వాళ్లతో ఎప్పుడెప్పుడు సినిమా చేద్దామా అని చూస్తున్నారు. కానీ ఆ తెలుగు దర్శకుడు మాత్రం మన హీరోలను కాకుండా.. వరసగా పక్క ఇండస్ట్రీ హీరోలనే పట్టుకుంటున్నాడు. ఓసారి తమిళ్, మరోసారి మలయాళం.. మొత్తానికి తెలుగు హీరోలైతే ఆయన సినిమాల్లో కనబడట్లేదు. మరి దీనికి కారణమేంటి..? అసలెవరా దర్శకుడు..?
పాన్ ఇండియన్ సినిమాల ట్రెండ్ మొదలయ్యాక.. హీరోలకు భాషతో పనిలేకుండా పోయింది. అందుకే దర్శకులు కూడా అన్ని ఇండస్ట్రీల హీరోలతో పని చేస్తున్నారు. వెంకీ అట్లూరి అయితే ఈ మధ్య తెలుగు హీరోల కంటే ఎక్కువగా పరాయి భాషల్లోని హీరోలతోనే పని చేస్తున్నారు. ధనుష్తో సార్.. దుల్కర్ సల్మాన్తో లక్కీ భాస్కర్ చేసి బ్లాక్బస్టర్ కొట్టారు వెంకీ.
వరుణ్ తేజ్ హీరోగా నటించిన తొలిప్రేమ సినిమాతో దర్శకుడిగా పరిచయమయ్యారు వెంకీ అట్లూరి. ఆ తర్వాత అఖిల్తో చేసిన మిస్టర్ మజ్ను, నితిన్తో చేసిన రంగ్ దే కూడా ప్రేమకథలే.. కాకపోతే వర్కవుట్ కాలేదు.
దాంతో సార్తో తనను తాను కొత్తగా పరిచయం చేసుకున్నారు వెంకీ. ఇక లక్కీ భాస్కర్తో ఈ దర్శకుడి రేంజ్ మరింత పెరిగిపోయింది. ఈ సినిమా స్టోరీకి, దుల్కర్ నటనకి ఫిదా అయిపోయారు ప్రేక్షకులు.
ధనుష్తో హానెస్ట్ రాజ్ అనే సినిమాను ప్లాన్ చేస్తున్నారు వెంకీ అట్లూరి. సితార ఎంటర్టైన్మెంట్స్లోనే ఈ సినిమా రానుంది. మోక్షజ్ఞ రెండో సినిమాకు వెంకీనే దర్శకుడైనా.. దీనికింకా టైమ్ ఉంది.
ఈ లోపు ధనుష్ ప్రాజెక్ట్ పూర్తి చేయాలని చూస్తున్నారు ఈ దర్శకుడు. మొత్తానికి వెంకీ కథలు మన హీరోలకు నచ్చట్లేదో లేదంటే ఆయనే చెప్పట్లేదో తెలియట్లేదు కానీ అన్నీ పక్క ఇండస్ట్రీ హీరోల దగ్గరికి వెళ్లిపోతున్నాయి.